ETUNDILO 17 - Embimbiliya - Bíblia Sagrada em Umbundu

¹ Owiñi wosi wa va Isareli wa katuka kekalasoko lia Sine, va endaenda atulo avo ndondaka ya Yehova, kuenje va tunga ocilombo vo Refidimi. Puãi ka mua kaile ovava okuti omanu va nyua.

² Oco omanu va hoya la Mose vati, Tu ihi ovava oku nyua. Mose yu wa popia lavo hati, Nye wa hoyisili ame? Nye wa nyikili Yehova?

³ Puãi omanu va kala lenyona lialua, kuenje va lisiõsuĩla Mose vati, Nye wa tu upila ve egito oku tu ipa lenyona, etu lomãla vetu lovinyama vietu?

⁴ Oco Mose wa vilikiya Yehova hati, Ndinga nye lomanu ava? Ndopo va sosola lovawe.

⁵ Yehova wa kumbulula Mose hati, Pita kovaso yomanu. Ovakulu vamue va Isareli va ende love. Ambata peka ombueti yove yina wa veta layo kolui Nilu. Kuende.

⁶ Ame nalama kumue love kewe li kasi ko Horeve. Ove o veta kewe kuenje ku tunda ovava okuti omanu va nyua. Mose wa ci lingila kovaso ovakulu va Isareli.

⁷ Wa tukula ocitumãlo caco hati, Masa, ca lomboloka Okunyika, kuenda Meriva, ca lomboloka Okuhoya, omo va Isareli va hoya hoya lomo va nyika Yehova vati, Yehova o li pokati ketu ale, ele ndati?

⁸ Va Amaleke veya, va liyaka la va Isareli vo Refidimi.

⁹ Mose wa popia la Yehosua hati, Tu nolele alume. Kuende. Ka liyake la va amaleke. Hẽla ha talama kilu liowulu lombueti ya Suku peka.

¹⁰ Oco Yehosua wa linga ndeci Mose a popia laye, wa liyaka la va Amaleke. Kuenje Mose la Arone la Huru va londa kilu liowulu.

¹¹ Posi Mose a tulikila eka liaye va Isareli va yula. Eci a tulula eka liaye va Amaleke va yula.

¹² Ovaka a Mose puãi a kava. Oco va nyañula ewe vo li kapela, eye wa tumãlãko. Arone la Huru va kuata kovaka aye a tulikiwa, u konẽle, u konẽle, kuenje ovaka aye a tõla kokuiñila kuekumbi.

¹³ Yehosua wa kundula Amaleke lomanu vaye lomẽla yosipata.

¹⁴ Yehova wa popia la Mose hati, Ci sonẽha velivulu ha ci lingi onjivaluko. Ci sapula ku Yehosua okuti ame nyõla pe onjivaluko ya Amaleke vemi lilu.

¹⁵ Oco Mose wa tunga utala, wa tukula onduko yawo hati, Yehova eye epandela liange.

¹⁶ Wa linga hati, Omo va katukila epandela lia Yehova oco Yehova o liyaka la Amaleke tunde kocitumbulukila toke kocitumbulukila.