ETUNDILO 13 - Embimbiliya - Bíblia Sagrada em Umbundu

¹ Yehova wa popia la Mose hati,

² Tumbiki kokuange olonuñulu viosi. Wosi pokati ka va Isareli wa penda onjila, ndaño omunu, ndaño ocinyama, wange muẽle.

³ Mose yu wa popia lomanu vaco hati, Ivaloki eteke lietaili omo olio eteke wa tundi vofeka ye Egito, vonjo yupika, momo Yehova wo wupimo longusu yeka liaye. Ka ci tava oku lia ombolo yi kuete etumbisa.

⁴ Etaili muẽle wu tunda, vosãi ya Aviva.

⁵ Kuenje eci Yehova a wiñisi vofeka ya va Kanana la va Hiti la va Amori kuenda va Hiwi la va Yevusi, yina a likuminya la vaisiene oku wihi, haiyo ofeka yi tumõha asenjele lowiki, ene vu lingainga efendelo eli vosãi yilo.

⁶ Oloneke epanduvali vu lialia ombolo ka yi kuete etumbisa. Keteke liepanduvali vu lingila Yehova ofesta.

⁷ Ombolo ka yi kuete etumbisa oyo yi liwa oloneke epanduvali. Ombolo yi kuete etumbisa ka yi ka muiwile kokuene. Ndaño etumbisa ka li ka molẽhele kokuene vovikanjo viene viosi.

⁸ Eteke liaco omunu o lombuluila omolaye, hati, ndi ci lingila oku ivaluka eci Yehova a ndingila eteke nda tunda ke Egito.

⁹ Cu lingili ndondimbukiso yopeka pamue ndonjivaluko yokocipala, okuti ocihandeleko ca Yehova ci kala vovimẽla viene. Omo Yehova wo wupili ve Egito leka lia pama.

¹⁰ Oco ene wivaloki ociholo eci kosãi yilo unyamo kunyamo.

¹¹ Kuenje eci Yehova a wiñisi vofeka ya Kanana ndeci a likuminya lene lolosekulu viene kuenje o vu yiha,

¹² ene vu tumbika ku Yehova olonuñulu viosi vina via penda onjila. Lolonuñulu viosi vialume viovinyama vi lingavo via Yehova.

¹³ Onuñulu yosi yocimbulu vu yi yovola lokameme, nda omunu ka pangele oku yi yovola o yi teya osingo. Olonuñulu viosi vialume viomanu vu vi yovola.

¹⁴ Noke kovaso, eci omõla a pula hati, Eci ca lomboloka ndati? ove unjali u lomboluila huti, Yehova wa tupa ve Egito, vonjo yupika, leka lia pama.

¹⁵ Momo eci Fareo a likala muẽle oku tu eca oco Yehova wa ipa olonuñulu viosi viofeka ye Egito, olonuñulu viomanu lolonuñulu viovinyama. Oco ndumbila Yehova olonuñulu viosi vialume, vina vi penda onjila. Puãi olonuñulu viosi viomãla vange muẽle ndi vi yovola.

¹⁶ Ci linga ndondimbukiso yopeka liove pamue ndonjivaluko yokocipala cove. Momo Yehova wa tu upa ve Egito leka lia pama.

¹⁷ Eci Fareo a tava oku eca omanu, Suku ka va songuilile vonjila yovofeka ya va Filisiti, ndaño oyo yonimbu. Momo Suku wa linga hati, Sanga mbi omanu va pongoloka eci va mõla ovita, kuenje va tiukila ke Egito.

¹⁸ Puãi Suku wa kondisa omanu vonjila yovekalasoko li lisungue lo Kalunga Kakusuka. Va Isareli va tunda tupu ve Egito, lovimãlẽho va mãleha ale.

¹⁹ Mose wambata akepa a Yosefe. Momo Yosefe wosikile va Isareli hati, Suku o wivaluki. Oco eci vu tunda kulo wambati akepa ange.

²⁰ Oco va tunda ko Sukoti, va lala ve Etami konẽle yekalasoko.

²¹ Yehova wa va pitila kovaso. Kutanya wa endela vongunji yelende oku va songuila vonjila Kuteke wa endela vulienge wondalu oku va muĩsa ocinyi, okuti lutanya luteke va tẽla oku enda.

²² Ongunji yelende kutanya, kuenda ulienge wondalu kuteke, ka via tundile kovaso yomanu.