ESTER 6 - Embimbiliya - Bíblia Sagrada em Umbundu

¹ Vuteke waco muẽle Soma ka pekelele otulo. Wa pinga oku u nenela elivulu liasapulo ovilinga viwa, yu vo li tangela.

² Kuenje va sanga ocisonẽhua citi, Mordekai eye wa sapuile ondaka ya Bigitana la Terese, anuku vavali vakuambundi ya Soma vana va yonguile oku ponda Soma Ahasuero.

³ Oco Soma wo pula hati, Mordekai hẽ, wa ci tambuila ulamba we pamue ekemalo lie? Akuenje va Soma va kumbulula vati, Lacimue co lingiwila.

⁴ Noke Soma hati, Helie o vocindumba? Ca kala Hamana wa iñila vocindumba celombe hã ha vangula la Soma ondaka yoku nyengeleka Mordekai kocalẽla wo sokiyila.

⁵ Oco akuenje va Soma vo tambulula vati, U o kasi vocindumba, Hamana. Oco Soma hati, A iñile.

⁶ Leci Hamana a iñila, Soma wo pula hati, Nye va lingila omunu Soma a yongola oku kemalisa? Hamana wa sima hati, Helie vali wa mbelapo okuti Soma a yongola oku kemãlisa okuti ame sule?

⁷ Oco Hamana wa kumbulula Soma, hati, Omunu Soma a yongola oku kemalisa vo lingile ndomo:

⁸ Va nene uwalo wa Soma una muẽle u wala wala Soma. Va nenevo okavalu kana ka endaila Soma haiko ka kuete ekolowa liuviali kutue wako.

⁹ Uwalo waco lokavalu kaco va vi ece ku umue pokati kolombuale via velapo via Soma. Eye a walise omunu waco Soma a yongola oku kemalisa. Vo wendisile kokavalu loku ñuala ñuala laye volokololo vimbo. Va imbile okuiya kovaso aye, vati, Eci oco ci lingiwila omunu Soma a yongola oku kemalisa.

¹⁰ Oco Soma wa popia la Hamana hati, Yayulako. Tambula uwalo lokavalu, ndomo wa popia. Ci lingila muẽle u Yudea Mordekai wa tumayala pombundi ya Soma. Ku ka sieko ndaño cimosi kuevi wa tukula.

¹¹ Kuenje Hamana wa tambula uwalo kumosi lokavalu, yu wa walisa Mordekai, kuenda wo wendisila kokavalu, loku pita laye volokololo vimbo, loku u wimbila oluiya, luti, Eci oco ci lingiwila omunu Soma a yongola oku kemalisa.

¹² Kovaso yaco Mordekai wa tiukila vali pombundi ya Soma. Puãi Hamana wa enda konjo yaye lonjanga loku lila, kuenda wa lisikĩlila kutue.

¹³ Kuenje Hamana wa lomboluila ukãi waye Seresi lakamba vaye vosi eci cosi ca pita laye. Oco olonganji via Hamana lukãi waye Seresi vo tambulula vati, Nda Mordekai una ove wa tepuluiwa ale kovaso aye, ocili ukuambuto yu Yudea, ku tẽla ale oku u yula, puãi o kupukila kolomãi viaye.

¹⁴ Osimbu va kala loku popia laye ovina evi, vakuelombe lia Soma veya hã ha va tuala Hamana lonjanga kofesta ya sokiya Ester.