ETUNDILO 38 - Embimbiliya - Bíblia Sagrada em Umbundu

¹ Utala wovilumba vioku pia elisi wo tunga lositimi, usõvi ovikeya vitãlo, upati ovikeya vitãlo, avindi awo akuãla a lisoka; okulepa kilu ovikeya vitatu.

² Wa tunga olombinga kavindi aco akuãla; olombinga via linga laco uti umosi. Wo laña losipi.

³ Wa tunga ovikuata viosi viutala, olombia lolopa latasu lolongalufu loviyukilo viondalu. Ovikuata viosi wa vi tẽla losipi.

⁴ Wa tungila utala owanda wosipi wa kuata kemẽhi liopalatende ya ñuala utala, oku sulila pokati lakati.

⁵ Wa yenguluila asũsũ aco akuãla owanda osipi ovinunga vikuãla vioku tambula olomuangaluwa.

⁶ Wa pasa olomuangaluwa viositimi, wa vi laña losipi.

⁷ Wa pitisa olomuangaluwa kovinunga kolonẽle viutala ha va wambata, lavio. Wo tunga lavaya, vokati mua kala upulule.

⁸ Wa tunga etasu liosipi, lomangu yaco yosipi, lalumuĩlo akãi vongolokela ha va vumbila puvelo wombalaka yoku ñualẽhẽla la Yehova.

⁹ Wa tunga ocitali; konẽle yo Sul ya imba ovaso ko Sul olongumbo via kala viovalatanya, ocita covikeya.

¹⁰ Olongunji viaco akui avali lalukuki akuĩ avali osipi; olonjolo violongunji lolombala viaco viopalata.

¹¹ Konẽle yoko Norte ocita covikeya; olongunji akui avali lalukuki akuĩ avali, osipi; olonjolo violongunji lolombala viaco viopalata.

¹² Konẽle yutakelo kua kala olongumbo viakui atãlo kovikeya, olongunji ekui lalukuki ekui; olonjolo violongunji lolombala viaco viopalata.

¹³ Konẽle yutundilo ya imba ovaso kutundilo akuĩ atãlo kovikeya.

¹⁴ Ongumbo yonẽle yombundi ya kala ekui kovikeya kovikeya vitãlo; olongunji vitatu lalukuki atatu;

¹⁵ haico konẽle yikuavo; konẽle lonẽle yombundi yocitali kua kala ongumbo yekui kovikeya vitãlo; olongunji vitatu lalukuki atatu.

¹⁶ Olongumbo viosi viocitali via ñualãko via kala ovalatanya.

¹⁷ Otualukuki tuolongunji tua kala osipi; olonjolo violongunji lolombala viaco viopalata; oku laña kovitue viaco opalata; olongunji viosi viocitali via kala lolombala viopalata.

¹⁸ Ombindikiyo yombundi yocitali ya kala upange wukuakuposuisa olonanga, lalinya onoloti la a vumula la a kusuka lovalatanya; usõvi akui avali kovikeya, lokulepa kilu vupati waco ovikeya vitãlo, ca soka lolongumbo viocitali.

¹⁹ Olongunji viaco vikuãla lalukuki akuãla, osipi olonjolo viaco viopalata, lokulaña kuovitue lolombala viaco viopalata.

²⁰ Olombambo viosi viotavernakulu levi viocitali ca ñualako via kala osipi.

²¹ Oco via suapo ovikuata viotavernakulu, haiyo otavernakulu yuvangi ndeci via tendiwa, ndocihandeleko ca Mose, ha vi lingi upange wa va Lewi, peka lia Itamare omõla a arone, eye ocitunda.

²² Kuenje Becalele, omõla a Uri, omõla a Huru, kepata lia Yuda, wa tunga viosi Yehova a handeleka Mose.

²³ Kumosi laye kua kala Aholiava omõla a Ahisamaka, kepata lia Dani, omesele yoku songa kuenda yuloño, haeye ukuakuposuisa lalinya onoloti la a vumbula la a kusuka lovalatanya.

²⁴ Ulu wosi vo tiamisa kupange wosi wonjo yi kola, haiwo ulu wolombanjaile, wa kala akui avali kolotalendo kolotalendo ecea, lovita epanduvali kolosiekele kolosiekele akui atatu, ovio olosiekele vionambele.

²⁵ Opalata ya vakuahongele va tendiwa ya kala ocita colotalendo lohulukãi kovita epanduvali kakui epanduvali kolosiekele kolosiekele vitãlo, ovio olosiekele vionembele;

²⁶ omunu ombeka yimosi, omunu ombeka yimosi, oyo omeyu yosiekele haiyo osiekele yonembele, komanu vosi va sondolokela kokuava va tendiwa, ava va tẽla akui avali kanyamo kua supa, ovo ovita epandu kolohulũkãi kolohulũkãi vitatu vialume lalume ovita vitãlo lakui atãlo.

²⁷ Ocita caco colotalendo viopalata va vi tiamisa poku yengulula alukuki onjo yi kola la ongumbo yeyavailo; ocita kolotalendo mekonda liocita calukuki, otalendo yimosi olukuki lumosi.

²⁸ Ohulukãi kovita epanduvali kakui epanduvali kolosiekele kolosiekele vitãlo wa tunga lavio olonjolo violongunji, wa laña ovitue viavio, wa vi tungila olombala.

²⁹ Osipi yolombanjaile va tẽla akui epanduvali kolotalendo, olohulukãi vivali kovita vikuãla kolosiekele.

³⁰ Wa tunga layo olukuki uvelo wombalaka yoku ñualẽhẽla la Yehova, utala wosipi, lowanda waco wosipi lovikuata viosi viutala;

³¹ lalukuki ocitali ca ñualãpo lalukuki ombundi yocitali, lolombambo viosi viotavernakulu lolombambo viosi viocitali ca ñualãpo.