ETUNDILO 34 - Embimbiliya - Bíblia Sagrada em Umbundu

¹ Yehova wa popia la Mose hati, Pasa ovitale vivali viovawe via lisoka levi viatete, lame sonẽha kovitale viaco olondaka via kaile kovitale viatete vina wa sasõla.

² Omẽle mãlẽha. Omẽle lamanela komunda Sinai. Litukuluila kokuange kilu liomunda.

³ Lomunu ka ka lamane love. Vomunda yosi ka mu ka muiwe umue. Oviunda violomeme levi violongombe ka vi ka lile ocipepi lomunda yaco.

⁴ Oco Mose wa pasa ovitale vivali viovawe via lisoka levi viatete. Wa pasuka omẽle ociteketeke, wa lamanẽla komunda Sinai ndomo Yehova o sapuila. Wa ambata peka ovitale vivali viovawe.

⁵ Yehova yu wa lokila velende, wa talama kumue laye, wa tukula onduko ya Yehova.

⁶ Yehova wa vinjuka kovaso yaye, wa imba ondaka hati, Yehova, Yehova Suku yohenda, ukuacali, ukuakulivala konyeño, ukuacisola calua haeye ukuacili,

⁷ ukuakumuisa kolohulukãi viomanu ocisola ka ci pui. Ukuakuecela olongole levĩho kuenda akandu, kuenje ka yovuisa ukueko. O fetuluinya ongole yavaisia komãla vavo, lokomãla vomãla vavo, kocitumbulukila catatu leci cakuãla.

⁸ Mose wa yayulako, wa petamẽla posi kuenje wa fendela.

⁹ Wa linga hati, Kaliye, a Ñala, nda ñasi ciwa love, enda letu, ndaño omanu ava va huka. Tu ecele ongole yetu lekandu lietu. Tu tambule ndocipiñalo cove.

¹⁰ Oco Yehova wa linga hati, Tala! Ndi lisila ocisila. Ndinga ovikomo komanu vove vosi, okuti via lisoka lavio ka via la lingiwila kilu lieve liosi, ndaño kofeka yimue. Omanu vosi o kasi lavo va mõla ovilinga via Yehova. Momo eci ndinga love ci lingisa cimue usumba.

¹¹ A Isareli! Patekela eci hu sapuila etaili. Tala, ndi hangisa kovaso yove va Amori la va Kanana la va Hiti, kuenda va Perisi la va Hiwi la va Yevusi.

¹² Lunguka sanga o lisila ocisila lolonungi viofeka oko wenda, kuenje ci ku lingila ndonjanjo.

¹³ Wu nyõla ovotala avo loku teya olongunji viavo viovawe. Wu timbulavo oviti viavo vi kola,

¹⁴ momo ka ci tava oku fendela osuku yimue yiñi, omo Yehova, onduko yaye ukuesepa, eye Suku o kasi lesepa,

¹⁵ sanga o lisila ocisila lolonungi viofeka, kuenje eci va linga ukahonga lolosuku viavo, loku lumba ovilumba kolosuku viavo, kuenje va ku laleka, ove wenda, o lia kocilumba cavo,

¹⁶ kuenje o kuelisa omãla vove valume lomãla vavo vakãi, lomãla vavo vakãi poku linga ukahonga lolosuku viavo, va tiamisa omãla vove valume koku linga ukahonga lolosuku viavo.

¹⁷ Ka ci tava oku litungila olosuku viutale wa yenguluiwa.

¹⁸ O lialia ofesta yolombolo ka vi kuete etumbisa. Oloneke epanduvali vina via tukuiwa vosãi ya Aviva o lia olombolo ka vi kuete etumbisa ndeci nda ku sapuila. Omo vosãi ya Aviva wa tunda ve Egito.

¹⁹ Cosi ci penda onjila okuti oco tete vimo, nda culume, ci linga cange, ci kale olonuñulu violongombe, ci kale olonuñulu violomeme.

²⁰ Onuñulu yocimbulu o yi yovola lomeme. Nda kua pangele oku yi yovola o yi teya osingo. Olonuñulu viosi viomãla vove alume o vi yovola. Ka ci tava oku iya kokuange upolokoso.

²¹ Oloneke epandu o linga upange puãi eteke liepanduvali o puyuka, ci kale otembo yoku senda, ci kale otembo yoku ungula, cosi ño o puyuka.

²² O lia ofesta yolosemana, yokuti yotiliku yunguiwa tete. O liavo ofesta yoku lombola kefulilo liulima.

²³ Kunyamo alume vosi veya lutatu ku Ñala Yehova, Suku ya Isareli.

²⁴ Momo ndi hangisa olofeka kovaso yove, loku amisa olongave viove, Kuenda vali lomue omunu o kuatela usenge wove ocipululu nda ove o lamayana hu tukulukila ku Yehova Suku yove, kunyamo lutatu.

²⁵ Ku lumbi osonde yocilumba cange pamosi lombolo yi kuete etumbisa. Ka ci tava oku sia ocilumba cofesta yo Pascoa toke komẽle.

²⁶ Ovaima atete a tunda kovapia ove o a nena konjo ya Yehova suku yove. Ka ci tava oku teleka okahombo vasenjele a inako.

²⁷ Yehova wa popia la Mose hati, Sonẽha olondaka evi. Olondaka evi ovio nda lisila love la va Isareli.

²⁸ Wa kalako la Yehova akui akuãla kovotanya lakui akuãla kovoteke. Ka lile ombolo, ka nyuila ovava. Kuenje wa sonẽha kovitale olondaka viovisila haivio ovihandeleko ekui.

²⁹ Eci Mose a loka komunda Sinai lovitale vivali viuvangi peka, ka kũlĩhile okuti osimbu a kala loku loka ocipala caye ca nina omo a kala loku vangula la Suku.

³⁰ Eci Arone la va Isareli vosi va mõla Mose, ocipala caye ca kala loku nina. Va kala lusumba oku iya ocipepi laye.

³¹ Puãi Mose wa va kovonga. Oco Arone lakulu vosi va va Isareli veya kokuaye, kuenje Mose wa vangula lavo.

³² Noke va Isareli vosi veya ocipepi, kuenje eye wa va sapuila ovihandeleko viosi Yehova o sapuila vomunda Sinai.

³³ Eci Mose a mãla oku vangula lavo, wa vuvika ocipala.

³⁴ Puãi Mose, nda iñila oku vangula la yehova, o sikulũla ocipala toke wa tundamo. Eci a tundamo loku sapuila va Isareli eci a handelekua,

³⁵ va Isareli va mõla ocipala ca Mose okuti ca nina. Mose yu wa vuvika vali ocipala caye toke a iñila vali oku vangula laye.