ETUNDILO 5 - Embimbiliya - Bíblia Sagrada em Umbundu

¹ Noke Mose la Arone va enda ku Fareo, vo sapuila vati, Ca popia Yehova, Suku ya Isareli, ceci, hati, A ece omãla vange, va ende, va ka ndingile ofesta vekalasoko.

² Fareo puãi wa va pula hati, Yehova hẽ elie okuti njeva kondaka yaye hã si eci va Isareli? Yehova sio kulĩhĩle, oco oku eca va Isareli si kuatako.

³ Ovo va linga vati, Suku ya va Heveru wa lisanga letu. Va tu ece, tu ende vekalasoko atulo atatu, tu ka lumbile Yehova Suku yetu ovilumba sanga o tu lowila efengi pamue osipata.

⁴ Puãi Soma ye Egito wa popia lavo hati, Ene, a Mose la Arone, vu panduluili nye omanu kovopange avo? Kuendi kupange wene.

⁵ Fareo wa popiavo hati, Vanji, kaliye omanu vofeka va lua, ene vu va lembula kupange wavo!

⁶ Eteke liaco hailio Fareo a pañinya asongui vaye vupange la va Isareli vana va noliwa oku endisa upange, hati,

⁷ Ko ka eci vali owangu komanu ha va tungi lawo olondopi ndomo muãle. Va ende, va ka likeluile ovo muẽle owangu.

⁸ Oseo yolondopi va yi tunga tungale haiyo vu va silĩha. Ko ka tepululi lanaito. Omo va kasi lowesi oco va vilikiyila vati, Tu enda, tu ka lumbila Suku yetu ovilumba.

⁹ Alume va ihiwe upange wa velapo, wale u sule, oco va talavaye muẽle, oku tava kolondaka viesanda hacoko.

¹⁰ Oco asongui la va Isareli vana va noliwa oku endisa upange, va tunda, va popia lamanu vati, Ca popia Fareo ceci, hati, Siu wihi vali owangu.

¹¹ Kuendi ene muẽle, ka likeluili owangu kuosi vu u sanga, puãi la-umue upange u tepuluka.

¹² Oco omanu va sandukila kuosi kofeka ye Egito oku sanda asĩla owangu oku luvikiya owangu.

¹³ Asongui va va silĩha vati, Tẽlĩsi oloseo viene vieteke nda cina wa tamboli owangu.

¹⁴ Va Isareli, vana va noliwa lasongui va Fareo, va tipuiwa, va puliwa, vati, Etaili hẽ nye ka wa lingilili oseo yene yoku tunga olondopi ndeci u lingaingi ale?

¹⁵ Oco va Isareli vana va noliwa oku endisa upange va enda ku Fareo, va funda laye vati, Nye o lingila ndoto lakuenje vove?

¹⁶ Laumue owangu wa eciwa kovakuenje vove, haimo va popia letu vati, Tungi olondopi. Vanja, etu tuakuenje vove tua tipuiwa, ongole yaco puãi yi li komanu vove.

¹⁷ Fareo puãi wa linga hati, Ene wakuawesi, wakuawesi muẽle, oco wa lingili hoti, Tu enda, tu ka lumbila Yehova ovilumba.

¹⁸ Oco, kuendi yapa, ka lingi muẽle upange, lopo ka va wihi owangu, haimo lumue oseo yolondopi haiyo.

¹⁹ Va Isareli vaco, vana va noliwa oku endisa upange, va mõla okuti ongongo ya va sanga eci va popia vati, Oseo yolondopi yeteke haiyo.

²⁰ Va sanga Mose la Arone va tãi vonjila eci va tunda ku Fareo.

²¹ Va popia lavo vati, Yehova o vanje, a tepise, momo wa suvukisi elemba lietu kovaso a Fareo lokovaso akuenje vaye. Wa kapi peka liavo osipata yoku tu ipa.

²² Oco Mose wa tiukila ku Yehova, wa pula hati, A Ñala, nye wa lingila omanu ava cĩvi? Wa numila nye?

²³ Tunde pana ndeya ku Fareo londuko yove eye o kasi loku linga ño-o omanu ava cĩvi, kuenje ove kua popelele omanu vove lakamue.