ETUNDILO 9 - Embimbiliya - Bíblia Sagrada em Umbundu

¹ Yehova yu wa popia la Mose hati, Kuende ku Fareo, ko sapuile huti, Ca popia Yehova, Suku ya va Heveru ceci, hati, A ece omanu vange oco va ka fendele.

² Momo nda wa va lamẽlẽla okuti ku tava oku va eca,

³ tala! eka lia Yehova il veta ovinyama viove vi li vusenge, otuvalu, lovimbulu kuenda olongamelo loviunda violongombe levi violomeme lolohombo. Ku kala ociyefu ca kãla enene.

⁴ Puãi Yehova o tepisa pokati kovinyama via va Isareli lovinyama via va Egito okuti kovinyama viosi via va Isareli ka pa fi cimue.

⁵ Kuenje Yehova wa tukula eteke liaco, hati, Hẽla Yehova o linga ocina eci vofeka.

⁶ Hẽla liaco oco Yehova wa ci linga. Oviunda viosi via va Egito via fa, puãi povinyama via va Isareli lacimue ca fapo.

⁷ Fareo wa tuma oku kulĩhĩsa kuenje pokati kovinyama via va Isareli lacimue ca fapo. Puãi utima wa Fareo wa tĩla, kuenje ka tavele oku eca omanu.

⁸ Yehova yu wa popia la Mose kuenda Arone, hati, Yoyi apupu etiko liovofolono, Mose a limbile vilu kovaso a Fareo.

⁹ Li linga oneketela kofeka yosi ye Egito, li kokela omanu lovinyama ovipumbu layuya kofeka yosi ye Egito.

¹⁰ Ovo va yoya etiko liovofolono, va talama kovaso a Fareo, kuenje Mose wa li imba vilu. Lia kokela omanu lovinyama ovipumbu layuya.

¹¹ Vakualumbu ka va tẽlele oku talama kovaso a Mose omo ovipumbu via lua, omo vakualumbu va velavo ovipumbu kumosi la va Egito vosi.

¹² Puãi Yehova wa tĩlĩsa utima wa Fareo kuenje ka va yevele. Ndomo Yehova a popia la Mose haimo ca pita.

¹³ Yehova wa popia la Mose hati, Pasuka omẽle ociteketeke. Kuende, ha talame kovaso a Fareo. Popia laye huti, Ca popia Yehova, suku ya va Heveru, ceci, hati, Eca omanu vange oco va ka fendele.

¹⁴ Cilo hu yambula layambulo ange osi. Njambulavo akuenje vove lomanu vove, oco o limbuka okuti kuosi kilu lieve ka kuli wa lisoka lame.

¹⁵ Momo cilo nda ndoluĩle ale eka liange oku ku veta lefengi ove lomanu vove, okuti nda wa tetiwile kilu lieve.

¹⁶ Puãi nda tava oku popela omuenyo wove okuti hu lekisa unene wange, onduko yange ha yi tukuiwa kilu lieve liosi.

¹⁷ Lopo wa tilĩsila omanu vange utima wove kuenje ku tava oku va eca.

¹⁸ Oco hẽla muẽle pekumbi ndopo, ndokisa ociwe ca kãla okuti ve Egito ka mua la kala ociwe ndoco tunde kefetikilo liayo toke ketali lilo.

¹⁹ Oco cilo tuma lombili oku iñisa olongombe viove lovinyama viosi o kasi lavio vusenge. Momo ociwe ci lokila omanu vosi lovinyama viosi vi kasi vusenge okuti ka va vi nenele vimbo, kuenje vi fa.

²⁰ Oco pokati kakuenje va Fareo, wosi wa sumbila ondaka ya Yehova wa iñisa akuenje vaye lovinyama viaye volonjo.

²¹ Puãi wosi ka sumbilile ondako ya Yehova wa sia akuenje vaye lovinyama viaye vusenge.

²² Yehova wa popia la Mose hati, Oluĩla eka liove kilu cokuti ku kala ociwe kofeka yosi ye Egito, komunu, kocinyama lokovikũla viosi viovovapia, kofeka yosi ye Egito.

²³ Oco Mose woluĩla ombueti yaye kilu kuenje Yehova wa tuma ocilemĩlo lociwe. Ondalu layovo ya lokila posi. Yehova muẽle wa lola ociwe kofeka ye Egito.

²⁴ Oco kua kala ociwe, londalu ya liakoka ño pokati kociwe. Ociwe caco ca kãla enene. Ca soka laco ka kua la kala kofeka ye Egito tunde apa ya linga ofeka.

²⁵ Ociwe caco ca nyõla cosi ca kala vusenge vofeka yosi ye Egito, lomunu locinyama. Ociwe ca nyõlavo ovikũla viosi viovovapia, ca teya oviti viosi viovusenge.

²⁶ Kofeka ya Gosene, oko kua kala va Isareli, oko lika ka kua pitile ociwe.

²⁷ Oco Fareo wa tumĩla Mose la Arone, wa popia lavo hati, Cilo nda lueya muẽle, Yehova ukuesunga, ame lomanu vange tuakuahuku.

²⁸ Likutilili ku Yehova, momo okukanãla kuaco lociwe ku tẽla. Ndu weci ka vu kala vali kulo.

²⁹ Mose wa popia laye hati, Tuli nunda vimbo ngoluĩla ovaka ku Yehova. Ovilemĩlo vi ũha, ka ku kala vali ociwe, kuenje ove o limbuka okuti oluali luosi lua Yehova.

³⁰ Ove puãi lakuenje vove ndo kulĩhi okuti ka wa sumbili handi Yehova Suku.

³¹ Elinyu losevata via nyolẽha, momo osevata ya pulũla ale lelinyu lia temũla ale.

³² Puãi otiliku losendeyu ka via nyolẽhele omo ka via kolele handi.

³³ Oco Mose wa tunda ku Fareo, wa enda, woluĩla ovaka ku yehova, kuenje oku kanãla lociwe via imũha, ombela ka ya lokele vali.

³⁴ Puãi eci Fareo a mõla okuti ombela lociwe loku kanãla via imũha oco wa linga vali ekandu, wa tĩlĩsa utima waye, eye lakuenje vaye.

³⁵ Utima wa Fareo wa tila kuenje ka ecele va Isareli. Ndomo Yehova a popia la Mose haimo ca pita.