ETUNDILO 40 - Embimbiliya - Bíblia Sagrada em Umbundu

¹ Yehova yu wa popia la Mose hati,

² Eteke liatete liosãi yatete o tunga otavernakulu yombalaka yoku ñualẽhẽla la Yehova.

³ O kapamo ocikasia cuvangi, o vindikiya ocikasia longumbo yeyavailo.

⁴ O nenamo omesa, o sokiyako ovina vi kasiko; o nenamo ondiyelo, o mika olovela viayo,

⁵ o tumbika utala wulu winsensu kovaso yocikasia cuvangi, o kapa ombindikiyo yuvelo wotavernakulu.

⁶ O tumbika utala wocilumba coku pia elisi kovaso yuvelo wotavernakulu yombalaka yoku ñualẽhẽla la Yehova.

⁷ O tumbika etasu pokati kombalaka yoku ñualẽhẽla la Yehova lutala; o kapamo ovava.

⁸ O ñualĩsako ocitali loku nyoñamisa ombindikiyo yombundi yocitali.

⁹ O yelula ulela woku waveka, o waveka otavernakulu la viosi vi kasimo, o yi kolisa, oyo lovikuata viaco viosi, yi kola.

¹⁰ O waveka utala wocilumba coku pia elisi lovikuata viawo viosi, loku kolisa utala; utala u kola ca piãla.

¹¹ O waveka etasu lomangu yaco loku li kolisa.

¹² O pitiya Arone lomãla vaye kuvelo wombalaka yoku ñualẽhẽla la Yehova hu va sukula lovava.

¹³ O walisa Arone uwalo u kola; o u waveka hu kolisa, eye ha mbumbila komangu yutunda.

¹⁴ O nena omãla vaye hu va walisa ovikutu.

¹⁵ O va waveka ndeci wa waveka isiavo, ha va mbumbila komangu yutunda. Okuwaveka kuavo ku va muisa utunda wenda hũ kovitumbulukila viavo viosi.

¹⁶ Oco Mose a linga. Viosi Yehova o sapuila ovio a linga.

¹⁷ Kuenje ca kala okuti vosãi yatete, kunyamo wavali, eteke liatete liosãi, va tunga otavernakulu.

¹⁸ Mose wa tunga otavernakulu, wa kapa alukuki, wa talamisa avaya, wa pimbilika olombala, wa votola olongunji viaco.

¹⁹ Wa nyanyumũla ombalaka kilu liotavernakulu, wa yala kilu liayo ocisikĩlĩlo combalaka; ndeci Yehova a sapuila Mose.

²⁰ Wa nyañula uvangi wo kapa vocikasia, wa pitisa olomuangaluwa kocikasia, wa tumbika omangu yohenda kilu liocikasi.

²¹ Wa nena ocikasia votavernakulu, wa nyoñamisa ongumbo yoku vindikiya. Wa vindikiya ocikasia cuvangi; ndeci Yehova a sapuila Mose.

²² Wa kapa omesa vombalaka yoku ñualẽhẽla la Yehova, konẽle yoko Norte yotavernakulu, posamua yongumbo.

²³ Wa sokiya ombolo kilu liayo kovaso a Yehova; ndeci Yehova a handeleka Mose.

²⁴ Wa kapa ondiyelo vombalaka yoku ñualẽhẽla la Yehova, ya lisuñama lomesa, konẽle yo Sul yotavernakulu.

²⁵ Wa miha olovela kovaso a Yehova; ndeci Yehova a sapuila Mose.

²⁶ Wa kapa utala wulu vombalaka yoku ñualẽhẽla la Yehova kovaso yongumbo.

²⁷ Wa yokelako insensu violosimbolua vi pepa; ndeci Yehova a handeleka Mose.

²⁸ Wa kapa ombindikiyo yokuvelo wotavernakulu.

²⁹ Wa tumbika utala wocilumba coku pia elisi kuvelo wotavernakulu vombalaka yoku ñualẽhẽla la Yehova, wa lumbilako ocilumba coku pia elisi locilumba cosema; ndeci Yehova a handeleka Mose.

³⁰ Wa tumbika etasu pokati kombalaka yoku ñualẽhẽla la Yehova lutala, wa kapamo ovava oku pusa lao.

³¹ Mose la Arone lomãla vaye va pusilamo ovaka lolomãi.

³² Nda va iñila vombalaka yoku ñualẽhẽla la Yehova, nda veya ocipepi lutala va pusa; ndeci Yehova a sapuila Mose haico.

³³ Wa tunga ocitali ca ñuala kotavernakulu lutala; wa sokiya ombindikiyo yombundi yocitali. Oco Mose a mãla upange waco.

³⁴ Oco elende lia sikĩlila ombalaka yoku ñualẽhẽla la Yehova, ulamba wa Yehova wa yukisa otavernakulu.

³⁵ Mose yu ka tẽlẽle oku iñila vombalaka yoku ñualẽhẽla la Yehova omo elende lia sikĩlĩlãko, lo votavernakulu mue yuka ulamba wa Yehova.

³⁶ Eci elende lia yeluka, lia tunda kotavernakulu, oco va Isareli vamako kovongende avo osi.

³⁷ Elende nda ka lia yelukile ka va amiko te eteke li yeluka.

³⁸ Kovongende avo osi utanya elende lia Yehova lia kala kotavernakulu; uteke ondalu ya kalamo. Kuenje va Isareli vosi va ci mõla.