ETUNDILO 6 - Embimbiliya - Bíblia Sagrada em Umbundu

¹ Yehova yu wa popia la Mose hati, Kaliye o mõla eci ndinga ku Fareo; momo o sĩlĩhiwa oku va eca loku va tundisa longusu vofeka yaye.

² Suku wa popia vali la Mose hati, Ame ndi Yehova.

³ Nda tukuluka ku Avirahama kuenda ku Isake loku Yakoba nda Suku Ukuonenewosi. Puãi sia lisituluile kokuavo londuko yange Yehova.

⁴ Nda lisila lavo ocisila cange coku va iha ofeka ya Kanana, haiyo ofeka yokutungayala kuavo omu va kaile ndakombe.

⁵ Nda yevavo eleñoleño lia va Isareli avandeti va Egito va tumãlãisa kupika, kuenje nda ivaluka ocisila cange.

⁶ Oco ondaka yange ku va Isareli, yeyi, Ame ndi Yehova, kuenje ndu wupi ovitele via va Egito. Nyimũla upika waco, ndu yovoli lokuokuo kuolõha lolonimbu via tua.

⁷ Ndu tambuli okuti vu linga omanu vange kuenje ame ndinga Suku yene. Vu kulĩha okuti ame ndi Yehova Suku yene u wo wupi ovitele via va Egito.

⁸ Ndu tuali kofeka nda lisila oku eca ku Avirahama, kuenda ku Isake loku Yakoba; ndu yihi ndocipiñalo cene, ame ndi Yehova.

⁹ Mose wa ci sapuila va Isareli puãi ka vo yevele momo ovitima viavo via teka, lupika waco wa kãla vali.

¹⁰ Yehova wa popia la Mose hati,

¹¹ Kuendemo, ka sapuile Fareo, Soma ye Egito, oco a ece va Isareli okuti va tunda vofeka yaye.

¹² Mose puãi wa kumbulula Yehova hati, Tala, va Isareli ka va njevele, oco hẽ, Fareo o njeva ndati ame sia pila vomẽla?

¹³ Puãi Yehova wa popia la Mose kuenda Arone, wa va kundika ocikundi coku va Isareli, leci coku Fareo, Soma ye Egito, coku upa va Isareli vofeka ye Egito.

¹⁴ Ovakulu vapata olosekulu viavo vava: omãla va Ruvene nuñulu ya Isareli: Henoke la Falu la Hecirone la Karimi; o apata a Ruvene.

¹⁵ Omãla va Simeone vava: Yemuele la Yaminu la Ohada la Yakini la Cohara la Saulu eye omõla ukãi u Kanana; o apata a Simeone.

¹⁶ Olonduko viomãla va Lewi ca soka ovaimo avo vievi: Gerisiono la Kohata la Merari. Ovanyamo omuenyo wa Lewi ocita kakuĩ atatu kovanyamo kovanyamo epanduvali.

¹⁷ Omãla va Gerisiono vava: Livini la Simei ca soka apata avo.

¹⁸ Omãla va Kohata vava: Amirama la Yicihare la Hevirone la Usiyele. Anyamo omuenyo wa Kohata ocita kakuĩ atatu kanyamo atatu.

¹⁹ Omãla va Merari: Mahili la Musi. O apata a va Lewi ca soka ovaimo avo.

²⁰ Amirama yu wa kuela Yokevede, manja a mukãi wa isiaye, kuenje wa cita laye Arone la Mose. Anyamo omuenyo wa Amirama ocita kakui atatu kovanyamo kovanyamo epanduvali.

²¹ Omãla va Yicihare vava: Kora la Nefege la Sikiri.

²² Omãla va Usiyele vava: Misiaele la Elicafane la Sitiri.

²³ Arone yu wa kuela Elisieva, omõla a Amindava, mukãi wa Nahisione, kuenje wa cita laye Nadava la Avihu kuenda Eleasa la Itamare.

²⁴ Omãla va Kora vava: Asire la Elikana la Aviasafa; o apata a va Kora.

²⁵ Eleasa, omõla a Arone, wa kuela umue omõla a Putiyele kuenje wa cita laye Finehase. Ovo muẽle ovakulu va Lewi ca soka lapata avo.

²⁶ Ovo muẽle Arone la Mose, vana Yehova wa popia lavo hati, Kopi va Isareli vofeka ye Egito ca soka lolohoka viapata avo.

²⁷ Ovo muẽle, Mose la Arone, va vangula la Fareo, Soma ye Egito, ondaka yoku upa va Isareli ke Egito.

²⁸ Eteke Yehova a popia la Mose vofeka ye Egito,

²⁹ oco yehova a sapuila Mose hati, Ame ndi Yehova. Sapuila Fareo, Soma ye Egito, viosi evi mopia love.

³⁰ Puãi Mose wa kumbulula Yehova hati, A Ñala, ame sia pile vomẽla, oco hẽ Fareo o njeva ndati?