ETUNDILO 25 - Embimbiliya - Bíblia Sagrada em Umbundu

¹ Yehova wa popia la Mose hati,

² Sapuila va Isareli okuti va ndumbila ovilumba. Komunu omunu o kasi lutima waco ci tava oku nambuila ocilumba.

³ Ocilumba wu tambula kokuavo ceci: ulu, opalata, osipi,

⁴ olonanga vionoloti, levi vi vumbula, levi vi kusuka, ovalatanya lovonya olohombo,

⁵ ovipa violonupi via nyeñisua, ovipa violohombo, oviti viositimi,

⁶ ulela wondiyelo, olosimbolua viulela woku wava, levi vinsensu vi pepa,

⁷ otuvawe tuasardonika, lotuvawe tuolomota, tuefonde lotu tuonjeke yoponete.

⁸ Va nungila ocitumãlo ci kola okuti ñala pokati kavo.

⁹ Ndeci hu lekisa osetako yotavernakulu loseteko yovikuata viaco haico wu vi tunga.

¹⁰ Va tunga ocikasia cositimi, usõvi waco ovikeya vivali komeyu, upati waco ukeya komeyu, okulepa kuaco kilu ukeya komeyu.

¹¹ O ci laña lulu wa fina, vokati lokosamua o ci laña. Komẽla o pamisako longenge yulu.

¹² O ci yenguluila ovinunga vikuãla viulu oku vi kapa kolongonjo viaco vikuãla, konele ovinunga vivali, konele ovinunga vivali.

¹³ O tungavo olomuangaluwa viositimi loku vi laña lulu.

¹⁴ O pitisa olomuangaluwa viaco kovinunga viokolonele viocikasia, oku ambata lavio ocikasia.

¹⁵ Olomuangaluwa vi kala vovinunga viocikasia, ka vi tundimo.

¹⁶ O seleka vocikasia ovawe ovihandeleko huiha.

¹⁷ O tunga onuviko haiyo omangu yohenda. O yi tunga lulu wa fina. Usõvi wayo ovikeya vivali komeyu, upati wayo ukeya komeyu.

¹⁸ O tunga vakeruvi vavali vulu; o va tunga loku tela, va kala vovinyulu viomangu yohenda.

¹⁹ O tungila ukeruvi kocinyulu, ukeruvi kocinyulu. Vakeruvi va teliwa ocivela cimosi komangu yohenda kovinyulu viaco vivali.

²⁰ Vakeruvi va linga ndoku oluĩla kilu avava avo, okuti va sitika lavava omangu yohenda. Va limba ovaso. Ovipala viavakeruvi vimba ovaso komangu yohenda.

²¹ O tumbika omangu yohenda kilu liocikasi; vokati kocikasia o solekamo ovawe ovihandeleko huiha.

²² Oko ñualẽhela love. Kilu liomangu yohenda, pokati kovakeruvi vavali va kasi kocikasia covisila, oko mbanguila love ovina viosi huiha ndovihandeleko viomanu va Isareli.

²³ O tunga omesa yositimi, usõvi wayo ovikeya vivali, upati ukeya, okulepa kuaco kilu ukeya komeyu.

²⁴ O yi laña lulu wa fina, o yi ñualisa longenge yulu.

²⁵ O yi ñualisavo ocimbimbi cupati weka, locimbimbi caco o ci ñualisa longenge yulu.

²⁶ O yi pangela ovinunga vikuãla viulu loku kapa ovinunga viaco kavindi akuãla a kasi kolongonjo viaco.

²⁷ Ovinunga vi kala ocipepi locimbimbi, omu mu yakuila olomuangaluwa vioku ambata omesa.

²⁸ O songa olomuangaluwa viositimi loku vi laña lulu ha vambata lavio omesa.

²⁹ Lalonga aco lolonguto lasanga latiyela va itaila lao, viosi o vi tunga lulu wa fina.

³⁰ Komesa o kapa kapa hũ, oku ñapaela ame, ombolo yoku tala.

³¹ O tunga ondiyelo lulu wa fina; ondiyelo yaco yoku tela; omangu yaco, longunji, lovilindo lapumbu lolonẽlẽho, cosi ci tungiwa ocivela cimosi.

³² Ku kale ovimanganjumba epandu vi tunda kolonẽle viaco, ovimanganjumba vitatu viondiyelo konẽle, ovimanganjumba vitatu viondiyelo konẽle.

³³ Otuvilindo tutatu tua lisoka ndolomendua tu kala kocimanganjumba cimosi kumosi lepumbu lonẽlẽho, otuvilindo tutatu, tua lisoka ndolomendua, tu kala kocimanganjumba cikuavo, kumosi lepumbu lonẽlẽho; haico kovinmanganjumba viaco epandu vi tunda kongunji yondiyelo.

³⁴ Vondiyelo mu kala otuvilindo tukuãla tua lisoka ndolomendua, kuenda apumba aco lolonẽlẽho.

³⁵ Ku kala epumbu kombuelo yovimanganjumba vivali, viosi ocivela cimosi, epumbu kombuelo yovimanganjumba vivali, viosi ocivela cimosi, epumbu kombuelo yovimanganjumba vivali, viosi ocivela cimosi, kovinmanganjumba viaco epandu vi tunda kondiyelo.

³⁶ Apumbu aco lovimanganjumba viaco vi linga laco ocivela cimosi; cosi muẽle cimosi va ci tela lulu wa fina.

³⁷ O tunga olovela viaco epanduvali; kuenje va mĩha olovela viaco ha vi tuila ocitumãlo caco.

³⁸ Otuayola tuaco lotualonga tuovinene tu kala tulu wa fina.

³⁹ Yi tungiwa lotalendo yulu wa fina, okuti ondiyelo lovikuata viayo viosi.

⁴⁰ Patekela okuti o vi tunga ndoloseteko va ku lekisa komunda.