ESTER 7 - Embimbiliya - Bíblia Sagrada em Umbundu

¹ Oco Soma la Hamana va iñila kofesta ya Inakulu Ester.

² Kuenje keteke liavali, eci va kala loku nyua ovinyu, Soma wa pula vali Ester hati, A Inakulu Ester, epingilo liove lie? Liu ku lingiwila. Onjongole yove ye? Ndaño oku eca ombandu yuviali wange ci tava.

³ Kuenje Inakulu Ester wa tambulula hati, A Soma, nda wa sanjukila kuenda nda Soma wa panga, popela omuenyo wange, olio epingilo liange. Popelavo epata liange, oyo onjongole yange.

⁴ Momo tua landisiwa, ame lepata liange, ha va tu nyõli, ha va tu ipaya loku tu kundula. Nda tua landisiwile ño ha tu lingi apika valume lapika vakai nda sia popele cimue; momo ohali yetu nda yi sule, epese lia Soma nda lia lua.

⁵ Oco Soma Ahasuero wa popia la Inakulu Ester hati, Helie omunu waco, kuenje o kasi pi, ukuasiata ndoyo?

⁶ Ester wa tambulula hati, Unyãli haeye omakuli hayu, Hamana! Kuenje Hamana usumba ka li kuete kovaso a Soma lo kovaso a Inakulu.

⁷ Oco Soma wa tunda kofesta lonyeño ya lua, wa iñila vocumbo coloneleho ca kala velombe. Hamana puãi wa siala ha pingi omuenyo waye ku Inakulu Ester, momo wa limbuka okuti Soma wa panga oku u linga cĩvi.

⁸ Noke Soma wa tunda kocumbo coloneleho celombe, weya vali konjo yofesta yovinyu kuenje wa mola Hamana a kala loku kupukila kula oko Ester a kala. Kuenje Soma wa pula hati, Wa yonguile oku nyõla Inakulu kovaso ange vonjo yange? Eci olondaka evi via tunda vomela wa Soma, va tuvika ocipala ca Hamana.

⁹ Kuenje Harivona, umue pokati kanuku va vumba Soma, hati, Tala, ocalẽla Hamana a tungila Mordekai, una ondaka yaye ya popela Soma, ci kasi konjo ya Hamana, ci kuete akuĩ atãlo kovikeya.

¹⁰ Kuenje Soma wa popia hati, U nyengelekiko eye muẽle. Oco va nyengeleka Hamana kocalẽla Hamana a angiliyilile Mordekai. Oco onyeño ya Soma ya imuha.