ETUNDILO 15 - Embimbiliya - Bíblia Sagrada em Umbundu

¹ Mose la va Isareli va imbila Yehova ocisungo eci, vati, Njimbila Yehova, eye wa tulamẽla ca piãla.

² Yehova eye ongusu yange haeye ocisungo cange. Wa ndingila eyovo liange. Eye Suku yange, ndu sivaya. Eye Suku ya tate, ndu kemainya.

³ Yehova eye ukuavita. Yehova oyo onduko yaye.

⁴ Akãlu ovita a Fareo lolohoka viaye wa vimba vokalunga, Vakesongo vaye va velapo va vomba vo Kalunga Kakusuka.

⁵ Alondo a va tuvika. Va lokila valondo ovava ndewe.

⁶ Ondio yove, a Yehova, yi kemãlẽla ongusu. Ondio yove, a Yehova, yi sãsõla unyali.

⁷ O yula ava va ku katukila lunene wulamba wove wa piãla. O va votuila onyeño yove, yi va lia, huti ño asĩla owangu.

⁸ Ovava a lundika lofela yanyũlu ove. Ovava a lua a talama ndi. Alondo a likuata vokati kokalunga.

⁹ Unyali wa linga hati, Ndandula, Ha sanga. Ha lianjela olohute. Oñeyi yange yi puila kokuavo. Ndi pola osipata yange. Eka liange li va nyõla.

¹⁰ Ove wa sikisa ofela yove, okalunga ka va tuvika. Va vomba ndosumbu vovava a tanda.

¹¹ A Yehova, wa lisoka love pokati kolosuku hẽ elie? Wa lisoka love hẽ elie? Ulamba wove oku kola. Ovilinga viove vi lingisa usumba, o lingainga ovikomo.

¹² Wolõla ondio yove. Ongongo ya va ina.

¹³ Wa songuila locisola ka ci pongoloka omanu wa yovola. Wa va endisa longusu yove toke kocitungilo cove ci kola.

¹⁴ Vakualofeka va ci yeva va luluma. Olongembia via kuata olonungi via Filisiti.

¹⁵ Oco olosoma via Edome via yokoka. Akulu va Moavi va luluma. Olonungi viosi via Kanana via yenguluka.

¹⁶ Ocinjoko lusondi vi va wila. Omo unene wokuokuo kuove wa lua oco vohã ño, va soka ndewe, ka va lisengi, toke omanu vove va pita, a Yehova, toke omanu wa yovola va pita.

¹⁷ A Yehova, ove o va iñisa, o va tuika vomunda yove. O va tumalisa vocitumãlo cina wa ci litungila ove muẽle oku tumalamo. Onumbuko yaco yi kola, a Yehova, ovaka ove a yangiliya.

¹⁸ Yehova o viala olotembo ka vi pui.

¹⁹ Momo eci cosi Fareo eya laco ca iñila vokalunga, cokuti otuvalu tuaye lakãlu aye ovita, la vakuakuendela kotuvalu tuaye, oco Yehova wa nena vali ovava okalunga kuenje cosi ca tuvikiwa lao. Va Isareli puãi va endela posi ya kukuta vokalunga.

²⁰ Oco Miriama, mukãi wa Arone, eye uprofeto, wa nyañula opandelu, kuenje akãi vosi vo kuama konyima va sika olopandelu loku cĩla.

²¹ Miriama wa va imbila, hati, Imbili Yehova, omo wa tulamẽla ca piãla. Okavalu lu wa endelako wa va imba vokalunga.

²² Mose wa songuila va Isareli. Va tunda ko Kalunga Kakusuka kuenje va iñila vekalasoko lia Siuri. Va enda oloneke vitatu vekalasoko kuenje ka va sangele ovava.

²³ Leci veya ko Mara ka va tẽlele oku nyua ovava a Mara, omo a lula. Oco va tukuila onduko yaco vati, Mara.

²⁴ Omanu va lisiõsuĩla Mose vati, Tu nyua nye?

²⁵ Eye wa vilikiya ku Yehova, kuenje Yehova wo lekisa uti, Eye wa wimba vovava kuenje ovava aco a pongoloka, a pepa. Oko Yehova a va sowila ocisila lociholo haiko a va nyikila.

²⁶ Wa linga hati, Nda vu yevelela ocili kondaka ya yehova, Suku yene, loku linga eci co sunguluka, loku yevelela kovihandeleko viaye, loku lava ovisila viaye viosi, ovoveyi ana nda vetisa lao va Egito siu vetisi lao ene, momo ame ndi Yehova ndusakuli wene.

²⁷ Kuenje veya ke Elimi oko kua kala ekui liolono kolono vivali viovava, kuenda akui epanduvali koviti vieva. Va tungila ocilombo ocipepi lovava aco.