ETUNDILO 32 - Embimbiliya - Bíblia Sagrada em Umbundu

¹ Eci omanu va limbuka okuti poku tunda komunda Mose wa cilua, oco omanu va liongoluila ku Arone, va popia laye vati, Votoka. Tu tungile olosuku vi tu pitaile kovaso yetu. Momo omunu waco Mose wa tu tundisa vofeka ye Egito, ka tua kũlĩhĩle eci cu kuete.

² Arone yu wa popia lavo hati, Upi ovingẽlengẽle viulu vi li kovatui akãi vene lomãla vene valume lomãla vene vakãi. Vi neneli.

³ Oco omanu vosi vopa ovingẽlengẽle viulu via kala kovatui avo. Va vi nena ku Arone.

⁴ Eye wa tambula ulu waco povaka avo, wo songa locivela kuenje wa tunga ociñumañuma congombe. Oco hati, A Isareli, suku yove wa ku upa vofeka ye Egito, yu.

⁵ Eci Arone a ci mõla, wa ci tungila utala. Arone wa imba oluiya, hati, Hẽla ku kala ofesta ya Yehova.

⁶ Oco hẽla va pasuka ociteketeke, va lumba ovilumba vioku pia elisi, va nena ovilumba viombembua, kuenje omanu va tumãla loku lia loku nyua. Va votoka oku piluka.

⁷ Oco Yehova wa sapuila Mose, hati, Kuende. Loka, momo omanu vove wopa vofeka ye Egito va livĩhĩsa.

⁸ Va pambuka lombili vonjila nda va lekisa oku endelamo. Va litungila ociñumañuma congombe. Va ci fendela. Va ci lumbila, vati, A Isareli, suku yove wa ku upa vofeka ye Egito yu.

⁹ Kuenje Yehova wa popia la Mose hati, Nda mõla omanu vaco okuti va huka muẽle ocili.

¹⁰ Oco handi ci kale peka liange okuti onyeño yange yi va wengukile. Ndi va nyõla. Ove puãi hu lingisa ofeka yinene.

¹¹ Puãi Mose wa livondela la Yehova, Suku yaye, hati, A Yehova, onyeño yove yi wengukilila nye omanu vove wopa vofeka ye Egito lolohõlo via lua leka lia pama?

¹² Va Egito hẽ va popela nye vati, Wa vopila oku va yambula okuti o va ipailela kolomunda, oku va kundula kilu lieve? Onyeño yove eyi ya kãla enene yi liweke. Uvi u wa sokoluila omanu vove, litiulamo.

¹³ Ivaluka akuenje vove Avirahama, la Isake kuenda Isareli, vana wa lisila lavo londuko yove yi kola. Wa popia lavo huti, Nduisa ombuto yene ndolombungululu viokilu. Ngeca ofeka yilo yosi kombuto yene ndeci nda likuminya. Va yi piñala otembo ka yi pui.

¹⁴ Kuenje Yehova wa litiulamo kuvi una a simile oku linga omanu vaye.

¹⁵ Oco Mose wa ñualapo, wa loka komunda. Wambata peka ovawe avali ovihandeleko. Ovawe aco a sonẽhĩwa kolonẽle vivali, onẽle lonẽle ya sonẽhĩwa.

¹⁶ Ovawe aco upange wa Suku. Lokusonẽha kuaco okusonẽha kua Suku kua tãliwa vovawe.

¹⁷ Eci Yehosua a yeva onjuela yomanu va kaluka wa popia la Mose hati, Kocilombo kuli onjuela yovita.

¹⁸ Eye hati, Handakako yava va kalukila oku yula; handakako yava va liyula omo va yuliwa. Ondaka njevite ondaka yava va imba ovisungo.

¹⁹ Tuli eya ocipepi locilombo kuenje wa mõla ongombe, lomo va kasi loku piluka, oco onyeño ya Mose ya wenguka. Wa kupula ovawe a kala povaka, wa a sasõwaila vepato liomunda.

²⁰ Wa nyañula ongombe va tunga, wa yi yoka londalu, wa yi keleketa ndosema, osema yaco wa yi waya kovava, wa nyuisako va Isareli.

²¹ Mose wa popia la Arone hati, Omanu hẽ nye va ku linga okuti wa va tiamisa kekandu eli linene?

²² Arone wa kumbulula hati, Onyeño ya cime cange ka yi ka wenguke. Ove wa kũlĩha omanu vaco okuti va puiya enene.

²³ Va vangula lame vati, Tu tungile olosuku vi tu songuila. Mose una wa tu upa vofeka ye Egito, eci co sanga ka tu ci.

²⁴ Ame nda va sapuila siti, O kuete ulu o wupe. Oco vo nyiha, lame nda wimba vondalu, kuenje mua tunda ongombe eyi.

²⁵ Eci Mose a mõla okuti omanu va lundukila kehungu momo Arone wa va lunduisa kuenje va pembuiwa pokati kovanyali vavo,

²⁶ oco Mose wa talama kepandavelo liocilombo hati, U wa tiamẽla ku Yehova helie? Eye kokuange. Oco omãla valume vosi va Lewi vongolokela kokuaye.

²⁷ Eye wa popia lavo hati, Ca popia Yehova, Suku ya Isareli, ceci, hati, Omunu omunu a malẽhe osipata yaye kocikalo. A ñuale ñuale vocilombo tunde kepandavelo toke kepandavelo. A ipaye, ci kale manjaye, ci kale u a lisungue laye.

²⁸ Kuenje va Lewi va linga ndondaka ya Mose. Oco eteke liaco kua ipaiwa omanu ca soka huti ño olohulukãi vitatu vialume.

²⁹ Mose yu wa linga hati, Etaili wa litumbiki kupange wa Yehova. Co peselisi, umue omõlaye, umue manjaye. Puãi wa ci lingi okuti Yehova o vu sumuluĩsa etaili.

³⁰ Hẽla liaco Mose wa popia lomanu hati, Wa lingi ekandu linene. Oco cilo namanẽla ku Yehova. Mbi ci ka tava okuti ame ndu livondeleli ekandu liene.

³¹ Mose wa tiukila ku yehova. Wa popia laye hati, Omanu ava va linga ekandu linene, va litungila olosuku viulu.

³² Kaliye puãi nda o tava, ecela ekandu liavo. Nda ku tava, lamevo nyõle velivulu liove wa sonẽha.

³³ Yehova puãi wa popia la Mose hati, Wosi wa ndingila ekandu eye muẽle nyõla velivulu liange.

³⁴ Ove puãi kuende, ka songuile omanu oku nda ku tukuila. Ungelo wange o ku pitila kovaso. Haimo lumue eteke ndi va nyũla ndi va fetuluinya ekandu liavo.

³⁵ Kuenje Yehova wa yambula omanu vaco omo va tunga ongombe Arone a tungisa.