ETUNDILO 4 - Embimbiliya - Bíblia Sagrada em Umbundu

¹ Oco Mose wa kumbulula hati, Puãi ndi ci ale okuti ka va nava, ka va yevi kondaka yange; momo va popia vati, Yehova ka tukulukila kokuove.

² Yehova wo pula hati, Nye oco o kasi laco peka liove? Eye hati, Ombueti.

³ Yehova sapuila hati, Yimba posi. Mose wa yimba posi kuenje ya linga onyõha. Mose wa yi tila.

⁴ Puãi Yehova wa popia la Mose hati, Olõla eka liove, yi kuata kucĩla. Mose wolõla eka, wa yi kuata, kuenje ya lingila ombueti peka liaye;

⁵ oco va tava okuti Yehova, Suku yolosekulu viavo, haeye Suku ya Avirahama la Isake kuenda Yakoba, wa ku tukulukila.

⁶ Yehova wa popia vali laye hati, Kaliye, kapa eka liove vonete. Mose wa kapa eka ponete. Eci a li upapo eka lia kala lovilundu, lia yela ndocikokoto.

⁷ Yehova wa popia laye hati, Kapa vali eka ponete. Eye wa kapa vali eka ponete. Eci a li upapo lia pongoloka, lia linga vali ndetimba liaye.

⁸ Oco Suku wa popia laye hati, Nda ka va tava kondaka yove, pamue ka va kolela ondimbukiso yatete, mbi va kolela ondimbukiso ya sulako.

⁹ Nda ka va kolela olondimbukiso viaco, kavali kavio, pamue ka va yevi kondaka yove, oco ove o sua ovava volui Nilu, o-a itila kongongo, kuenje ovava o sua volui a pongolokela osonde kongongo.

¹⁰ Puãi Mose wa livondela la Yehova hati, A Ñala, ame singanjiko, omo ondaka yange ya lenda lelimi liange li lema.

¹¹ Oco Yehova wo pula hati, U wa sovola omẽla womunu heli? Helie o sovola ocitende pamue ocisitatui, pamue u o lete, pamue omeke? Hameko ndi Yehova?

¹² Oco kuende. Ame ñala omẽla wove siu ku longisa eci o popia.

¹³ Puãi eye wa kumbulula hati, A Ñala, nda ku livondela, tuma ño umue wiñi.

¹⁴ Onyeño ya Yehova ya wengukila Mose, yu wa linga hati, Huvove Arone u Lewi hẽ, keko? Ndo kulĩha okuti o popia ciwa. Kuenda tala, o kasi loku iya oku ñualẽhela love, eci a ku mõla kutima ku-u yela.

¹⁵ Ove o vangula laye, loku kapa olondaka viaco vomẽla waye, kuenje ame ñala omẽla wove lomẽla waye, ndu wimbi onumbi yevi vu linga.

¹⁶ Eye o ku lingila Ndaka komanu, kuenje o ku lingila ndomẽla, love u lingila nda Suku.

¹⁷ Ove wambata peka ombueti kuenje o linga layo olondimbukiso.

¹⁸ Noke Mose wa tiukila ku ndatembo yaye, Yetiro, wa popia laye hati, Ngenda, niukila ku vakuetu va li ve Egito, ha va kũlĩhisa nda va kasi lomuenyo. Yetiro wa popia la Mose hati, Kuenda lombembua.

¹⁹ Yehova yu wa popia la Mose vo Midiane hati, Kuende, tiukila ke Egito, omo alume vosi va sandele omuenyo wove va fa.

²⁰ Oco Mose wa enda lukãi waye lomãla, wa va endisila kocimbulu, wa tiukila kofeka ye Egito kuenje Mose wambata peka liaye ombueti ya Suku.

²¹ Yehova wa popia la Mose hati, Eci o tiukila ke Egito ka ivaluke oku lingila Fareo ovikomo viosi nda kapa peka liove. Ame puãi nda tĩlĩsa utima okuti ka tava oku eca omanu.

²² Love o popia la Fareo huti, Ca popia Yehova ceci, hati, Isareli omõlange, nuñulu yange,

²³ oco mopia love siti, Eci omõlange a ende, a mbumbile. Nda ove kua tavele oku weca, ota, njipa omõlove, nuñulu yove.

²⁴ Eci va pitila vocilombo apa va lala, oco Yehova wo tukulukila, wa sokele oku wipa.

²⁵ Kuenje Cipora wa yelula ewe, wa seva ociyuvuluila comõlaye, kuenje wa lamba laco kolomãi via Mose hati, Cilo wa ndinga ocili ohueli yosonde.

²⁶ Oco Suku wo popela. Ukãi yu wa linga hati, Wuhueli yosonde, omo wa seva evamba liaco.

²⁷ Yehova wa pañinya Arone hati, Kuende kekalasoko o ka ñualẽhẽla la Mose. Oco wa enda, wo sanga komunda ya Suku, kuenje wo sipula.

²⁸ Mose wa sapuila Arone olondaka viosi via Yehova vina o tuma lavio, lolondimbukiso viosi o kundika.

²⁹ Mose la Arone va enda, vongoluila pamuamue ovakulu vosi va va Isareli.

³⁰ Arone yu wa lombolola olondaka viosi Yehova a popia la Mose, wa linga olondimbukiso viaco kovaso omanu.

³¹ Omanu va tava. Leci va yeva ndomo a nyũla va Isareli, loku limbuka ohali yavo, oco va petama, va fendela.