ETUNDILO 21 - Embimbiliya - Bíblia Sagrada em Umbundu

¹ Ovisila evi ovio o va longisa.

² Nda o landa upika u Heveru, upika waco o vumba anyamo epandu, unyamo wepanduvali o tundapo, enda, wa linga omamãle.

³ Nda weya lika waye okuti ka kuelele, o tunda lika waye. Nda weya tupu wa kuela ale, ukãi waye enda laye.

⁴ Nda cime caye o wiha ukãi kuenje wa cita laye omãla valume pamue vakãi, ukãi lomãla va tokala ku cime, eye o tundapo lika liaye.

⁵ Puãi nda upika eye muẽle o popia hati, Ndi sole cime cange lukãi wange lomãla vange, si tundipo ndomamãle,

⁶ nda oco, cime caye u tuala ku Suku, u tualavo puvelo pamue kocikuli kuenje cime caye u tombola ketui liaye lociketelo; noke o vumba ño hũ.

⁷ Nda omunu o landisa omõlaye ukãi ha lingi upika eye ka tundipo ndeci ci tunda tundapo apika valume.

⁸ Nda cime caye wa likuminya oku u kuela puãi ko kuela omo ukãi ko sanjuisa vali oco cime caco o tava okuti ukãi o yovuiwa. Ka kuete omoko yoku u landisa komanu vakuafeka yiñi omo wo kemba.

⁹ Nda wo kuelisa omõlaye ulume o linga laye ndomõlaye ukãi.

¹⁰ Nda o kuela vali ukãi ukuavo, okulia kuaye luwalo waye locitua colohuela viaye ka vi tepulula.

¹¹ Nda ko lingila ovina evi, katatu kavio, ukãi o tunda ño, ka feti olombongo.

¹² U o veta omunu okuti o fa layevo ipaiwa.

¹³ Puãi nda ko lavekelele, okuti Suku wo weca peka liaye, ame ndu tukuila oko a tilila.

¹⁴ Nda omunu o votokela ukuavo locipango oku u ponda, omunu waco upiwa kutala wange ha fi.

¹⁵ U o veta isiaye pamue inaye ipaiwa muẽle.

¹⁶ U iva omunu ho landisa, pamue vo sanga peka liaye, ipaiwa muẽle.

¹⁷ U o tuka isiaye pamue inaye ipaiwa muẽle.

¹⁸ Nda alume va liyaka kuenje umue o veta ukuavo lewe pamue lonuku, lu wa vetiwa ka file puãi o vongela ño pula,

¹⁹ noke, nda o votoka ha ñuala ñuala posamua lombueti, u wo vetele wa yovoka, puãi o fetela okuvonga kuaco lokusakula kuaco toke o kaya muẽle.

²⁰ Nda umue o veta lombueti upika waye ulume pamue upika waye ukãi kuenje upika o fila peka liaye, omunu waco o yambuiwa muẽle.

²¹ Puãi nda upika o kala eteke pamue oloneke vivali omunu waco wo veta ka yambuiwa omo upika eye olombongo viaye.

²² Nda alume va liyaka kuenje va valula ukãi o kasilili muiñi, kuenje o pulumũla, puãi kovaso ka kuiya vali cĩvi, oco u wo valula vo fetisa muẽle ndeci ci tukula veyukãi. O feta eci ci tukula olonganji.

²³ Nda kovaso kuiya cĩvi oco o feta omuenyo lomuenyo,

²⁴ iso liso, eye leyo, eka leka, omãi lomãi,

²⁵ okupia lokupia, epute lepute, ocisimbimbi locisimbimbi.

²⁶ Nda omunu o veta kiso liupika waye ulume pamue kiso liupika waye ukãi kuenje o li nyõla, eca muẽle upika waco omo wa nyõla iso liaye.

²⁷ Nda o sokola eyo liupika waye ulume pamue liupika waye ukãi eca muẽle upika waco omo wa nyõla eyo liaye.

²⁸ Nda ongombe yi toma ulume pamue ukãi kuenje omunu waco o fa, ongombe yaco yi sosuiwa lovawe. Ositu yaco ka yi liwa. Muẽleangombe yaco wa yovoka.

²⁹ Nda ongombe yaco ya toma toma ale, kuenje va ecaeca ale ovikundi ku muẽle yaco muẽle yaco puãi ka yi tatele, yu ya ipa ulume pamue ukãi, ongombe yaco va yi ipa lovawe, muẽle yaco lahevo ipaiwa.

³⁰ Nda oku feta vo fetisa, oco o yovola omuenyo waye ndomo vo tukuila.

³¹ Nda yi toma omõla ulume pamue omõla ukãi ondaka eyi haiyo vo tetuluila layo.

³² Nda ongombe yi toma upika ulume pamue upika ukãi, muẽleangombe eca ku cime cupika akui atatu kolosiekele viopalata. Ongombe yipaiwa lovawe.

³³ Nda omunu o sia ocitunu upulule pamue nda omunu wa fẽla ocisimo kuenje ka ci tuvikile ha mu fi ongombe pamue ocimbulu,

³⁴ muẽleacitunu o ci fetela; eca olombongo ku muẽle yaco, ocife ci linga caye.

³⁵ Nda ongombe yomunu umue yi toma ongombe yomunu ukuavo kuenje yi fa oco va landisa eyi yi kasi lomuenyo, olombongo viaco va vi liavela. Eyi ya fa va yi liavelavo.

³⁶ Puãi nda va kulĩha okuti ongombe yaco yi toma toma ale, puãi muẽle yaco ka yi tatele, o feta ongombe longombe, ocife ci linga caye.