ETUNDILO 3 - Embimbiliya - Bíblia Sagrada em Umbundu

¹ Mose wa kala kupange woku lisa olomeme via Yetiro, ndatembo yaye, haeye ocitunda ca Midiane. Eteke limue wa enda lolomeme kutakelo wekalasoko, wa pitila ko Horeve komunda ya Suku.

² Ungelo wa Yehova wo tukulukila vulienge wondalu vocisapa. Eye wa vanjako, kuenje wa mõla ocisapa ci taima londalu puãi ka ci pi.

³ Mose wa linga hati, Mambukilapo handi ha tala owima u unene oco ñulĩhise ndeci ocisapa ka ci pila.

⁴ Eci Yehova a mõla okuti wa pambukilapo oku tala, oco Suku wo kovongela vocisapa hati, A Mose, a Mose. Eye wa linga hati, Amilo.

⁵ Suku yu wa popia hati, Ku ka pitile kulo. Lula olohaku kolomãi viove, omo apa o tãi pa kola.

⁶ Wa popia vali hati, Ame ndi Suku yaso, haime ndi Suku ya Avirahama la Isake kuenda Yakoba. Mose wa lisitika kocipala omo oku tala Suku co linga usumba.

⁷ Yehova wa popia hati, Nda mõla ohali yomanu vange va kasi ve Egito. Nda yeva ndeci va lilila asongui vavo vupange, nda kulĩha olohali viavo.

⁸ Ndeya oku va popela peka lia va Egito si vopi vofeka yaco ha va endi kofeka yiwa yinene, kofeka yi tumõha asenjele lowiki, kofeka ya va Kanana, la va Hiti, la va Amori, kuenda va Perisi, la va Hiwi, la va Yevusi.

⁹ Cilo okuliyula kua va Isareli kua njevala. Nda molavo otokua va Egito va va yambula layo.

¹⁰ Oco linga ha tume ku Fareo, o kope omanu vange va Isareli va kasi ve Egito.

¹¹ Mose puãi wa pula Suku hati, Ame hẽ elie okuti ngenda ku Fareo si kopa va Isareli ve Egito?

¹² Suku wo kumbulula hati, Puãi ame ñala love, kuenje ondimbukiso yokuti ame muẽle nda ku tuma yeyi: pana okuti wopale omanu vaco ve Egito o fendela Suku komunda yilo.

¹³ Mose wa pula Suku hati, Nda mitila ku va Isareli kuenje mopia lavo siti, Suku yolosekulu viene wa numa kokuene, lovo va mula vati, Onduko yaye elie? mopia lavo nye?

¹⁴ Suku wa kumbulula Mose hati, AME MUELE AME; kuenda vali hati, Popia la va Isareli huti, Una wa liluka hati, AME MUELE AME eye wa numa kokuene.

¹⁵ Suku wa popia vali la Mose hati, Sapuilavo va Isareli, huti, Yehova, Suku yolosekulu viene, haeye Suku ya Avirahama la Isake kuenda Yakoba, eye wa numa kokuene. Onduko yaco oyo yi linga onduko yange otembo ka yi pui, haiyo ovitumbulukila viosi vi njivalukila.

¹⁶ Kuenda, kongoluile pamosi ovakulu va Isareli, popia lavo huti, Yehova, Suku yolosekulu viene haeye Suku ya Avirahama la Isake kuenda Yakoba wa nukulukila hati, Ocili ndo nyuli, nda mõla evi vo lingaingi ve Egito,

¹⁷ yu nda linga siti, Ndu wupi kohali yoko Egito, ndu tuali kofeka ya va Kanana la va Hiti, la va Amori, kuenda va Perisi, la va Hiwi, la va Yevusi, kofeka yi tumõha asenjele lowiki.

¹⁸ Kuenje va yeva ondaka yove, love lovakulu va Isareli vu pitila ku Soma ye Egito, vu popia laye hoti, Yehova, Suku ya va Heveru, wa tu sanga. Oco cilo tua pinga kokuove, tu ece oco tu ende atulo atatu ha tu lumbila Yehova Suku yetu ovilumba vekalasoko.

¹⁹ Ndi ci cokuti Soma ye Egito ka tava oku weci te nda o silĩhiwa longusu ya lua.

²⁰ Oco ame ngolõla eka liange, mbetisa Egito ovikomo viange viosi ndingamo, oco noke o weci.

²¹ Omanu ava ndi va muĩsa ocame ku va Egito okuti eci wendi ka wendi ovoko.

²² Akãi vosi va lomba evi vioku liposuisa lavio viopalata lulu. Va vi lomba lava va kasi lavo volonjo viavo. Va lombavo uwalo. Va vi walisa omãla vene valume lomãla vene vakãi kuenje ci linga ndoku punda va Egito.