ETUNDILO 11 - Embimbiliya - Bíblia Sagrada em Umbundu

¹ Yehova wa popia la Mose hati, Mbandekako vali eyambulo limosi ku Fareo loku egito, noke o weci ho tundiko. Eteke a weci u tundisi vosi olumue.

² Sapuila omanu huti, ulume ulume a pinga u a lisungue laye, lukãi ukãi a pinga u a lisungue laye, evi vioku liposuisa viopalata lulu.

³ Yehova wa inalisa omanu vaco la va Egito. Kuenda vali Mose layevo wa kemãla ca lua vofeka ye Egito. Wa sumbiwa lakuenje va Fareo lomanu vosi.

⁴ Mose wa linga hati, Ca popia Yehova ceci, hati, Vokati kuteke mita ve Egito.

⁵ Olonuñulu viosi viofeka ye Egito vi fa, tunde konuñulu ya Fareo wa tumãla komangu yuviali toke konuñulu yukãi upika o kasi pocisulilo, lolonuñulu viosi viovinyama.

⁶ Vofeka yosi ye Egito mu kala okulila kua lua, kua soka lakuo ka kua la kala, lokovaso ka ku kala vali.

⁷ Puãi ku va Isareli vosi, ci kale omunu, ci kale ocinyama, lomue o va lamba, ndaño ombua ka yi va kuila. Oco ene vu limbuka okuti Yehova ukuakutepisa pokati ka va Egito la va Isareli.

⁸ Akuenje vove vosi veya kokuange, va petamẽla kokuange vati, Va tundemo, lomanu vosi va ku kuama lavovo. Noke nunda. Kuenje wa tunda ku Fareo lonyeño ya lua.

⁹ Yehova yu wa popia la Mose hati, Fareo ka ku yevi okuti ovikomo viange vi lua vofeka ye Egito.

¹⁰ Mose la Arone va lingila ovikomo evi viosi kovaso a Fareo, kuenje Yehova wa tĩlĩsa utima wa Fareo. Ka ecele va Isareli ha va tundi vofeka yaye.