ESTER 8 - Embimbiliya - Bíblia Sagrada em Umbundu

¹ Keteke liaco Soma Ahasuero wa eca ku Inakulu Ester onjo ya Hamana, unyali wa va Yudea. Kuenje Mordekai weya ku Soma, momo Ester wa sapuila Soma okuti eye inanu yaye.

² Soma wopa onẽla komuine waye, yina opile Hamana, yu wa yeca ku Mordekai. Kuenje Ester wa piñalisa Mordekai kunene wosi wo konjo ya Hamana.

³ Noke Ester wa popia vali la Soma loku limba kolomãi viaye loku livondela lasuelẽla okuti o nyõla usuanji wa Hamana u Agagi lehãla liaye lĩvi lioku kundula va Yudea.

⁴ Oco Soma wa ilika Ester ohunya yulu,

⁵ kuenje Ester wa katuka, wa talama kovaso a Soma. Wa popia hati, Nda ci sanjuisa Soma, kuenda nda Soma wa sanjukila, kuenda nda Soma wa sima hati, Ca sunguluka, kuenda nda utima wa Soma wa njelela, oco ocihandeleko ci sonẽhiwe oku nyõla ovikanda via Hamana, u Agagi, omõla a Hamedata, vina eye a sonẽhela oku nyõla va Yudea va kasi volofeka viosi via Soma.

⁶ Momo nela ndati oku mõla ohali yiya kepata liange? Pamue nela ndati oku mõla ekundu lia vangandiange?

⁷ Oco Soma Ahasuero wa popia la Inakulu Ester kuenda Mordekai u Yudea, hati, Ota, onjo ya Hamana nda yeca ku Ester. Hamana vo nyengeleka kocalẽla momo wa yonguile oku ipaya va Yudea.

⁸ Oco kondaka ya va Yudea sonehi ño cosi wa pangi. Sonehi vonduko ya Soma, kuenda ci sitikiwe lonẽla ya Soma. Momo oluiya lua sonẽhiwa vonduko ya Soma loku sitikiwa lonẽla ya Soma lomue omunu o tẽla oku lu nyõla vali.

⁹ Koloneke viaco, kosãi ya tatu, haiyo osãi ya Siwana, keteke liakui avali latatu, va kovonga asonehi va Soma. Kondaka ya va Yudea, va soneha oluiya ndeci Mordekai a handeleka. Ondaka yaco va yi tuma kolombiali lolonguluvulu lolombuale violofeka tunde ki India toke ke Etiopia okuti ocita lakui avali lepanduvali kolofeka. Ofeka lofeka va yi sonehela locisonẽhua cayo, kuenje epata lepata lelimi Uaho. Va Yudea lavovo va va sonẽhela locisonẽhua cavo lelimi liavo.

¹⁰ Va soneha vonduko ya Soma Ahasuero kuenje va ci sitika lonẽla ya Soma. Ovikanda viaco va vi tuma lavakuakuambata ovikanda va endela kotuvalu tu kuete olupesi tuna tu linga upange wa Soma, haituo tua tunda kombuto yotuvalu tua Soma.

¹¹ Vovikanda viaco Soma wa tava okuti va Yudea vovovaimbo osi va liongolola ha va popela ovimuenyo viavo. Wa va iha omoko yoku nyõla loku ipaya loku kundula vosi va va katukila ha va yaki lavo, nda va tunda pi nda pi, ndaño oku ipaya omãla vavo lakãi vavo loku punda ovikuata viavo.

¹² Wa tukuila olofeka viosi via Soma Ahasuero eteke limuamue okuti eteke liekui latatu kosãi yekui lavali, okuti osãi ya Adara.

¹³ Ukanda waco woluiya wa tumiwa kolofeka viosi, londaka yaco ya sapuiwa komanu vosi. Kuenje ca taviwa okuti eteke liaco va Yudea va mala oku liangiliya oku fetuluinya anyali vavo.

¹⁴ Oco vakuavikanda va endela kotuvalu tuavo tu kuete olupesi tuna tu lingainga upange wa Soma, va enda lonjanga ndomo Soma a va kisika. Oluiya luaco lua tunda vombala ya Siusana.

¹⁵ Noke Mordekai wa tunda kovaso a Soma. Wa wala uwalo wusoma u tekavelua kuenda u yela. Wa walavo ekolowa linene liulu kuenda onanga ya fina yovalatanya lohusu. Imbo lia Siusana lia yolela kuenda lia sanjuka.

¹⁶ Haico ku va Yudea kua kala ocinyi lesanju lonjolela kuenda esumbilo.

¹⁷ Kuenje volofeka viosi lovovaimbo osi omu mua yevala ondaka ya Soma locihandeleko caye, va Yudea va kala lesanju lonjolela lofesta kuenda oloneke viepuyuko. Kuenje omanu va lua vakuafeka va litukula vati, Tu va Yudea, momo usumba wa va Yudea wa va kuata.