ESTER 4 - Embimbiliya - Bíblia Sagrada em Umbundu

¹ Oco eci Mordekai a yeva cosi ca pita, wa tola uwalo waye, wa wala ikelei loku lisieketa letiko. Wa enda pokati kimbo loku kuakua londaka yinene yocinguva.

² Wa pitila toke kombundi ya Soma, puãi lomue wa wala ikelei o tẽla oku iñila kombundi ya Soma.

³ Kuenda kolofeka viosi, kuna ondaka ya Soma locihandeleko caye via pitila, kua kala esumuo lialua pokati ka va Yudea, loku likandangiya okulia loku lila kuenda oku likekemba, kuenje va lua va pekela pikelei lopetiko.

⁴ Eci afeko va Ester kuenda anuku vaye veya vo ci sapuila, Inakulu co vala ca piãla. Wa tuma uwalo oku walisa Mordekai, hã ha lula ovikelei, puãi eye ko tavele.

⁵ Oco Ester wa kovonga Hatake, umue pokati kanuku va Soma, una Soma a wihilepo, yu wo tuma ku Mordekai oku kũlĩhisa nda hẽ nye kuenda ci tuala pi.

⁶ Hatake wa enda ku Mordekai kuenje wo sanga vocila ci kasi ocipepi lombundi ya Soma.

⁷ Mordekai wo sapuila cosi ca pita laye. Wo lomboluilavo ndomo Hamana a likuminya oku eca olombongo hati, Ndi vi ecela ekundu lia va Yudea hã ha vi kapiwa vombango ya Soma.

⁸ Mordekai wo wihãvo ukanda wocihandeleko coku va nyõla wa sonẽhiwila vo Siusana. Wo wiha lawo okuti u lekisa ku Ester loku u u lomboluila kuenda oku kundika Ester ocikele coku enda ku Soma hã ho livondela loku pingilako epata liaye.

⁹ Eci Hatake a tiuka wa lomboluila Ester olondaka viosi via Mordekai.

¹⁰ Ester wa popia la Hatake kuenda wo tuma oku sapuila Mordekai, hati,

¹¹ Vosi vakualomangu via Soma kuenda omanu vosi volofeka via Soma va ci okuti nda ulume nda ukãi wa iñila ku Soma vocindumba covokati osimbu ka kovongiwile, kuli ocihandeleko cimosi lika. Wosi, nda helie nda helie, o sanga oku fa, te una Soma a ilika ohunya yulu eye o kala lomuenyo. Ame pokati kakuĩ atatu a koloneke Soma ka ñovongele okuti nyiñila kokuaye.

¹² Kuenje va sapuila Mordekai olondaka evi via Ester.

¹³ Mordekai wa tuma ekumbululo ku Ester hati, Ku ka sokolole huti, Omo ñasi velombe muluka, ndaño va Yudea vosi vakuavo ka va puluka.

¹⁴ Momo nda wa liuwulapo olumue oloneke vilo, epopelo leyovo lia va Yudea li tunda kumue kuiñi, puãi ove lonjo ya isiove vu taka. Helie o ci nda otembo yaco yilo oyo ove wa nolelua oku linga Inakulu yofeka?

¹⁵ Oco Ester wa tuma vali ekumbululo ku Mordekai hati,

¹⁶ Kuende, kongolole va Yudea vosi va kasi vo Siusana. Va liñandangiyile okulia, ka va ka lie ndaño oku nyua oloneke vitatu, lutanya luteke. Ame lafeko vange letuvo tu likandangiya okulia ndene. Oco noke ngenda ku Soma, ndaño ocihandeleko citi, Ka ci tava oku enda. Nda fa, fa muẽle.

¹⁷ Oco Mordekai wa enda yu wa linga cosi Ester o handeleka.