ETUNDILO 16 - Embimbiliya - Bíblia Sagrada em Umbundu

¹ Va tunda ke Elimi kuenje owiñi wosi wa va Isareli weya kekalasoko lia Sine li kasi pokati ke Elimi la Sinai. Eteke liaco eteke liekui latãlo kosãi yavali tunde apa va tundila kofeka ye Egito.

² Owiñi wosi wa va Isareli wa lisiõsuĩla Mose la Arone vekalasoko.

³ Va popia lavo vati, Hĩse nda tua filile leka lia Yehova vofeka ye Egito, momo oko tua tumayala kolombia viombelela, tue kuta kuta ombolo. Wa tu neni mũlo vekalasoko oku ipaya owiñi ulo wosi lonjala.

⁴ Yehova yu wa popia la Mose hati, Tala! ndu lowili ombolo yi tunda kilu. Kuenje eteke keteke omanu va tunda, va nola nola ohuta yeteke liongongo. Oco ndi va nyika nda hẽ va enda lovihandeleko viange nda ndati.

⁵ Keteke liepandu, poku angiliya eyi va nena, vangiliye eyi yi lisoka loloneke vivali.

⁶ Oco Mose la Arone va popia la va Isareli vosi vati, Oñolosi wu kũliha okuti u wo wupi vofeka ye Egito, Yehova,

⁷ kuenje omẽle wu mõla ulamba wa Yehova momo Yehova wa yeva okulisiõsiõla kuene wo lisiõsuĩla?

⁸ Oco Mose wa linga hati, Eci Yehova o waveli ositu yoku lia oñolosi lombolo yoku lia omẽle, momo Yehova a yeva okulisiõsiõla kuene wo lisiõsuĩli, etu hẽ, etu velie? hetuko wa tu lisiõsuĩli, wa lisiõsuĩli Yehova.

⁹ Mose wa popia la Arone hati, Sapuila owiñi wosi wa va Isareli huti, Kokeli ku Yehova, omo wa yeva okulisiõsiõla kuene.

¹⁰ Osimbu Arone a kala loku vangula lowiñi wosi wa va Isareli oco va vanja kekalasoko, kuenje tala, ulamba wa Yehova wa mõlẽhela velende.

¹¹ Yehova wa popia la Mose hati.

¹² Nda yeva okulisiõsiõla kua va Isareli, Popia lavo huti, Oñolosi wu lia ositu, omẽle wu kuta ombolo, kuenje wu limbuka okuti ame ndi Yehova Suku yene.

¹³ Oñolosi kueya olonenu, kuenje via sikĩlĩla ocilombo. Omẽle owume wowu kolonẽle viosi viocilombo.

¹⁴ Eci owume wa takata, tala, posi yekalasoko pa kala okacina katito ndotuvinimbu tuocikokoto.

¹⁵ Va Isareli oku ci mõla va lipula pokati vati, Eci nye? Omo ka va ci kũlĩhile. Mose yu wa popia lavo hati, Oyo ombolo yehova a wihi oku lia.

¹⁶ Ca popia Yehova ceci, hati, Nyomõlĩpo ene vosi, omunu leci a soka laco, Omunu leci a soka laco. Nyomõli omunu omeri, omunu omeri, ca soka lomanu omunu a kasi lavo vombalaka yaye.

¹⁷ Kuenje va Isareli haico va linga, vamue va nola ca lua, vamue ci sule.

¹⁸ Puãi eci va ci yonga lomeri, u wa nyomõla citito ka co kambisile. Va nyomõla omunu leci a soka laco, omunu leci a soka laco.

¹⁹ Mose wa popia lavo hati, Lomue ka ka ci soleke toke komẽle.

²⁰ Haimo lumue ka va yevelele ku Mose. Vamue pokati kavo va soleka cimue toke komẽle, kuenje ceya ovainyo, ca lẽha, kuenje Mose wa va temẽla.

²¹ Omẽle komẽle, va ci nyomõla, omunu leci a soka laco, omunu leci a soka laco. Eci utanya wa tua ca yenguluka.

²² Keteke liepandu va nyomõla eci ci tẽla oloneke vivali, okuti omunu omunu olomeri vivali. Eci akulu vosi vomanu vaco veya, va ci sapuila Mose,

²³ oco Mose wa popia lavo hati, Ca popia Yehova ceci, hati, Hẽla eteke liowusa u kola hailio esambata li kola lia Yehova. Yoki ño eci wu yoka. Teleki ño eci wu teleka. Cosi ci supa vu ci likapela, oku ci soleka toke komẽle.

²⁴ Oco va ci lisolekela toke omẽle, ndomo Mose a va sapuila, kuenje ka ca lehẽle, ka mua kaile enyo.

²⁵ Mose wa linga hati, Va ci lie etaili omo etaili esambata lia yehova. Ka u ci sangi etaili vusenge.

²⁶ Oloneke epandu vu ci nyomõla, puãi eteke liepanduvali olio esambata, olio ka ku kala cimue.

²⁷ Keteke liepanduvali kua tunda vamue oku nyomõla puãi ka va sangele cimue.

²⁸ Yehova wa popia la Mose hati, Eteke lipi vu liweka oku patãla oku linga ovikundi viange lovihandeleko viange?

²⁹ Cu lomboloki! Yehova wa wĩhi esambata. Oco keteke liepandu o wĩhi ombolo yoloneke vivali. Vosi va kale, omunu vocitumãlo caye, omunu vocitumãlo caye. Lomue ka ka tunde vocitumãlo caye eteke liepanduvali.

³⁰ Oco omanu va puyuka eteke liepanduvali.

³¹ Epata lia Isareli lia luka onduko yaco, liti, Mana. Ca setahãla ovasa a yela. Okupepa kuaco kua lisoka lokupepa kuakende owiki.

³² Mose yu wa popia hati, Ca popia Yehova ceci, hati, Omeri ya mana yaco yi solekiwila ovitumbulukila viene, okuti va tala ombolo yaco ndo lisi lisi vekalasoko eci ndo wupi vofeka ye Egito.

³³ Wa popia la Arone hati, Nyañula ombia, kapamo omeri ya mana, yi tumbika ku Yehova, oku yi solekela ovitumbulukila viene.

³⁴ Ndeci yehova a sapuila Mose, haico Arone a linga, wa yi tumbika kovaso yocikasa covisila okuti yi solekiwa.

³⁵ Va Isareli va lialia mana akui akuãla kanyamo toke va pitila kofeka va tunga. Va lialia mana toke veya kovikanjo viofeka ya Kanana.

³⁶ Ekui liolomeri ovio via soka lefa limosi.