ESTER 5 - Embimbiliya - Bíblia Sagrada em Umbundu

¹ Oco keteke liatatu Ester wa wala uwalo waye wu Inakulu kuenje wa talama vocindumba covokati conjo ya Soma, kovaso yocitumãlo ca Soma. Soma wa tumãla kocalo caye velombe kovaso yuvelo wocitumãlo.

² Eci Soma a mõla Inakulu Ester o kasi vocindumba, co sanjuisa, yu Soma wa ilika Ester ohunya yulu ya kala peka liaye. Ester wa iñila kuenje wa lamba kosungu yohunya.

³ Oco Soma wa popia laye hati, A Inakulu Ester, ndati? Epingilo liove lie? Ota, ndaño ombandu yuviali wange yu ku ihĩwa.

⁴ Ester wa kumbulula hati, Nda ku Soma ca sunguluka, Soma eye etali kumosi la Hamana kokulia ndo sokiyila.

⁵ Kuenje Soma wa popia hati, Yayuisiko Hamana, oco tu linge eci Ester a yongola. Kuenje Soma la Hamana veya kokulia kua sokiya Ester.

⁶ Eci handi va kala loku nyua ovinyu, Soma wa pula Ester hati, O pinga nye? Va ku cĩha. Onjongole yove ye? Yu ku lingiwila ndaño ombandu yuviali wange.

⁷ Puãi Ester wa kumbulula hati, Epingilo liange lonjongole yange yeyi:

⁸ Nda Soma wa sanjukila, kuenda nda ca sunguluka ku Soma oku nyiha eci minga kuenda oku ndingila onjongole yange, Soma hẽla eye kumosi la Hamana kokulia ha va sokiyila kuenje hẽla ha tukula eci Soma a mula.

⁹ Kuenje Hamana keteke liaco wa tunda lesanju kuenda onjolela. Puãi eci Hamana a mõla Mordekai kombundi ya Soma, loku u votokela lakamue ndaño oku u lulumĩla, wa felukila Mordekai lonyeño ya lua.

¹⁰ Haimo lumue Hamana wa likandangiya, wa enda konjo yaye; yu wa pañinya akamba vaye pamosi la Seresi ukãi waye.

¹¹ Oco Hamana wa va sapuila ulamba wukuasi waye, lowiñi womãla a kuete, lomo Soma o vokiyako vali kunene, leci o velisapo pokati kolombuale lakuenje velombe.

¹² Kuenje Hamana wamisako vali hati, Ndaño Inakulu Ester lomue a laleka kumosi la Soma oku enda kofesta yinene a sokiya te ame lika. Kuenda wa ndaleka vali okuti hẽla ngenda pamosi la Soma.

¹³ Haimo evi viosi ka vi sanjuisa eci mõla u Yudea Mordekai wa tumãla pombundi ya Soma.

¹⁴ Oco ukãi waye Seresi kumosi lakamba vaye vosi vati, Ku tungiwe ocalẽla ci kuete akuĩ atãlo kovikeya oku lepa, kuenje omele sapuila Soma huti, Va nyengelekeko Mordekai, oco wende noke lesanju kumosi la Soma kokulia. Ondaka oyo Hamana yo sunguluka, yu wa tuma oku tunga ocalẽla.