ETUNDILO 2 - Embimbiliya - Bíblia Sagrada em Umbundu

¹ Ulume umue ukuepata lia Lewi wa kuela umue omõla a Lewi.

² Ukãi we mina, wa cita omõla ulume. Eci o mõla okuti wa posoka wo salamisa olosãi vitatu.

³ Eci ka tẽlele vali oku u salamisa wa nyañula uhamba wolonẽva, wa konga lonata yekokoto, wa kapamo omõla kuenje wo soleka voloñeva konẽle yolui.

⁴ Mukãi waye wa talama okacinala oku kũlĩhisa nda cimue cu sanga.

⁵ Omõla a Fareo ukãi wa lokila kolui oku yua, afeko vaye va pita kekulo liolui. Eye wa mõla uhamba voloñeva kuenje wa tuma ufeko oku wupamo.

⁶ Eci o tuvula wa mõla oñaña, kuenje oñaña ya kala loku lila. Co linga calua ohenda kuenje hati, Omõla u omõla a va Heveru.

⁷ Mukãi waye wa pula omõla a Fareo, hati, Ngenda ha ku kovongela uleli kovakãi va va Heveru ha ku nyamisilako omõla ale?

⁸ Omõla a Fareo wa kumbulula hati, Kuenda. Okofeko ka enda, ka kovonga ina yokamõla.

⁹ Omõla a Fareo wo sapuila hati, Ambata omõla u, ko nyamisile oco hu fete. Oco ukãi wa tambula omõla wo nyamisa.

¹⁰ Eci omõlaco a kula, ukãi wo nena komõla a Fareo kuenje wa linga omõlaye, wo luka Mose ca lomboloka, Upiwa, hati Ndo wupa vovava.

¹¹ Eteke limue eci Mose a kula wa ka pasuile vangandiaye, kuenje wa mõla ovilemo viavo, wa mõlavo u Egito o tipula umue ngandiaye u Heveru.

¹² Yu wa vanja oku loku. Eci a mõla okuti ka kuli omunu oco wa pupola u Egito kuenje wo vembika veseke.

¹³ Omele yaco eci a endako vali wa mõla alume vavali va Heveru va liyaka. Wa pula u wa valula ukuavo hati, O tipuila nye ukuẽle?

¹⁴ Eye wa linga hati, Wa ku kapa ndosoma yetu pamue onganji yetu helie? Wa soka oku njipala ndeci wa ipa u Egito? Oco Mose wa kuata usumba, wa sokolola hati, Eci puãi ca yevala ocili.

¹⁵ Eci Fareo a ci yeva wa sanda oku ipa Mose. Puãi Mose wa tila Fareo, wa enda kofeka ya Midiane, kuenje wa tumãla konele yocisimo.

¹⁶ Ocitunda ca Midiane ca kala lomãla vakãi epanduvali. Veya kocisimo oku tapa ovava, va yukisa ovikulungu oku nyuisa ocunda ca isiavo

¹⁷ Ovangombo veya kuenje va va hanga, puãi Mose wa votoka kuenje wa va kuatisa, wa nyuisa ocunda cavo.

¹⁸ Eci veya ku isiavo, Rauele, eye wa va pula hati, Ci kasi ndati okuti etaili weyi lombili?

¹⁹ Va kumbulula vati, Umue u Egito wa tu popela peka liovangombo, wa tu tapela ovava kuenje wa nyuisa ocunda.

²⁰ Eye wa pula omãla vaye hati, O kasi pi? Ulume waco wo sili nye? U kovongi, eye, a lie ombolo.

²¹ Kuenje Mose wa tava oku tunga lulume waco. Eye wa eca ku Mose omõlaye ukãi Cipora.

²² Eye wa cita omõla ulume, wo luka Gerisiome, ca lomboloka ocingendeleyi, momo hati, Nda kala ocingendeleyi vofeka yamale.

²³ Eci pa pita oloneke via lua oco Soma ye Egito wa fa. Va Isareli va lisiõsuĩla upika wavo, va liyuila upika wavo kuenje okuliyula kuavo kua yevala ku Suku.

²⁴ Suku wa yeva okulisiõsiõla kuavo, kuenje Suku wa ivaluka ocisila caye cina a lisila la Avirahama la Isake kuenda Yakoba.

²⁵ Suku wa mõla va Isareli, kuenje Suku wa limbuka ndomo va kala.