ETUNDILO 24 - Embimbiliya - Bíblia Sagrada em Umbundu

¹ Kuenje Yehova wa popia la Mose, hati, Lamanẽli ku Yehova, ove la Arone la Nadava la Avihu, kuenda akui epanduvali kovakulu va Isareli. Va kale kupãla oku fendela.

² Mose lika iya ocipepi la Yehova, vakuavo ka va keye ocipepi. Omanu ka va ka lamane laye.

³ Oco Mose weya, wa sapuila omanu olondaka viosi via Yehova lovisila viaco viosi. Omanu vosi va kumbulula londaka yimosi vati, Olondaka viosi via popia Yehova tu vi linga.

⁴ Mose yu wa sonẽha olondaka viosi via Yehova. Wa pasuka omẽle ociteketeke, wa tunga utala vepato liomunda. Wa tungavo olongunji ekui lavivali via lisoka lapata ekui lavivali a va Isareli.

⁵ Wa tuma ipombokuenje via va Isareli. Wa lumba ovilumba vioku pia elisi. Wa lumbavo ovilumba viombembua violongombe ku Yehova.

⁶ Mose wa nyañula onepa yosonde, kuenje wa yi kapa valonga. Onepa yikuavo yosonde wa yi nyila kutala.

⁷ Wa nyañula elivulu liovisila, kuenje wa vi tangela omanu. Ovo va linga vati, Viosi via popia Yehova tu vi linga, tu pokola.

⁸ Mose wa nyañula osonde yaco, wa nyila omanu, hati, Tala, eyi osonde yocisila Yehova a lisila lene lolondaka evi viosi.

⁹ Oco Mose la Arone la Nadava la Avihu, lakui epanduvali kovakulu va Isareli va lamana.

¹⁰ Va mõla Suku ya Isareli. Vemẽhi liolomai viaye huti ño mua yaliwa ohanda yosafira, okuyela kuaco kua soka ndilu.

¹¹ Ka kapele eka liaye kolombuale via va Isareli. Va mõla Suku, va lia, va nyua.

¹² Yehova wa popia la Mose hati, Lamana omunda. Enju kokuange. Talamela. Hu iha itale viovawe vi kuete ovihandeleko locikundi nda sonẽhako oku va longisa.

¹³ Oco Mose wa votoka, eye la Yehosua oñuatisi yaye, kuenje mose wa lamanela komunda ya Suku.

¹⁴ Wa sapuila ovakulu hati, Ene vu tu talamẽla kulo toke tu tiuka, Arone la Hure va kasi lene. Wosi o kuete ondaka a ende kokuavo.

¹⁵ Oco Mose wa lamana komunda kuenje elende lia sitika omunda.

¹⁶ Ulamba wa Yehova wa kala komunda Sinai, elende lia yi sitika oloneke epandu. Eteke liepanduvali eye wa kovongela Mose velende.

¹⁷ Okumõlẽha kulamba wa Yehova kua soka ndondalu yelungulungu kilu liomunda kovaso ya va Isareli.

¹⁸ Mose wa iñila vokati kelende, wa lamana komunda. Mose wa kala komunda yaco akui akuãla kovotanya lakui akuãla kovoteke.