HAGAI 1 - Embimbiliya - Bíblia Sagrada em Umbundu

¹ Kulima wavali wa Soma Dáriu, kosãi yepandu, keteke liatete, oco ondaka ya Yehova yeya lomẽla wuprofeto Hagai ku Seruvavele, omõla a Sialitiyele, onguvulu Yoko Yuda, kuenda ku Yehosua, omõla a Yehocedeke, ocitunda cinene, yiti,

² Ca popia Yehova Ukualohoka ceci, hati, Omanu ava va popia vati, Otembo yoku tunga vali onjo ya Yehova ka yeyile handi.

³ Oco ondaka ya Yehova yeya lomẽla wuprofeto Hagai, yiti,

⁴ Otembo yeya nga yoku tumãla volonjo viene via posuisua, osimbu onjo yilo yi kasi ño ndoto, cĩvi, cĩvi?

⁵ Oco Yehova Ukualohoka wa popia hati, Sokololi ciwa ndomo vu kasi.

⁶ Wa wayi ca lua kuenje wongoli citito. Wu lialia puãi ko kuta. Vu nyuanyua puãi ko pui enyona. Vu wala wala puãi ko yevi owuya, kuenje u o limuisamuisa onganyu o yi selaika vonjeke ye yuka apangu!

⁷ Ca popia Yehova Ukualohoka ceci, hati, Sokololi ndomo vu kasi.

⁸ Lamanẽli kolomunda, kopi oviti, tungi onjo yange okuti ndi yi sanjukila loku muisua layo ulamba. Oco ca popia Yehova.

⁹ Wa lavokaili oku ungula calua, kuenje tala, wa sangi citito; kuenje caco citito, eci wa ci neni konjo, nda pepelelako, yu ca takata. Momo nye? Oco ca popia Yehova. Momo onjo yange ya linga ocingululu, ene puãi u sakalali ño, u lonjo yaye, u lonjo yaye.

¹⁰ Oco ilu lia liweka oku lola owume, osi layovo ya liweka oku imisa apako.

¹¹ Kuenje nda laleka ocitenya ha ci veta ongongo lolomunda, kuenda epungu layuva, lulela, leci cosi cimaisa osi, kuenda omanu lovinyama lupange wosi wovaka ene.

¹² Oco Seruvavele, omõla a Sialitiyele, kuenda Yehosua, omõla a Yehocideke, ocitunda, kumosi lowiñi wosi womanu, va pokola kondaka ya Yehova Suku yavo, kuenda kolondaka via Hagai uprofeto, ndomo a tumiwa la Yehova Suku yavo. Va kala lusumba wa Yehova.

¹³ Oco Hagai, omunga ya Yehova, wa pitiya komanu ondaka ya Yehova, hati, Ca popia Yehova ceci, hati, Ame ñasi kumue lene.

¹⁴ Yehova yu wa sanyisa utima wa Seruvavele, omõla a Sialitiyele, onguvulu yoko Yuda, lu wa Yehosua, omõla a Yehocedeke, ocitunda cinene, levi viomanu vosi, yu veya, va kuata kupange wonjo ya Suku yavo, Yehova Ukualohoka.

¹⁵ Va fetika eteke liakũi avali lakuãla liosãi yepandu.