ETUNDILO 10 - Embimbiliya - Bíblia Sagrada em Umbundu

¹ Yehova yu wa popia la Mose hati, Kuende ku Fareo momo nda tĩlĩsa utima waye lovitima via kuenje vaye okuti ndekisa olondimbukiso evi viange pokati kavo.

² Nda ci lingilavo okuti ove o sapula komõlove kuenda konekulu yove ndomo nda yola epembe va Egito. O sapulavo olondimbukiso nda linga pokati kavo, ene ho limbuki okuti ame ndi Yehova.

³ Oco Mose la Arone va enda ku Fareo, va popia laye vati, Ca popia Yehova, Suku ya va Heveru, ceci, hati, Okulikala kuove oku sambela kokuange ku sulila eteke lipi? eca omanu vange ha va fendela.

⁴ Momo nda ku tava oku eca omanu vange, hẽla nena olohuma kofeka yove.

⁵ Vi vumba osi yosi cokuti umue oku mõla osi ka ci tava. Vi lia ocisupe ca ku supila kociwe. Vi lia oviti viove viosi viovusenge.

⁶ Vi yukisa olonjo viove lolonjo viakuenje vove vosi, lolonjo via va Egito vosi, ndaño vaso, ndaño vaisiavo ka va la ci mõla tunde kokucitiwa kuavo toke ketaili lilo. Oco wa ñualapo kuenje wa tunda ku Fareo.

⁷ Akuenje va Fareo va popia laye vati, Omunu u, oku tu yokokisa kuaye ku sulila pi? Eca omanu vaco ha va fendela Yehova Suku yavo. Kua limbukile handi okuti Egito ya nyolẽha?

⁸ Oco va nena vali Mose la Arone ku Fareo, yu Fareo wa popia lavo hati, Kuendi. Ka fendeli Yehova suku yene. Puãi ava va enda velie?

⁹ Mose wa linga hati, Tu enda lamalẽhe lakongo, lomãla vetu valume lomãla vetu vakãi. Loviunda vietu violomeme lolohombo, loviunda vietu violongombe, viosi tu enda lavio, momo tu lingila Yehova ofesta.

¹⁰ Oco wa popia lavo hati, yehova a kale lene, nda ndu weci ene lomãla vene. Ahĩ! Uvi waco sio limbukile nga! Wa seleki okanyoha vombenje.

¹¹ Si kuatako. Alume ci tava. Va ende. Va ka fendele Yehova, momo oco wa yongoli. Kuenje va va tundisa ku Fareo.

¹² Oco yehova wa popia la Mose, hati, Oluĩla eka liove kofeka ye Egito oco olohuma viye kofeka ye Egito ha vi li ovikũla viosi viofeka, viosi via supa kociwe.

¹³ Mose yu woluĩla ombueti yaye kofeka ye Egito kuenje utanya waco wosi luteke waco wosi Yehova wa sikisila ofeka ofela yokutundilo. Eci kua ca omẽle ofela yokutundilo ya nena olohuma.

¹⁴ Olohuma viaco vieya kofeka yosi ye Egito, via wila vovikanjo viosi vie Egito. Via kãla cimue. Konyima yavio ka kua la kala olohuma via soka lavio, lokovaso ka ku kala vali ndovio.

¹⁵ Momo via vumba osi yosi, ofeka yosi ya tekãva. Via lia ovikũla viosi viovofeka, lapako osi oviti a supa kociwe. Ka kua siale cimue ci talala kofeka ye Egito, ndaño uti ndaño ocikũla covepia.

¹⁶ Oco Fareo wa yayulako oku kovonga Mose la Arone. Wa popia lavo hati, Nda linga ekandu ku Yehova, Suku yene, kuenda kokuene.

¹⁷ Oco ngeceli handi ekandu liange onjanja yilo lika. Likutilili ku Yehova Suku yene ha njupi ño okufa oku.

¹⁸ Oco Mose wa tunda ku Fareo, wa likutilila ku Yehova.

¹⁹ Yehova wa ñualisapo ofela yokutakelo, ya yelula olohuma, ya vimba vo Kalunga Kakusuka. Lalumue olohuma lua siala kovikanjo viosi vie Egito.

²⁰ Yehova puãi wa tĩlĩsa utima wa fareo, kuenje Fareo ka tavele oku eca va Isareli.

²¹ Yehova yu wa popia la Mose hati, Oluĩla eka liove kilu, oco ku kale owelema kofeka ye Egito kuenje omanu va papatela vowelema.

²² Oco Mose woluĩla eka liaye kilu kuenje kua kala owelema wowi vofeka yosi ye Egito oloneke vitatu.

²³ Ka va limuile. Oloneke vitatu lomue wa votoka, puãi va Isareli vosi va kala locinyi volonjo viavo.

²⁴ Fareo yu wa vilikiya Mose hati, Kuendi. Ka fendeli Yehova. Omãla vene va endevo lene. Loviunda viene violomeme lolohombo, loviunda violongombe vi siale.

²⁵ Kuenje Mose wa linga hati, Te o tuihavo evi viovilumba levi viokupia elisi ha tu vi lumbila Yehova suku yetu.

²⁶ Oco ovinyama vietu te tu enda lavio muẽle, lalimue ekonjo li siala konyima omo opo tu upa vioku fendela lavio Yehova suku yetu. Kuenje ka tua kũlĩhile evi tu fendela lavio Yehova te tu pitila oko.

²⁷ Puãi Yehova wa tĩlĩsa utima wa Fareo kuenje ka tavele oku va eca.

²⁸ Oco Fareo wa popia laye hati, Ove nunde! Lunguka! Ku ka mbanje vali kocipala, omo eteke o mõla kocipala haico o fa.

²⁹ Eye Mose hati, Ci lingiwe mũele ndeci wa popia. Si mõli vali ocipala cove.