ETUNDILO 29 - Embimbiliya - Bíblia Sagrada em Umbundu

¹ Eci o linga lavo oku va kolisa ha va mbumbila komangu yutunda ceci: o nyañula onale lovitupi violomeme vivali ka vi kuete etondelo,

² lolombolo ka vi kuete etumbisa, lakende ka a kuete etumbisa a tengiwa lulela, lakende a pelevala ka a kuete etumbisa va a waveka lulela; o vi tunga losema ya fina yotiliku.

³ O vi kapa vuhamba umosi loku vi nena vuhamba waco, kumuamue lonui yaco lovitupi vivali violomeme.

⁴ Arone lomãla vaye o va nena puvelo wombalaka yoku ñualẽhẽla la Yehova, o va sukula lovava.

⁵ O yelula uwalo, o walisa Arone ocikutu lesanya liefonde, lefonde, lonjeke yoponete o witika luvia wefonde wa vindiwa luloño.

⁶ O walisa ekofue kutue waye, loku kapa ekolowa li kola kekofue liaco.

⁷ Oco o yelula ulela woku waveka hu witika kutue waye hu waveka.

⁸ O nena omãla vaye hu va walisa ovikutu.

⁹ O va itika lovivia, Arone lomãla vaye, o va futisa lovifuto, kuenje va kala lomangu yutunda locisila ka ci pui. Oco o va iha ocikundi ovo Arone lomãla vaye.

¹⁰ O nena onui kovaso yombalaka yoku ñualẽhẽla la Yehova. Arone lomãla vaye va kapa ovaka avo kutue wonale.

¹¹ Wipaila onui kovaso a Yehova kepito liombalaka yoku ñualẽhẽla la Yehova.

¹² O nyañula kamue kosonde yonui, o yi kapa lomuine wove kolombinga vitutala; kuenje osonde yosi o yitila kosi yutala.

¹³ O yelula ulela wosi wa sitika kovãla, londeki yi li kilu liomuma, lolongẽla vivali lulela u kasiko o vi yokela kutala.

¹⁴ Ositu yonui puai locipa laniña o vi upa vocilombo, o vi yokela kofeka; oco ocilumba cekandu.

¹⁵ O kuata vali cimue ocitupi. Arone lomãla vaye va kape ovaka avo kutue wocitupi.

¹⁶ Wipa ocitupi, o nyañula osonde yaco, o yi nyila kutala kolonẽle viosi.

¹⁷ O panga ocitupi caco, oku sukula evi viovokati lovolu aco, loku vi kapa pamuamue lovimãlo lutue waco.

¹⁸ Ocitupi cosi o yoka kutala, oco ocilumba ca pia elisi ci kuete elemba li pepa, haico ocilumba covondalu coku Yehova.

¹⁹ O kuata ocitupi cikuavo, Arone lomãla vaye va kapa ovaka avo kutue wocitupi.

²⁰ Oco wipa ocitupi, o nyañula kosonde yaco, o kapa kosungu yetui liondio lia Arone, lo kolosungu viovatui olondio omãla vaye, lo kolomumba viovaka avo olondio lokolomumba violomãi viavo violondio, loku nyila osonde kutala kolonẽle viosi.

²¹ Kosonde yokutala wupako, lokulela woku waveka, o nyila Arone luwalo waye, lomãla vaye luwalo womãla vaye kumue laye, oco a kole kuenda uwalo waye lomãla vaye kuenda uwalo womãla vaye kumosi laye.

²² Wupako vali kocitupi ulela kuenda ucĩla wa neta, lulela wa sitika kovãla, londeki yi li kilu liomuma, lolongẽla vivali lulela u kasiko, kuenda ocikalo cokondio, momo eci ocitupi cocikundi,

²³ lombolo yimosi lekende limosi lia tengiwa lulela, lekende limosi lia pelevala, vi tunda kuhamba wolombolo ka vi kuete etumbisa u kasi kovaso a Yehova.

²⁴ Viosi o vi kapa povaka Arone lo povaka omãla vaye, kuenje o vi yangisa ocilumba coku yangisila kovaso a Yehova.

