ETUNDILO 26 - Embimbiliya - Bíblia Sagrada em Umbundu

¹ Otavernakulu o yi tunga lekui kolonanga viovalatanya lalinya onoloti la a vumbula la a kusuka kuenda vakeruvi; o vi tunga luloño.

² Usõvi wavio onanga onanga u kala akui avali kovikeya kovikeya ecelãla; upati wonanga ovikeya vikuãla; olonanga viosi oseteko yimuamue.

³ Olonanga vitãlo va vi tongihinya pamosi, olonanga vitãlo va vi tongihinya pamosi.

⁴ O kapa olongovela vionoloti konẽle yonanga yi kala konẽle yevi via litongihinya, haivio o kapa konẽle yonanga yi kala konẽle ya vikuavo via litongihinya.

⁵ Akui atãlo kolongovela o tunga konanga eyi, akui atãlo kolongovela o tunga konẽle yonanga yoku tongihinya kuavali; olongovela viaco vi liloña.

⁶ O tunga akui atãlo akuatelo ulu, hu pandeka pamosi olonanga lakuatelo aco, otavernakulu ha yi lingi yimosi.

⁷ O tonga olonanga viovonya olohombo, ha vi lingi ombalaka yi sikĩlĩla otavernakulu; ekui liolonanga konanga o vi tonga.

⁸ Osõvi wonanga u kala akui atatu kovikeya; upati wonanga ovikeya vikuãla; olonanga ekui lamosi vi kala loseteko yimuamue.

⁹ O tongihinya olonanga vitãlo pamosi, lolonanga epandu pamosi; eyi yepandu o yi ketikila kovaso ombalaka.

¹⁰ O tongela akui atãlo kolongovela konẽle yonanga yi kala konẽle yevi via litongihinya, lokonẽle yonanga yi kala konẽle ya vikuavo via litongihinya akui atãlo kolongovela.

¹¹ O tunga akui atãlo akuatelo osipi hu kapi akuatelo aco kolongovela oku tongihinya ombalaka ha yi lingi yimosi.

¹² Ocisupe kolonanga viombalaka cina ci nyoñama, omeyu yonanga ya supapo, ci nyoñamẽla konyima yotavernakulu.

¹³ Ukeya konẽle eyi lukeya konẽle oyo evi via supapo kusõvi wolonanga viombalaka vi nyoñamẽla kolonẽle viotavernakulu, konẽle eyi lokonẽle oyo, oku yi sikĩlĩla.

¹⁴ O tonga ocisikĩlĩlo combalaka lovipa violonupi va vi teka ci kusuka, kilu liaco ocisikĩlĩlo covipa violonjundu.

¹⁵ O pasa avaya otavernakulu oviti viositimi, a tãi.

¹⁶ Usõvi wevaya ekui kovikeya, upati wevaya ukeya komeyu.

¹⁷ Kevaya levaya ku kala ovisisi vivali vi likuata; oco o panga avaya osi otavernakulu.

¹⁸ O pasa avaya otavernakulu; akui avali kavaya okonẽle yo Sul.

¹⁹ O tunga akui akuãla kotulukuki tuopalata tua sokuiwa vemẽhi liavaya aco akui avali; alukuki avali vemẽhi lievaya a kuata ovisisi vivali, alukuki avali vemẽhi lievaya likuavo a kuata ovisisi viaco vivali.

²⁰ Onẽle yavali yotavernakulu konẽle yo Norte, akui avali kavaya,

²¹ lakui akuãla alukuki opalata, alukuki avali vemẽhi lievaya, alukuki avali vemẽhi lievaya.

²² Onyima yotavernakulu ya imba ovaso kutakelo o yi pasela avaya epandu.

²³ O pasa avaya avali ovavindi otavernakulu a kala konyima.

²⁴ A pandekiwa kosi, haico kilu a tongihinyua locinunga cimosi; kavali kao haico; a avaya avindi avali.

²⁵ Ku kala avaya ecelãla, alukuki avo opalata, ekui lialukuki kalukuki epandu; alukuki avali vemẽhi lievaya limosi, alukuki avali vemẽhi lievaya likuavo.

²⁶ O pasa olombala viositimi, vitãlo viavaya onẽle yimosi yotavernakulu,

²⁷ lolombala vitãlo viavaya onẽle yikuavo yotavernakulu, lolombala vitãlo viavaya onẽle yotavernakulu, viokonyima yaco yokutakelo.

²⁸ Olumbala luovokati kavaya lu tunda konẽle toke konẽle.

²⁹ O laña avaya aco lulu; o tunga ovinunga viaco lulu mu pita olombala; o laña olombala lulu.

³⁰ O tunga otavernakulu ndoseteko yaco va ku lekisa vomunda.

³¹ O tonga ongumbo yeyavailo, lalinya onoloti la a vumbula la a kusuka lovalatanya; va yi posuisa lavakeruvi.

³² O yi nyoñamisa kolongunji vikuãla viositimi via lañiwa lulu; olonjolo viaco vi linga viulu; vi tãi, kalukuki akuãla opalata.

³³ O nyoñamisila ongumbo vemẽhi liakuatelo kuenje o kapa vokati kongumbo ocikasia covisila. Ongumbo yaco yi tepisa oko ku kola loku kuoku kola enene.

³⁴ O tumbika omangu yohenda kilu liocikasia covisila voku ku kola kuoku kola.

³⁵ O tumbika omesa kovaso yongumbo; ondiyelo yi lisuñame lomesa konẽle yotavernakulu yoko Sul; omesa o yi kapa konẽle yoko Norte.

³⁶ O tonga onanga yoku vindikiya uvelo wombalaka, lalinya onoloti la a vumbula la a kusuka lovalatanya, upange womesele yoku posuisa lalinya.

³⁷ O pasela onanga yaco olongunji vitãlo viositimi, o vi laña lulu; olonjolo viaco vi linga viulu. O vi yenguluila alukuki atãlo osipi.