ETUNDILO 37 - Embimbiliya - Bíblia Sagrada em Umbundu

¹ Becalele yu wa tunga ocikasia loviti viositimi; usõvi waco ovikeya vivali komeyu, upati ukeya komeyu, okulepa kilu ukeya komeyu.

² Wa ci laña lulu vokati lo koñoño, wa ci tungila enimba liulu lia ñualãpo.

³ Wa ci yenguluila ovinunga vikuãla kolongonjo viaco vikuãla, konẽle ovinunga vivali, konẽle ovinunga vivali.

⁴ Wa pasa olomuangaluwa viositimi, wa vi laña lulu.

⁵ Wa pitisa olomuangaluwa viaco kovinunga viokolonele viocikasia, oku ambata ocikasia.

⁶ Wa tungavo omangu yohenda lulu wa fina; usõvi wayo ovikeya vivali komeyu, upati ukeya komeyu.

⁷ Wa telavo vakeruvi vavali viomangu yohenda,

⁸ ukeruvi umue konẽle, ukeruvi ukuavo konẽle yikuavo. Wa tela vakeruvi ocivela cimosi lomangu yohenda kolonẽle viaco vivali.

⁹ Vakeruvi va linga ndoku oluĩla kilu avava avo, va sikĩlĩla omangu yohenda lavava, loku limba ovaso ovipala; ovipala viavakeruvi via imba ovaso komangu yohenda.

¹⁰ Omesa wa tunga lositimi; usõvi wayo ovikeya vivali, upati ukeya, okulepa kilu ukeya komeyu.

¹¹ Wa yi laña lulu wa fina, wa yi tungila enimba liulu lioku ñualãpo.

¹² Wa yi tungila ocimbimbi ndupati weka oku ñualãpo; wa tunga enimba liulu oku ñualisa ocimbimbi caco.

¹³ Wa yi yenguluila ovinunga vikuãla viulu, wa kapa ovinunga kavindi akuãla a kala kolongonjo viaco vikuãla.

¹⁴ Ovinunga via kala ocipepi locimbimbi, omu va pitisa olomuangaluwa vioku ambata omesa.

¹⁵ Wa pasa olomuangaluwa viositimi vioku ambata omesa, wa vi laña lulu.

¹⁶ Wa tela ovikuata viukuakukala komesa, alonga aco, lolonguto latiyela lasanga va itaila lao, viulu wa fina.

¹⁷ Wa tunga ondiyelo lulu wa fina; ondiyelo yaco wa yi tela, omangu longunji; ovilindo viaco lapumbu lolonẽlẽho via kala layo ocivela cimosi.

¹⁸ Ya kala lovimanganjumba epandu via tunda kolonẽle viaco; ovimanganjumba vitatu viondiyelo konẽli, ovimanganjumba vitatu viondiyelo konẽli.

¹⁹ Otuvilindo tutatu tua lisoka ndonẽlẽho yumendoeira kocimanganjumba cimosi, epumbu liaco lonẽlẽho; otuvilindo tutatu tuonẽlẽho yumendoeira kocimanganjumba cikuavo, epumbu liaco lonẽlẽho: haico kovimanganjumba viaco epandu via tunda kondiyelo.

²⁰ Vondiyelo mua kala ovilindo vikuãla vionẽlẽho yumendoeira, apumbu aco lolonẽlẽho;

²¹ lepumbu kombuelo yovimanganjumba vivali, viosi ocivela cimosi, epumbu kombuelo yovimanganjumba vivali, viosi ocivela cimosi, kovimanganjumba viaco epandu vi tunda kondiyelo.

²² Apumbu lovimanganjumba via linga laco ocivela cimosi. Cosi muẽle cimosi culu wa fina va ci tela.

²³ Wa tunga olovela viaco epanduvali, lotuayola, lotualonga tuovinene, ulu wa fina.

²⁴ Wa yi tunga lotalendo yulu wa fina, oyo lovikuata viaco viosi.

²⁵ Wa tunga utala winsensu loviti viositimi, usõvi ukeya, upati ukeya, avindi akuãla a lisoka, okulepa kilu ovikeya vivali. Olombinga viaco via linga lawo uti umosi.

²⁶ Wo laña lulu wa fina, kilu lokolonẽle viosi lokolombinga. Wo tungila enimba liulu lioku ñualãpo.

²⁷ Leye wo tungila ovinunga vivali viulu vemehi lienimba kolomati vivali viokolonẽle vivali, mu kala olomuangaluwa vioku wambata.

²⁸ Wa pasa olomuangaluwa viositimi, wa vi laña lulu.

²⁹ Wa tenga ulela u kola woku waveka, linsensu via fina violosimbolua vi pepa, luloño wukuakutenga olonguendu.