ETUNDILO 39 - Embimbiliya - Bíblia Sagrada em Umbundu

¹ Lalinya onoloti la a vumbula la a kusuka va tunga lao uwalo wa fina woku vumbila omu mu kola kuenda uwalo u kola wa Arone va tunga; ndeci Yehova a handeleka Mose.

² Yu wa panga efonde lulu lalinya onoloti la a vumbula la a kusuka lovalatanya.

³ Va vandisa ulu ho pelevela, vo wonjolola alimi olosambo oku posuisa lao pokati kalinya onoloti la a vumbula la a kusuka kuenda ovalatanya, upange wuloño.

⁴ Efonde va li tungila apatahãlo kapepe, a litokeka; lia litokeka kolosungu viaco vivali.

⁵ Uvia wa vindiwa luloño, wa kala lalio woku itika, wa linga lalio cimosi, wa pangiwa ndeci va panga efonde, wulu lalinya onoloti la a vumbula la a kusuka lovalatanya; ndeci Yehova a handeleka Mose.

⁶ Va linga upange wotuvawe tuasardonika tua ñualiwa lovivela viulu, loku sokotola ndeci va sokotola osinete lolonduko viomãla va Isareli.

⁷ Wa tu kapa kapatahãlo efonde, ha tu lingi ovawe oku ivaluka omãla va Isareli; ndeci Yehova a handeleka Mose.

⁸ Wa tunga onjeke yoponete, upange wuloño, ndupange wefonde, lulu lalinya onoloti la a vumbula la a kusuka lovalatanya.

⁹ Ya kala lavindi akuãla a lisoka; va tunga onjeke yaco lombandihinyo; usõvi epaluma, upati epaluma lombandihinyo.

¹⁰ Va kapako ovilala vikuãla viotuvawe. Ulala wa sardiu, topasiu, karbunkulu, owo ulala watete;

¹¹ ulala wavali emeralda, safira, diamante;

¹² ulala watatu jasintu, agata, la ametisitia;

¹³ ulala wakuãla turkesa, sardonika la jaspe. Tua ñualiwa lovivela viulu oku pandekiwa lawo.

¹⁴ Ovawe a lisoka lolonduko viomãla va Isareli, ekui liovawe kovawe avali, ca soka lolonduko viavo; ndoku sokotola osinete, eli londuko yalio, eli londuko yalio, kapata aco ekuĩ la avali.

¹⁵ Va tongela konjeke yaco yoponete alienge ndovikolo a vindiwa lulu wa fina.

¹⁶ Va tunga ovivela vivali viulu lovinunga vivali viulu, va kapa ovinunga viaco vivali kolonẽle vivali vionjeke yoponete.

¹⁷ Alienge avali a vindiwa lulu va kapa vovinunga vivali kolonẽle vionjeke yoponete.

¹⁸ Olosungu vivali vikuavo vialinge avali a vindiwa va kapa kovivela viaco vivali, va vi kapa kapatahãlo efonde, konẽle yokovaso.

¹⁹ Va tunga ovinunga vivali viulu, va vi tongela kolonẽle vivali vionjeke yoponete, konele vi lisungue lonẽle yefonde yovokati.

²⁰ Va tunga ovinunga vivali viulu, va vi kapa kapatahãlo avali efonde, vemẽhi, konẽle yokovaso ocipepi lokutuihinya kuaco, kilu liuvia wefonde wa vindiwa luloño.

²¹ Va pandeka lukolo wonoloti onjeke yoponete lovinunga viaco kovinunga viefonde, ha yi litokeka luvia wefonde wa vindiwa luloño, okuti onjeke yoponete ka yi tundi kefonde; ndeci Yehova a handeleka Mose.

²² Wa tunga esanya liefonde, lia tutiwa onoloti lika,

²³ lepangu liesanya pokati kalio ndepangu liocinjena cutale, lombandeke ya ñualãpo epangu okuti ka li toka.

²⁴ Kowoyelo va tunga alumau lalinya onoloti la a vumbula la a kusuka, oku posila.

²⁵ Va tungavo olongenjo viulu wa fina, va kapa olongenjo pokati kalumau oku ñualisa owoyelo wesanya, pokati kalumau;

²⁶ ongenjo kolumau, ongenjo kolumau, oku ñualisa owoyelo wesanya, oku wala poku linga upange; ndeci Yehova a handeleka Mose.

²⁷ Va tongela Arone lomãla vaye ovikutu viovalatanya via tutiwa ca fina,

²⁸ lekofue liovalatanya, lovifuto via posoka viovalatanya, lovikasau viovalatanya,

²⁹ luvia wovalatanya lalinya onoloti la a vumbula la a kusuka, upange womesele yoku posuisa; ndeci Yehova a handeleka Mose.

³⁰ Va tela ulame wulu wa fina ho lingi ekolowa li kola, va tayako ocisonẽhua ndeci va sokotola osinete okuti OKU KOLA KU YEHOVA.

³¹ Va kutako ukolo wonoloti, oku pandekela kilu liekofue; ndeci Yehova a handeleka Mose.

³² Oco upange wosi wotavernakulu yombalaka yoku ñualẽhẽla la Yehova wa pua. Va Isareli va linga viosi Yehova a sapuila Mose; ovio muẽle va linga.

³³ Va nena otavernakulu ku Mose, ombalaka lovikuata viaco viosi; lakuatelo, avaya, olombala, olongunji, lalukuki;

³⁴ locisikĩlilo covipa violonupi va vi teka leci ci kusuka, locisikĩlĩlo covipa violonjundu, longumbo yoku vindikiya;

³⁵ ocikasia cuvangi lolomuangaluwa, lomangu yohenda;

³⁶ omesa lovikuata viaco viosi, lombolo yoku taliwa;

³⁷ ondiyelo yulu wa fina lolovela viayo, ovio olovela vioku aleka, lovikuata viaco viosi, lulela wolovela;

³⁸ utala wulu lulela woku waveka, linsensu vi pepa, lombindikiyo yokuvelo wombalaka;

³⁹ utala wosipi, owanda waco wosipi, olomuangaluwa, lovikuata viaco viosi, etasu lomangu yaco;

⁴⁰ olongumbo viocitali, olongunji, lalukuki, ombindikiyo yombundi yocitali, ovikolo lolombambo viaco lovikuata viosi viupange wotavernakulu, viombalaka yoku ñualẽhẽla la Yehova;

⁴¹ uwalo wa tungiwa ca fina woku vumbila omu mu kola, luwalo u kola wocitunda Arone, luwalo womãla vaye woku vumbila komangu yutunda.

⁴² Ndeci Yehova a handeleka Mose haico va Isareli va linga upange wosi.

⁴³ Mose yu wa mõla upange wosi kuenje tala, va ci linga; ndeci Yehova a lombolola haico va ci linga kuenje Mose yu wa va sivaya.