ETUNDILO 35 - Embimbiliya - Bíblia Sagrada em Umbundu

¹ Mose wongolola owiñi wosi wa va Isareli. Wa popia lavo hati, Ovina Yehova a sapuila okuti ovio vu linga vievi.

² Upange u lingaiwa oloneke epandu. Puãi eteke liepanduvali li linga esambata liowusa wefendelo lia Yehova. Wosi o lingamo upange ipaiwa.

³ Ka ci tava oku siakãla ondalu volonjo viene keteke liesambata.

⁴ Mose wa sapuila owiñi wosi wa va Isareli hati, Eci ca tuma Yehova okuti ci lingiwa ceci, hati,

⁵ Kongoli olombanjaile via Yehova. U o kasi lutima woku eca a nene ku yehova ombanjaile: ulu, opalata, osipi,

⁶ alinya onoloti la a vumbula la a kusuka, lovalatanya, lovonya olohombo,

⁷ ovipa violonupi via tekua leci ci kusuka, ovipa violonjundu, oviti viositimi,

⁸ ulela wolovela, olosimbolua viulela woku waveka, levi vinsensu vi pepa;

⁹ otuvawe tuasardonika lotuvawe tuolomota tuefonde lotu tuonjeke yoponete.

¹⁰ Oco olomesele viosi pokati kene viye, vi tunge viosi Yehova a handeleka; okuti

¹¹ otavernakulu, ombalaka yayo, ocisikililo cayo, akuatelo ayo, lavaya ayo, olombala viayo, olonungi viaye, otulukuki tuayo tua sokuiwa;

¹² ocikasia caco lolomuangaluwa, omangu yohenda longumbo yoku vindikiya;

¹³ omesa lolomuangaluwa lovikuata viayo viosi lombolo yoku taliwa;

¹⁴ ondiyelo layovo yeca ocinyi lovikuata viaye, lolovela viayo lulela wolovela;

¹⁵ utala winsensu, lolomuangaluwa viawo, lulela woku waveka, linsensu vi pepa lonanga yoku vindikiya uvelo, kuvelo wotavernakulu;

¹⁶ utala wocilumba coku pia elisi, owanda wawo wosipi, olomuangaluwa viawo lovikuata viawo viosi, etasu lomangu yalio

¹⁷ olongumbo viocitali, olongunji viavio lotualukuki tuavio tua sokuiwa, lonanga yoku vindikiya ombundi yocitali;

¹⁸ olombambo viotavernakulu lolombambo viocitali lovikolo viavio;

¹⁹ uwalo wa tungiwa ca fina woku vumbila omu mu kola, uwalo u kola wa Arone eye ocitunda, luwalo womãla vaye woku vumbila komangu yutunda.

²⁰ Oco owiñi wosi wa va Isareli wa tunda ku Mose.

²¹ Veya, wosi okuti utima waye wo vetiya, lu espiritu liaye lio kapisa ocipango caco, va nena ombanjaile ya Yehova yupange wombalaka yoku ñualẽhẽla la yehova, levi viefendelo liaco, levi viuwalo u kola.

²² Kuenje veya, lalume lakãi, vosi va kala lutima waco, va nena olofunete lovingẽlengẽle lolonẽla lovinunga, viosi viulu; alume vosi va nena ku Yehova ombanjaile yulu.

²³ Alume vosi va kala lalinya onoloti la a vumbula la a kusuka lovalatanya, lovonya olohombo, lovipa violonupi via tekua leci ci kusuka, lovipa violonjundu, va vi nena.

²⁴ Vosi va eca ocilumba copalata leci cosipi va nena ombanjaile ya Yehova; alume vosi va kala luti wositimi wa posokela upange waco vo nena.

²⁵ Akãi vosi olonoño vakuakupota lovaka avo va nena evi va vi pota, alinya onoloti, la a vumbula la a kusuka, lovalatanya.

²⁶ Akãi vosi ovitima viavo via pinduka lolondunge va pota ovonya olohombo.

²⁷ Akulu va nena otuvawe tuasardonika lotuvawe tuolomota tuefonde lotu tuonjeke yoponete,

²⁸ lolosimbolua lulela, u wolovela, levi viulela woku waveka levi vinsensu vi pepa.

²⁹ Va Isareli va nena olombanjaile via Yehova via lumbiwa locipango, okuti alume vosi lakãi vosi ovitima viavo via va pangisa ovio muẽle oku eca kupange Yehova a handeleka oku lingiwa la Mose.

³⁰ Mose yu wa popia la va Isareli hati, Tala, Yehova wa tukula Becalele londuko, omõla a Uri omõla a Huru, kapata lia Yuda.

³¹ Wo yukisa espiritu lia Suku lio tiamisa kolondunge, lelimbuko, lukũlĩhiso, luloño wosi,

³² loku sovola evi viuloño, poku talavaya lulu lopalata losipi,

³³ lo poku songa otuvawe tuoku sokeka ovivela, loku songa oviti, oku linga upange wosi wuloño.

³⁴ Wo kapisa utima woku longisa, leye la Aholiava, omõla a Ahisamaka, kepata lia Dani.

³⁵ Wa va muisa ovitima violondunge ha va talavaya ovopange osi umesele, u woku songa, lu wuloño, lu wokuposuisa olonanga lalinya onoloti la a vumbula la a kusuka, lovalatanya, lu woku tuta, ovopange umesele wosi, la omanu vakuakusovola evi viuloño.