ETUNDILO 31 - Embimbiliya - Bíblia Sagrada em Umbundu

¹ Yehova yu wa popia la Mose hati,

² Tala, Becalele ndo tukula onduko, eye omõla a Uri, omõla a Huru, kepata lia Yuda.

³ Ndo yukisa Espiritu lia Suku ha lingi ukualondunge, wa lunguka, ukuakukulĩha, onoño yovoloño osi,

⁴ oku panga ovikuata viuloño, ha talavaya lulu, lopalata, losipi,

⁵ loku songa ovawe oku sokeka vivela, loku songa oviti, loku talavaya ovomesele osi.

⁶ Tala, nda tukula kumuamue laye Aholiava, omõla a Ahisamaka, kepata lia Dani. Vovitima via vakualondunge vosi nda kapa olondunge ha va lingi cosi nda ku sapuila okuti

⁷ ombalaka yoku ñualẽhẽla la Yehova, locikasia covisila, lomangu yohenda yi li kilu liaco, lovikuata viosi viombalaka,

⁸ lomesa lovikuata viaco, londiyelo ya fina lovikuata viaco viosi, lutala winsensu,

⁹ lutala wocilumba coku pia elisi lovikuata viaco viosi, letasu lomangu yaco,

¹⁰ luwalo wa tungiwa ca fina, luwalo u kola wocitunda Arone luwalo womãla vaye, woku vumbila komangu yutunda,

¹¹ lulela woku waveka, linsensu violosimbolua vi pepa viomu mu kola. Va ci linge cosi ndeci nda ku sapuila.

¹² Yehova yu wa popia la Mose hati,

¹³ Popia la va Isareli huti, Lavi asambata ange, momo o-o ondimbukiso pokati kange lene yenda ño kovitumbulukila viene, ho limbuka okuti ame ndi Yehova ndukuaku u kolisi.

¹⁴ Wu kolisa esambata momo li kola kokuene. Wosi o li lavisa ipaiwa, u o lingamo upange, omunu waco o tepiwa ku vakuavo.

¹⁵ Upange u lingiwa oloneke epandu, puãi eteke liepanduvali olio esambata liowusa wefendelo, li kola ku Yehova. U o linga upange keteke liesambata ipaiwa muẽle.

¹⁶ Omo va Isareli va lava esambata ha va li kolisa kovitumbulukila viavo viosi, ndocisila ka ci pui.

¹⁷ Olio ondimbukiso pokati kange la va Isareli otembo ka yi pui. Omo oloneke epandu Yehova wa lulika ilu longongo, kuenje eteke liepanduvali wa puyuka, yu wa kavuluka.

¹⁸ Eci Yehova a mãla oku vangula laye kilu liomunda Sinai, wa eca ku Mose ovawe avali ovisila, a sonẽhĩwa lomuine wa Suku.