ESTER 9 - Embimbiliya - Bíblia Sagrada em Umbundu

¹ Oco kosãi yekui lavali, ndokuti osãi ya Adara, keteke liekui latatu kosãi yaco, eci va sima oku linga ondaka ya Soma locihandeleko caye, hailio eteke anyãli va va Yudea va yonguile oku va yula, puãi eteke liaco lia pongoloka eteke va Yudea va yula anyãli vavo,

² oco va Yudea vokolofeka viosi via Soma Ahasuero va liongoluila vovaimbo avo oku yakela vana va pangele oku va talisa ohali. Kuenje lomue wa kala lutima oku yaka lavo, momo usumba wa va Yudea wa kuata omanu vosi.

³ Oco olombuale viosi violofeka lava vanene lolombiali kuenda ava va linga upange wa Soma, vosi va kuatisa va Yudea, momo va kuata usumba wa Mordekai.

⁴ Momo Mordekai unene vonjo ya Soma. Ekemãlo liaye lia yevala kolofeka viosi, kuenje Mordekai wamamako lunene.

⁵ Oco va Yudea va yaka lanyali vavo losipata, va va ipaya, va va kundula, kuenje va linga ndomo va panga lava va va suvuka.

⁶ Kombala muẽle ya Siusana va Yudea va ipaya kuenda va kundula ovita vitãlo komanu.

⁷ Va ipayavo Parisiandata la Dalifone la Asipata

⁸ kuenda Porata la Adaliya la Aridata

⁹ la Parimasiata la Arisa la Aridai kuenda Wayiseta,

¹⁰ ovo omãla ekui va Hamana, omõla a Hamedata, haeye unyali wa va Yudea; puãi ka va pundile cimue.

¹¹ Eteke liaco hailio va sapuila Soma ava vosi va fila vombala ya Siusana.

¹² Kuenje Soma wa popia la Inakulu Ester, hati, Vombala ya Siusana va Yudea va ipaya ovita vitãlo komanu, va ipayavo omãla ekui va Hamana. Nda oco, va ipaya vañami kolofeka vikuavo via Soma? Kaliye epingilo liove lie? Liu ku lingiwila. Kuenje onjongole yove ye vali? Yu ku lingiwila.

¹³ Oco Ester hati, Nda Soma o panga, va Yudea va sangiwa vo Siusana, hẽla va linge vali ndomo va lingile etali londaka ya Soma. Kuenje va nyengeleke omãla ekui va Hamana vocalẽla.

¹⁴ Noke Soma wa popia hati, Oco ci lingiwe; kuenje wa imba oluiya vo Siusana, kuenda va nyengeleka omãla ekui va Hamana.

¹⁵ Va Yudea va kala vo Siusana va liongololavo keteke liekui lakuãla kosãi ya Adara, kuenje va ipaya ovita vitatu komanu vo Siusana. Puãi ka va pundile cimue.

¹⁶ Va Yudea vakuavo va kala kolofeka via Soma va liongololavo ha va popela omuenyo wavo kuenje va sanga epuyuko kanyali vavo. Va ipaya akui epanduvali lavitãlo kolohũlũkãi viava va va suvuka; puãi ka va pundile cimue.

¹⁷ Ca pita keteke liekui latatu kosãi ya Adara, kuenje va puyuka keteke liekui lakuãla. Oco va tukula eteke liaco eteke liofesta lesanju.

¹⁸ Puãi va Yudea va kala vo Siusana va liongolola keteke liekui latatu leteke liekui lakuãla kuenje va puyuka keteke liekui latãlo, kuenje va tukula eteke liaco okuti eteke liofesta lesanju.

¹⁹ Oco va Yudea vovovaimbo, vana va kala vovaimbo ka a kuete ovimbaka, va linga eteke liekui lakuala kosãi ya Adara eteke liesanju lofesta kuenda epuyuko, hailio eteke va tuma olombanjaile omunu omunu.

²⁰ Oco Mordekai wa sonẽha ovina evi. Wa tuma ovikanda ku va Yudea vosi va kala volofeka viosi via Soma Ahasuero, ava va kala ocipepi, lava va kala kupãla.

²¹ Wa va handeleka okuti va tata eteke liekui lakuãla leli liekui latãlo kosãi ya Adara, unyamo kunyamo.

²² Oloneke viaco vivalokaiwa omo ovio oloneke va Yudea va sanga epuyuko kovanyali vavo. Osãi yaco yivalokaiwa omo oyo osãi esumuo liavo lia pongoloka esanju, lokulila ndonambi kua pongoloka epuyuko. Wa handeleka okuti oloneke viaco vi linga oloneke violofesta lonjolela, haivio oloneke vioku tuma olombanjaile omunu lomunu loku eca oviali kolosuke.

²³ Oco va Yudea va likapela oku linga eci va fetikile ale, kuenda ndeci Mordekai a va sonehẽla.

²⁴ Momo Hamana, u Agagi, omõla a Hamedata, haeye unyãli wa va Yudea vosi, wa tumbilile va Yudea ehãla lioku va kundula, kuenje wa va imbilile ocela ca Puri, ca lomboloka ocela coku va nyõla loku va kundula.

²⁵ Puãi eci Ester eya kovaso a Soma, Soma wa tuma ovikanda ndokuti ocisimĩlo cĩvi ca Hamana, cina a simililile va Yudea, ciya kutue waye muẽle, kuenda okuti vo nyengeleka kumue lomãla vaye kocalẽla.

²⁶ Oco va tukula oloneke viaco oloneke via Puri, omo va ta ocela ca Puri. Kuenje Oku sokolola cosi ca sonẽhiwa vukanda waco, leci va mõla, leci ca pita lavo,

²⁷ oco va Yudea va tava okuti ovo muẽle kuenda ovitumbulukila viavo, la vosi va litokeka lavo, va ivaloka muẽle unyamo kunyamo oloneke viaco vivali ndomo ca sonehiwa vukanda wa Mordekai.

²⁸ Va tava okuti oloneke viaco vivalukiwa loku tatiwa toke kovitumbulukila viosi, epata lepata, ofeka lofeka, imbo limbo, ndokuti oloneke evi via Puri ka vi ka liwekepo pokati ka va Yudea, ndaño onjivaluko yavio ka yi ka fulile, yenda hũ pokati kovitumbulukila viavo.

²⁹ Oco Inakulu Ester, omõla a Abihaili, kuenda u Yudea Mordekai va soneha oku tolisa ukanda wavali woku lombolola Puri.

³⁰ Va tuma ovikanda ku va Yudea vosi va kala volofeka ocita lakui avali lepanduvali viuviali wa Ahasuero. Va kisika lombembua locili

³¹ okuti oloneke via Puri vivalukiwa ndeci via tukuiwa kuenda ndeci u Yudea Mordekai kuenda Inakulu Ester va lomboluila va Yudea loku likisika ovo muẽle loku kisika ovitumbulukila vi va kuãi oku tẽlisa oloneke viavo vioku likandangiya okulia loku litetela.

³² Ocihandeleko ca Inakulu Ester ca tõlisa ovihõlo evi via Puri kuenje ca sonehiwa.