ETUNDILO 19 - Embimbiliya - Bíblia Sagrada em Umbundu

¹ Eteke va tẽlisa osãi yatatu kovaso yokutunda kua va Isareli kofeka ye Egito, eteke liaco hailio, veya vekalasoko lia Sinai.

² Eci va tunda ko Refidimi veya kekalasoko lia Sinai. Va tunga ocilombo cavo vekalasoko. Va Isareli va tungila ocilombo ocipepi lomunda.

³ Mose wa londa komunda oku likutilila ku Suku. Yehova wa kala vomunda kuenje wa sapuila Mose hati, Eci o popia lepata lia Yakoba haico o sapuila va Isareli ceci, huti,

⁴ Wa mõli eci nda linga va Egito, ene puãi ndo yeluli lavava ongonga yulombo. Ndo neni kokuange.

⁵ Oco nda wu yeva ocili kondaka yange, loku tata ocisila cange, ene muẽle vu noliwa pokati kolofeka viosi oku linga omanu vange muẽle. Momo oluali luosi luange.

⁶ Ofeka yene yi kola kuenje yi linga ndocitunda cange. Evi ovio olondaka o sapuila va Isareli.

⁷ Oco Mose weya, wa kovonga akulu vomanu, wa va lomboluila olondaka evi viosi Yehova o sapuila.

⁸ Omanu vosi va kumbuluila kumuamue, vati, Cosi Yehova a popia tu ci linga. Mose wa pitiya ku Yehova olondaka viomanu.

⁹ Yehova wa popia la Mose, hati, Tala! njiyilila kokuove velende lia sitika okuti, omanu va yeva eci mopia love kuenje va ku kolela oloneke viosi. Mose wa sapuila Yehova olondaka viomanu.

¹⁰ Yehova wa popia la Mose hati, Kuende komanu. Etaili la hẽla o va kolisa. Va sukule uwalo wavo.

¹¹ Va liangiliyile eteke liatatu. Momo eteke liatatu Yehova o lokila komunda Sinai kovaso omanu vosi.

¹² Love o kapela omanu olongave huti, Lunguki, ko ka lamani vomunda, ndaño oku lamba konẽle yaco. U o lamba komunda yaco ipaiwa muẽle.

¹³ Puãi poku u wipãla lalimue eka liu lamba, vo sosola lovawe pamue oku wasa ongambu. Ndaño ocinyama, ndaño omunu, ka kala lomuenyo. Eci olumbeta lu sika sike-e oco va kokela komunda.

¹⁴ Mose yu wa loka komunda, weya komanu, wa kolisa omanu vaco, kuenje va sukula olonanga viavo.

¹⁵ Wa sapuila omanu hati, Liangiliyili eteke liatatu. Ko ka litokeki lakãi.

¹⁶ Komele yeteke liatatu kua kala ovilemĩlo loviliakulo. Elende lia sitika komunda. Lolumbeta lua sika sike-e. Kuenje omanu vosi va kala vocilombo va luluma.

¹⁷ Mose wopa omanu vosi vocilombo ha va sangi Suku, kuenje va talama kepato liomunda.

¹⁸ Omunda ya Sinai yosi ya tunda owisi omo Yehova wa lokilako londalu. Owisi waco wa londa vilu ndowisi wofolono. Omunda yosi ya luluma calua.

¹⁹ Eci ondaka yolumbeta yamako oku yevala oco Mose a popia kuenje Suku wo kumbulula vocilemĩlo.

²⁰ Yehova yu wa lokila komunda Sinai, kilu muẽle liomunda, kuenje Yehova wa kovongela Mose kilu liomunda. Mose yu wa londako.

²¹ Yehova wa popia la Mose hati, Loka, ka lungule omanu, sanga va lomboka olongave oku tala Yehova, kuenje va lua va nyolẽha.

²² Ovitunda laviovo, nda viya ocipepi la Yehova, vi likolise, sanga Yehova o vondumuhĩla.

²³ Mose wa popia la Yehova hati, Omanu vaco oku londa komunda Sinai ka ci tava ale, momo ove wa tu iha ocikundi huti, Ñualisi ongave komunda, yi kolisi.

²⁴ Yehova wa popia laye hati, Loka. Kopilile Arone. Enju laye. Ovitunda lomanu puãi, ka va ka sambuke ongave ha veya ocipepi la Yehova, sanga o vondumuhĩla.

²⁵ Oco Mose wa lokila komanu, wa va sapuila.