ETUNDILO 20 - Embimbiliya - Bíblia Sagrada em Umbundu

¹ Suku wa popia olondaka evi viosi, hati,

² Ame ndi Yehova Suku yove, nda ku upa vofeka ye Egito, vonjo yupika.

³ Ku ka kale lolosuku viñi, te ame.

⁴ Ku ka lisongele ociñumañuma pamue esetahãlo lieci ci kasi kilu, pamue lieci ci kasi posi, pamue lieci ci kasi vovava vemẽhi liongongo;

⁵ ku ka vi fendela pamue oku vi vumba, omo ame Yehova, Suku yove, ndi Suku yesepa, oku fetuluinya komãla vavo toke kocitumbulukila catatu leci cakuãla cava va suvuka ame;

⁶ puãi sola locisola ka ci pongoloka olohulukãi viava va sole haivo va linga ovihandeleko viange.

⁷ Ku ka tukule onduko ya Yehova Suku yove lesanda, omo Yehova ka yowisa u o tukula onduko yaye lesanda.

⁸ Ivaluka eteke liesambata oku li kolisa.

⁹ Oloneke epandu o talavaya oku linga upange wove wosi;

¹⁰ puãi eteke liepanduvali olio esambata lia Yehova Suku yove. Veteke liaco ku ka lingemo upange, ove muẽle, pamue omõlove ulume, pamue omõlove ukãi, pamue upika wove ulume, pamue upika wove ukãi, pamue ongombe yove, pamue ukombe o kasi vonjo yove.

¹¹ Omo oloneke epandu Yehova wa tunga ilu losi lokalunga lovina viosi vi kasimo kuenje wa puyuka eteke liepanduvali; oco Yehova wa sumũluisa eteke liesambata ha li kolisa.

¹² Sumba so la nyõho oco oloneke viove vi lue vofeka yina yi ku iha Yehova Suku yove.

¹³ Ku ka ipaye.

¹⁴ Ku ka pekelise.

¹⁵ Ku ka ive.

¹⁶ Ku ka imbile ukuẽle uvangi wuhembi.

¹⁷ Ku ka livele onjo yokuẽle, ku ka livele ukãi wokuẽle, pamue upika waye ulume, pamue upika waye ukãi, pamue ongombe yaye, pamue ocimbulu caye. Cosi cokuẽle ku ka ci livele.

¹⁸ Eci omanu vosi va yeva ovilemĩlo loviliakulo londaka yolumbeta lomunda ya tukuta, oco omanu va yokoka loku luluma, kuenje vamela kupãla.

¹⁹ Va popia la Mose vati, Popia letu ove, tu ku yeva, puãi Suku ku ka popie letu sanga tu fa.

²⁰ Mose yu wa popia lomanu hati, Ko ka yokoki, omo Suku weyilila oku vu nyika, okuti vu u sumbila kuenje ka vu lingi akandu.

²¹ Omanu va talama kupãla osimbu Mose a kokela kelende omu Suku a kala.

²² Oco Yehova wa popia la Mose hati, Eci o sapuila va Isareli ceci, huti, Ene wa mõli muẽle ndomo nda popia lene ndaño ñasi kilu.

²³ Ko ka tungi olosuku viopalata oku vi kongela lame. Ko ka litungili ene muẽle oviteka viulu.

²⁴ Vu nungila utala wene vu lumba lumbako ovilumba viene vioku pia elisi levi viombembua, lolomeme viene lolongombe viene. Kuosi njonguila okuti onduko yange yivalukiwa oko njiya oku kala lene loku vu sumũluisa.

²⁵ Nda vu nungila utala wovawe ko ka u tungi lovawe a songiwa, omo nda vu u yuluila ocivela cene vu u vĩhĩsa.

²⁶ Ko ka lamanẽli kutala wange kosikata sanga epõlõla liene li molẽha.