ETUNDILO 12 - Embimbiliya - Bíblia Sagrada em Umbundu

¹ Yehova wa popia la Mose kuenda Arone vofeka ye Egito hati,

² Kokuene osãi yilo yi linga efetikilo liolosãi. Yu lingili osãi yatete kunyamo.

³ Sapuili owiñi wosi wa va Isareli, hoti, Eteke liekui kosãi yilo va kuate onjo okameme, onjo okameme, okuti apata osi a kuata otumeme.

⁴ Nda onjo yimue yitito okuti ka yi tẽla okameme, oco ukuanjo yaco lu va lisungue olonjo va likongele oku landa kamue ka soka lomanu vaco. Ca soka leci ca lia omunu omunu oco va litepela pokati ondando yokameme.

⁵ Okameme kene ka ka ka kale letondelo. Ka kale okolume ka tẽla unyamo. Vu ka nola pamue kolomeme pamue kolohombo.

⁶ Vu ka soleka toke keteke liekui lakuãla liosãi yilo. Oñolosi yeteke liaco va Isareli vosi va ipãla otumeme tuavo.

⁷ Va nyañula osonde yimue, va yi nyila kovikuli vivali lokovipamba violonjo omu va tu lila.

⁸ Uteke waco haiwo va lia ositu yaco ya yokiwa. Va yi lila kumosi lombolo ka yi kuete etumbisa kuenda ovikũla vi lula.

⁹ Ka ci tava oku yi lia owisu, ndaño oku yi teleka lovava, te ya yokiwa londalu, lutue waco, kumosi lakoto levi viovokati.

¹⁰ Ko ka supisipo cimue toke komẽle. Nda cimue ca siala toke komẽle ci yoki londalu.

¹¹ Oku yi lia, yi li ndomo: iñi pimo, olohaku viene polomãi, olombueti viene povaka, vu yi lia lonjanga. Eyi oyo o Pascoa ya Yehova.

¹² Momo uteke waco mita vofeka ye Egito. Nyõla olonuñulu viosi viofeka ye Egito, ndaño viomanu ndaño viovinyama. Njambulavo olosuku viosi vi Egito, ame ndi Yehova.

¹³ Osonde, oyo yu lingili ondimbukiso kolonjo omu vu kasi. Eci mõla osonde ndu lomboki, Kuenje ene lalimue efengi liu wili oku vu nyõla eci mbeta ofeka ye Egito.

¹⁴ Eteke liaco liu lingili eteke lionjivaluko, vu li ivaloka lofesta ya Yehova. Ovitumbulukila viene viosi vi li ivaloke ndociholo ka ci pui.

¹⁵ Oloneke epanduvali vu lia ombolo ka yi kuete etumbisa. Eteke liatete vu upa etumbisa volonjo viene. Momo nda umue o lia ombolo yi kuete etumbisa tunde keteke liatete toke keteke liepanduvali omunu waco o tepiwa ku va Isareli.

¹⁶ Eteke liatete vu linga efendelo liowiñi wosi, loketeke liepanduvali vu lingavo efendelo liowiñi wosi. Oloneke viaco laumue upange u lingiwa. Eci omunu a lia oco lika ci tava oku ci talavaya.

¹⁷ Vu lingainga ofesta yombolo ka yi kuete etumbisa, momo eteke liaco hailio ndopa olohoka viene vofeka ye Egito, oco wivaloki eteke liaco kovitumbulukila viene ndociholo ka ci pui.

¹⁸ Koñolosi yeteke liekui lakuãla liosãi yatete vu lia ombolo ka yi kuete etumbisa toke koñolosi yeteke liakui avali lamosi liosãi.

¹⁹ Oloneke epanduvali ka mu ka sangiwe etumbisa volonjo viene, momo nda umue o lia eci ci kuete etumbisa omunu waco o tepiwa ku va Isareli, ci kale ukombe, ci kale onyitiwe yofeka.

²⁰ Ka vu li muẽle eci ci kuete etumbisa. Volonjo viene viosi vu lialia ombolo ka yi kuete etumbisa.

²¹ Oco Mose wongolola akulu vosi va va Isareli, wa popia lavo hati, Onjo lonjo yi nole okameme ka soka lomanu vayo. Yipale okameme ko Pascoa.

²² Nyañuli ovisapa vi ohisope, vi yavi vosonde yi li pelonga, osonde yaco yi kasi pelonga yi tiapuli kocipamba lokovikuli vivali. Pokati kene lomue ka ka pite vuvelo wonjo yaye toke komẽle.

²³ Omo Yehova o pita oku nyõla va Egito. Leci a mõla osonde kocipamba lokovikuli vivali Yehova o pitahãla uvelo waco, ka tava okuti ocinyõi ciñila volonjo viene oku u nyõli.

²⁴ Leci, ene vu ci lingainga otembo ka ye pui ndociholo cene lomãla vene.

