ETUNDILO 27 - Embimbiliya - Bíblia Sagrada em Umbundu

¹ O tunga utala lavaya ositimi; usõvi ovikeya vitãlo, upati ovikeya vitãlo; avindi utala a lisoke. Okulepa kuaco kilu ovikeya vitatu.

² O tunga lolombinga kavindi aco akuãla; olombinga vi tokeka kutala vi kala uti umosi. U laña losipi.

³ O tunga olombia vioku tuta lavio etiko, lolopa, latasu, lolongalufu, loviyukilo viondalu. Ovikuata viaco viosi o vi tunga losipi.

⁴ O u tungila ocivela capangu, haico owanda wosipi. Kowanda waco, kasũsũ aco akuãla o tunga ovinunga vikuãla viosipi.

⁵ O u kapa vemẽhi liopalatende yi ñuala utala, oco owanda u sulila pokati lakati kutala.

⁶ O songa olomuangaluwa viutala, olomuangaluwa viositimi; o vi laña losipi.

⁷ Olomuangaluwa viaco vi kapiwa vovinunga, lolomuangaluwa vi kala kolonẽle vivali viutala poku wambata.

⁸ O u tunga lavaya, vokati kaco mu kala upulule. Ndomo va ku lekisa komunda haimo vo tunga.

⁹ O tunga ocitali cotavernakulu; konẽle yo Sul ku kala ongumbo yocitali yovalatanya, okulepa kuonẽle yimuamue ocita covikeya.

¹⁰ Olongunji viaco akui avali, lalukuki avio akui avali, osipi. Olonjolo violongunji lolombala viaco viopalata.

¹¹ Haico konẽle yo Norte vusõvi waco ku kala ongumbo, okulepa kuaco ocita covikeya; olongunji viaco akui avali, lalukuki avio akui avali, osipi. Olonjolo violongunji lolombala viaco viopalata.

¹² Vupati wocitali konẽle yutakelo ongumbo yakuĩ atãlo kovikeya; olongunji ekui, alukuki ekui.

¹³ Upati wocitali konẽle yutundilo akuĩ atãlo kovikeya.

¹⁴ Ongumbo konẽle yimosi yombundi ekui kovikeya vitãlo; olongunji vitatu, alukuki atatu.

¹⁵ Konẽle yikuavo ongumbo yekui kovikeya vitãlo; olongunji vitatu, alukuki atatu.

¹⁶ Pombundi yocitali pa kala onanga yoku vindikiya yakuĩ avali kovikeya, yalinha onoloti la a vumbula la a kusuka lovalatanya, upange womesele yoku posuisa. Olongunji viaco vikuãla, alukuki akuãla.

¹⁷ Olongunji viosi viocitali ci ñualãpo vi pandekiwe lolombala viopalata; olonjolo viopalata, alukuki osipi.

¹⁸ Usõvi wocitali ocita covikeya; upati wocitali cosi akui atãlo; okulepa kilu ovikeya vitãlo, lonanga yovalatanya, lalukuki aco osipi.

¹⁹ Ovivela viosi viotavernakulu, viupange waco wosi, lolombambo viayo viosi, lolombambo viosi viocitali, vi kala viosipi.

²⁰ O sapuila va Isareli okuti va ku nenẽla ulela wa fina wasetona a sopuiwa. Ulela waco woku kapa kapa vondiyelo okuti ocinyi cayo ci taima ño hũ.

²¹ Vombalaka yoku ñualẽhẽla la Yehova, posamua yongumbo yi li kovaso yuvangi, Arone lomãla vaye valume va yi sokiya tunde oñolosi toke komẽle kovaso a Yehova. Ci linga ocisila cenda, hũ kovitumbulukila viaco viosi via Isareli, haico va Isareli va ci lingainga.