ETUNDILO 1 - Embimbiliya - Bíblia Sagrada em Umbundu

¹ Omãla va Isareli va iñila ve Egito, vana veya la Yakoba, omunu lonjo yaye, omunu lonjo yaye, olonduko viavo vievi,

² Ruvene, Simeone, Lewi la Yuda,

³ Isakare, Sevulono la Benjamini,

⁴ Dani la Nafitali, Gadi la Asiere.

⁵ Epata liosi lia Yakoba lia tẽla akui epanduvali komanu. Yosefe wa kala ale ve Egito.

⁶ Noke Yosefe wa fa la vahuvaye vosi locitumbulukila caco cosi.

⁷ Omãla va Isareli va licita calua, va siata muẽle, va lua, va pama enene, ve yuka vofeka.

⁸ Ke Egito kua viala osoma yokaliye ka ya kulĩhĩle Yosefe.

⁹ Wa popia lomanu vaye, hati, Omanu vaco va Isareli valua enene, haivo va pama, etu tu sule.

¹⁰ Oco tu lunguki lavo sanga va laika oku lua enene kuenje nda ovita viya va livandeka kovanyãli vetu oku liyaka letu loku tunda vofeka.

¹¹ Oco va va kapela asongui oku va yambula lupange. Kuenje va tungila Ramesese.

¹² Puãi ndaño va va yambula ca lua haimo va licita vali enene, kuenje va sambukila vali kolonẽle. Oco va Egito va kuatela va Isareli ohele,

¹³ kuenje va Egito va fũkĩlisa va Isareli lupange.

¹⁴ Va sakalaisa omuenyo wavo lupange wa tĩla woku kosa onata loku tunga olondopi lupange wosi wokovapia. Okuvumba kuavo kuosi va va vumbaisa lefũki.

¹⁵ Soma ye Egito wa pañinya akãi va Heveru vakuakuovolola, ukuavo onduko yaye Sifira, ukuavo onduko yaye Puwa.

¹⁶ Wa popia lavo hati, Nda wendi oku kuatisa omisi ukãi u Heveru, eci vu-u mola komangu yoku cita, omolaco nda ulume, wipayi, puai nda ukãi, a kale lomuenyo.

¹⁷ Puãi vakuakuovolola vaco va sumbila Suku, ka va lingile ndomo mua va handeleka osoma ye Egito, va popela omuenyo womãla vaco valume.

¹⁸ Oco Soma ye Egito wa kovonga vakuakuovolola vaco, wa va pula hati, Wa ci lingili nye okuti wa popeli omuenyo womãla valume?

¹⁹ Vakuakuovolola va kumbulula Fareo vati, Momo akãi va Heveru ka va lisokele lakãi va Egito. Va nyanga enene, vakuakucita lika wavo osimbu ukuakuovolola ka pitilile handi kokuavo.

²⁰ Oco Suku wa sumũluisa vakuakuovolola. Omanu va licita calua haivo va pama enene.

²¹ Kuenje omo vakuakuovolola va sumbila Suku oco Suku wa va muĩsa apata.

²² Fareo yu wa handeleka omanu vaye vosi hati, Omõla wosi ulume o citiwa ku va Isareli wimbi volui, puãi omõla wosi ukãi a kale lomuenyo.