²⁵ Eci vu pitila vofeka Yehova o wihi ndomo a likuminya, lamovo vu lingainga ociholo eci.

²⁶ Eci omãla vene vo puli vati, Ociholo eci ca lomboloka ndati?

²⁷ ene vu kumbulula, hoti, Eci oco ocilumba co Pascoa ya Yehova momo wa pitãhala olonjo via va Isareli ve Egito eci a nyõla va Egito, puãi wa popela olonjo vietu. Kuenje omanu va petama, va fendela.

²⁸ Kuenje va Isareli va enda, va ci linga. Ndeci Yehova a sapuila Mose la Arone haico va linga.

²⁹ Pokati kuteke Yehova wa nyõla olonuñulu viosi viofeka ye Egito, tunde konuñulu ya Fareo wa tumãla komangu yusoma, toke konuñulu yomandekua ya kala vokaliavoso, lolonoñulu viosi viovinyama.

³⁰ Fareo wa votoka uteke, eye muẽle lakuenje vaye vosi, la va Egito vosi, kuenje ve Egito mua kala okulila kualua, omo ka kua kaile onjo omu ka mua file umue.

³¹ Oco wa kovonga Mose la Arone uteke, wa linga hati, Votoki! Tundi vofeka yange, lene la va Isareli. Kuendi, ka fendeli Yehova ndeci wa popia.

³² Ambativo oviunda viene violomeme lolohombo, loviunda viene violongombe, ndeci wa popi. Kuendi. Sumuluĩsivo ame.

³³ Va Egito lavovo va vetiya ca lua omanu vaco okuti va tunda lonjanga vofeka, omo va linga vati, Vosi tua fa ale.

³⁴ Oco omanu va yelula ombolo yavo yowisu osimbu ka mua endele etumbisa, ovimanda viaco va vi kutila puwalo wavo, va kapa ovikutila kovitẽi viavo.

³⁵ Va Isareli va lingavo ndondaka ya Mose, va lomba ku va Egito evi vioku liposuisa viopalata lulu, kuenda uwalo.

³⁶ Yehova wa inalisa omanu vaco la va Egito, okuti va va iha cosi va pinga. Oco va linga ndoku punda va Egito.

³⁷ Oco va Isareli va tunda ko Ramesese, veya ko Sukoti. Owini waco pamue mbi wa soka lovita epandu kolohulũkãi vialume va endela posi, akãi lomãla ka va tendiwilepo.

³⁸ Lowiñi walua womanu vaiñi vaiñi wa va kuama, kuenda ovinyama viakahandangala okuti oviunda violomeme lolohombo, levi violongombe.

³⁹ Va yoka akende ka a kuete etumbisa, ombolo yina yowisu va tunda layo ke Egito. Ka ya kaile letumbisa omo va tundisua lonjanga ve Egito. Oku talamẽla ka ca tavele. Kuenje ka vangiliyile okulia.

⁴⁰ Osimbu yaco yosi va Isareli va kala ve Egito ya soka lovita vikuãla kakui atatu kanyamo.

⁴¹ Kefulilo liovita vikuãla kanyamo kanyamo akui atatu okuti, eteke liaco muẽle hailio, oco olohoka viosi via Yehova via tunda vofeka ye Egito.

⁴² Ku Yehova uteke waco wa linga uteke woku lavulula, okuti o vopa vofeka ye Egito. Oco, ku va Isareli vosi lokovitumbulukila viavo viosi uteke waco u lingavo uteke woku lavulula, ndonjivaluko yoku ivaluka Yehova.

⁴³ Yehova wa popia la Mose la Arone hati, Ociholo co Pascoa ci kuete ovihandeleko evi: ukuafeka yiñi ka ka lieko.

⁴⁴ Puãi upika wosi wa landiwa lolombongo o tẽla oku liako nda vo sevisa ale evamba.

⁴⁵ Ocingendeleyi pamue ondingupange yi fetiwa ka ka lieko.

⁴⁶ Va lile vonjo yimosi. Ositu yaco ko ka endi layo posamua. Ko ka teyipo limue ekapa.

⁴⁷ Va Isareli vosi va ci lingainge.

⁴⁸ Nda ukombe wa tunga lene kuenje o yongola oku lingila Yehova o Pascoa alume vaco vosi va sevisue evamba. Kovaso yaco oco ci tava eye oku kokela ha lingi. Eye o lisoka lonyitiwe yofeka. Puãi ociyamba ka ci ka lieko.

⁴⁹ Ku kala ocihandeleko cimosi, ci kale onyitiwe, ci kale ukombe o kasi laye.

⁵⁰ Oco ca linga va Isareli vosi. Ndomo Yehova a sapuila Mose la Arone haimo va linga.

⁵¹ Eteke liaco hailio muẽle Yehova opa va Isareli vofeka ye Egito, ava lolohoka viavo, ava lolohoka viavo.