ETUNDILO 30 - Embimbiliya - Bíblia Sagrada em Umbundu

¹ O tunga utala woku yokela insensu. U tunga lositimi.

² Usõvi ukeya, upati ukeya, avindi aco akuãla a lisoke, okulepa kilu ovikeya vivali. Olombinga viaco vi litokeka lawo uti umosi.

³ O u laña lulu wa fina, kilu liaco lokolonẽle viosi lokolombinga. U tungila enimba liulu li ñualãko.

⁴ U tungila ovinunga vivali viulu vemehi lienimba; volomati viaco vivali, kolonẽle vivali, oco vi tunga; vi linga ovinunga violomuangaluwa oku ambata lavio.

⁵ O tunga olomuangaluwa viositimi hu vi laña lulu.

⁶ U tumbika kovaso yongumbo yi lisungue locikasia covisila, kovaso yomangu yohenda yi li kilu liocikasia covisila oku ndi ñualẽhẽla love.

⁷ Arone o yokailako insensu violosimbolua vi pepa. Omẽle omẽle, eci a sokiya olovela, oco o vi yoka.

⁸ Oñolosi, eci Arone o miha olovela, o vi yokavo. Insensu viaco kovaso a Yehova vi enda ño hũ kovitumbulukila viene.

⁹ Ko ka lumbiliko insensu viñi, ndaño ocilumba coku pia elisi pamue ocilumba cosema. Ko ka itiliko ocilumba coku nyua.

¹⁰ Arone unyamo onjanja yimuamue o likutilila kolombinga viawo. Kumosi losonde yocilumba cekandu coku tuvika o likutililako onjanja yimosi kunyamo kovitumbulukila viene viosi. U kola cimue ku Yehova.

¹¹ Yehova yu wa popia la Mose hati,

¹² Eci o tenda va Isareli, ndeci va tenda tenda, oco va ece omunu omunu ku Yehova eci a yovola laco omuenyo waye eci o va tenda, okuti pokati kavo ka peya efengi eci va tendiwa.

¹³ Eci ceca omunu wosi o tendiwa ceci, omeyu yosiekele yolombongo vionembele. Osiekele ya soka lakui avali kolongera. Omeyu yosiekele ocilumba coku Yehova.

¹⁴ Vosi va tendiwa, ava va tẽla akui avali kanyamo kua supa, va ece ocilumba ca Yehova.

¹⁵ Olohuasi ka vi vokinya lolosuke ka vi tepulula komeyu yaco yosiekele eci va eca ocilumba ca Yehova coku tuvika ho likutilila ovimuenyo viene.

¹⁶ O tambula ku va Isareli olombongo vioku tuvika, o vi tiamisa kefendelo liombalaka yoku ñualẽhẽla la yehova ha vi lingi ndonjivaluko ku va Isareli kovaso a Yehova, oku likutilila ovimuenyo viene.

¹⁷ Yehova yu wa popia la Mose hati,

¹⁸ O tela etasu liosipi, o tela omangu yaco yosipi omu vu pusaila. O li kapa pokati kombalaka yoku ñualẽhẽla la Yehova lutala, kuenje o kapamo ovava.

¹⁹ Arone lomãla vaye omo va pusaila ovaka avo lolomãi.

²⁰ Nda va iñila vombalaka yoku ñualẽhẽla la Yehova va puse lovava sanga va fa, pamue nda va kokela kutala oku linga upange, oku yoka ocilumba covondalu ku Yehova.

²¹ Oco va puse ovaka avo lolomãi sanga va fa; ci linga ocisila cavo cenda hũ, eci caye leci combuto yaye kovitumbulukila viavo viosi.

²² Yehova yu wa popia vali la Mose hati,

²³ Nyañula olosimbolua evi via velapo, omira ya fina ovita vitãlo violosiekele, okanela omeyu yaco, ndokuti ovita vivali kakui atãlo, kuenda kalamu ovita vivali kakui atãlo,

²⁴ okasia ovita vitãlo violosiekele vionembele, lulela wasetona ohine yawo.

²⁵ O vi tenga ha vi lingi ulela u kola woku waveka, onguendu yi tengiwa luloño wukuakutenga olonguendu; u linga ulela u kola woku waveka.

²⁶ O waveka lawo ombalaka yoku ñualẽhẽla la Yehova, locikasia covisila,

²⁷ lomesa lovikuata viaco viosi, londiyelo lovikuata viaco, lutala winsensu,

²⁸ lutala wocilumba coku pia elisi lovikuata viaco viosi, letasu lomangu yaco.

²⁹ O vi kolisa ha vi koli ca piãla. Cosi ci vi lamba lacovo ci kola.

³⁰ O waveka Arone lomãla vaye, o va kolisa ha va mbumbila komangu yutunda.

³¹ Popia la va Isareli huti, Ulela u u linga ulela wange u kola woku waveka kovitumbulukila viene viosi.

³² Ka witiliwa ketimba liomunu waño. Ka ci tava oku tunga ukuavo wa lisoka lawo. U kola. Kokuene u kola.

³³ U o tunga eci ca soka lawo, lu o waveka lawo omunu waño, o tepiwa ku vakuavo.

³⁴ Yehova yu wa popia la Mose hati, Nyañula olosimbolua vi pepa, ovio ostakate, omika, la gaibano, ovio olosimbolua vi pepa kumosi linsensu via fina. Opesu yavio yi kala yimosi.

³⁵ O tengulula lavio insensu vielemba liwa, luloño wukuakutenga olonguendu, via simbuiwa, via fina, vi kola.

³⁶ Oco o kungala vimue ciwa, o vi kapa kovaso yocikasia covisila vombalaka yoku ñualẽhẽla la yehova, oku ndi ñualẽhela love. Vi kolisa cimue.

³⁷ Insensu o tenga ndoco ko ka vi litengeli ene muẽle ndoseteko yaco; vi kolisila Yehova.

³⁸ U o tenga vimue via lisoka lavio ha vi lehũla, o tepiwa ku vakuavo.