FILEMONE 1 - Embimbiliya - Bíblia Sagrada em Umbundu

¹ Ame ndi Paulu, haime nda lingila Yesu Kristu omandekua, kuenda manjetu Timoteo, Tu sonehela manjetu wa soliwa Filemone haeye o kasi pamosi letu vupange umosi,

² la mukãi wetu Afia, kuenda ukuetu kusualali wa Kristu, Arkipo, lekongelo li ongolokaila vonjo yove.

³ Ocali ci kale lene kuenda ombembua yi tunda ku Suku Isietu lo ku Ñala Yesu Kristu.

⁴ Mandola Suku olonjanja viosi eci hu ivaluka loku ku tukula volohutililo viange.

⁵ Hu panduila omo njeva njeva ocisola cove, lekolelo o kuetele Ñala Yesu lolosandu viosi.

⁶ Ndi likutalaila okuti utima wove woku kuatisa vakuẽle letavo liove wamisako ocili ukũlĩhiso wetu wasumũlũho a sangiwa vu Kristu.

⁷ Momo a manjange, ocisola cove ci sanjuaisa ca lua, haico ci ndembalaeka omo ovitima violosandu vi tumbuluaiwa love.

⁸ Oco, ndaño vu Kristu ñuete utõi woku ku handeleka okuti o linga eci ca sesamela,

⁹ haimo, omo tua kolela ocisola, oco nda nolapo oku ku livondela. Ame ndi Paulu, haime ndikongo, haime nda linga omandekua ya Kristu Yesu,

¹⁰ ñasi loku ku livondelela omõlange Onesimo, onduko yaco ya lomboloka Silivila. Ndo citila vumandekua wange.

¹¹ Ale, ka silivilile kokuove, cilo puãi o silivila kokuove kuenda kokuange.

¹² Ñasi loku u tiula kokuove, kuenje ca soka ndoku ku tumisa utima wange muẽle.

¹³ Ame nda nda sanjukila oku kala laye okuti o mbumba nda Katumua kove osimbu ñasilili ondaka yiwa vokayike.

¹⁴ Puãi sia yonguile oku linga cimue te ove muẽle wa tava. Nda yongola okuti ohenda yosi o linga ka yi lingiwa ño ocikukui, puãi yi tunda kutima wove.

¹⁵ Mbi oco ca sokiyiwila okuti o litepa love otuneke tumue, okuti eci a tiuka vali kokuove ove o kala laye oloneke ka vi pui.

¹⁶ Haku kalako vali ndupika, puãi o velapo upika okuti o linga manjove wa soliwa. Kokuange muẽle wa linga manjange, puãi ca piãla kokuove, momo o linga manjove vetimba kuenda vu Ñala.

¹⁷ Oco, nda wa nenda ame ndukuẽle ketavo, u tambula ndomo nda wa nambula ame.

¹⁸ Nda wa ku linga cĩvi, pamue o kuete ofuka love, ci soneha okuti ame ndi ci feta.

¹⁹ Ame ndi Paulu, soneha leka liange muẽle siti, Ndi ci feta. Si ku ivaluisa okuti ove wa ndevala cosi ndaño omuenyo wove.

²⁰ A manjange, mopia ocili siti, Ndi livela oku sanga okusilivila kumue kokuove vu Ñala. Tumbuluila utima wange vu Kristu.

²¹ Omo nda kolela epokolo liove oco nda ku sonehelela. Nda kũlĩha okuti o linga eci ca velapo vali, eci ñasi loku popia ci sule.

²² Kuenda vali, ngangiliyile ohondo, momo ñasi lelavoko okuti, mekonda liolohutililo viene, ngeciwa kokuene.

²³ Manjange Epafra, haeye omandekua kumue lame vu Kristu, wa tuma oku ku lama.

²⁴ Marko layevo kuenda Aristarko la Dema la Luka, haivo vakuetu vupange, va tumavo ovilamo.

²⁵ Ocali ca Ñala yetu Yesu Kristu ci kale lovitima viene. Amene.