²⁵ Oco o vi tambula povaka avo oku vi yokela kutala kilu liocilumba ca pia elisi, ci linge elemba li pepa kovaso a Yehova; oco ocilumba covondalu coku Yehova.

²⁶ O nyañula onete yocitupi cocikundi ca Arone, yi yangelisa kovaso a Yehova ndocilumba coku yangelisa. Kuenje ci linga ocikepa cove.

²⁷ Kocitupi cocikundi, ndokuti eci ca Arone leci comãla vaye, o kolisa onete yocilumba coku yangelisa, locikalo cocilumba coku tulika, eyi va yi yangelisa leci va ci tulika,

²⁸ vi linga ocikepa cenda hũ ca Arone lomãla vaye ci tunda ku va Isareli. Momo ocikepa caco oco covitunda, ceciwa la va Isareli, ci tunda kocilumba cavo combembua, ci linga muẽle ocilumba cavo ku Yehova.

²⁹ Uwalo u kola wa Arone u tiamẽla komãla vaye vo kuama, oku wala eci va wavekiwa leci va ihiwa ocikundi.

³⁰ Omolãco a piñala omangu yaye yutunda u wala oloneke epanduvali eci iñila vombalaka yoku ñualẽhẽla la Yehova ha lingi upange omu mu kola.

³¹ Oco o nyañula ocitupi cocikundi loku teleka ositu yaco apa pa kola.

³² Ositu yaco yocitupi lolombolo vi li vuhamba, Arone lomãla vaye va vi lia kuvelo wombalaka yoku ñualẽhẽla la Yehova.

³³ Oco va lia evi va likutilila lavio vioku tuvika ekandu, ha va ihiwa ocikundi kuenda oku va kolisa; puãi u ka situe lavo ka ka lieko, momo vi kola.

³⁴ Nda cimue cositu cocikundi, pamue combolo, ci siala toke komẽle, oco o yoka oheta yaco londalu; ka yi ka liwe, momo yi kola.

³⁵ Oco o linga la Arone lomãla vaye, ndovina viosi nda ku sapuila, oloneke epanduvali o va iha ocikundi.

³⁶ Eteke keteke o lumba onale yocilumba cekandu coku tuvika; oco o yelisa utala oku tuvikilapo, kuenje u waveka oku u kolisa.

³⁷ Oloneke epanduvali o likutilila utala oku tuvika, loku u kolisa. Utala u kola ca piãla, viosi vi lambako vi kola.

³⁸ Evi o lumbila kutala vievi: eteke keteke cenda hũ olomeme vivali viunyamo.

³⁹ O lumba omeme omẽle, oñolosi omeme yikuavo.

⁴⁰ Kumue lomeme yatete ku lumbiwa onepa yekui yefa yosema ya fina ya tengiwa lonepa yakuãla yohine yulela vo sopola vocine; kuenda onepa yakuãla yohine yovinyu viocilumba coku nyua.

⁴¹ Omeme yikuavo o yi lumba oñolosi. O linga layo ndocilumba comẽle cosema, locilumba caco covinyu, elemba li pepa, ocilumba covondalu coku Yehova.

⁴² Ci linga ocilumba coku pia elisi cenda hũ kovitumbulukila viene. Ci lumbiwila kovaso a Yehova kuvelo wombalaka yoku ñualẽhẽla la yehova, haiko ñualẽhẽla lene si popi love.

⁴³ Oko ndi ñualẽhẽla la va Isareli kuenje ombalaka yi kolisua lulamba wange.

⁴⁴ Ombalaka yoku ñualẽhẽla la Yehova lutala ndi vi kolisa. Arone layevo lomãla vaye ndi va kolisa ha va mbumbila komangu yutunda.

⁴⁵ Ndi tunga pokati ka va Isareli si lingi Suku yavo.

⁴⁶ Va kulĩha okuti ame ndi Yehova Suku yavo nda vopa vofeka ye Egito si tungi pokati kavo. Ame ndi Yehova Suku yavo.