ESTER 3 - Embimbiliya - Bíblia Sagrada em Umbundu

¹ Kovaso yovina evi Soma Ahasuero wa londisa Hamana omõla a Hamedata u Agagi, komangu ya velapo. Wo kemãlisa poku wiha omangu ya velapo, okuti olomangu violombuale viosi via kala laye vi sule.

² Akuenje vosi va Soma va kala kala pombundi ya Soma va petayama ha va fendela Hamana; momo oco Soma a handeleka ha vo ci lingila. Puãi Mordekai ko petamelele pamue oku u fendela.

³ Oco akuenje va Soma, vana va kala kala pombundi ya Soma, va pula Mordekai vati, Nye wa tombela ondaka ya Soma?

⁴ Omo vo ci popaisa eteke keteke lopo eye ka ci kapeleko, oco va ci sapuila Hamana, hã ha va vanji nda hẽ eci ca popia popia Mordekai cu yowisa; momo wa va sapuila hati, Ndu Yudea.

⁵ Oco, eci Hamana a ci mõla okuti Mordekai ko petameleleko ho fendela, Hamana onyeño yaye ya wenguka.

⁶ Puãi kokuaye oku ipaya Mordekai lika, citito. Momo vo sapuilile epata lia Mordekai, yu Hamana wa sanda oku nyõla vakuepata lia Mordekai vosi, okuti va Yudea vosi va kala vuviali wa Ahasuero.

⁷ Kosãi yatete, okuti osãi ya Nisani, kunyamo wekui lavali kovava a Soma Ahasuero, va imbaimba ocela ca Puri kovaso a Hamana eteke leteke. Kuenda va cimbaimba osãi losãi toke kosãi yekui lavali okuti osãi ya Adara.

⁸ Kuenje Hamana wa sapuila Soma Ahasuero hati, Vuviali wove mua lisandeka epata limue. Epata liaco lia sandokaila pokati kapata akuavo volofeka viosi. Omanu vaco ovihandeleko viavo via litepa levi viomanu vakuavo vosi, kuenda ka va tava kovihandeleko via Soma, oco ka ci kuatisa Soma oku kala lavo.

⁹ Oco, nda ca sunguluka ku Soma, va ci sonẽhe okuti va va ipe, kuenje ame ngeca ku vakalei kolombongo viosoma ekui liolohũlũkãi violotalendo viopalata ndokuti vi kapiwa vombango ya Soma.

¹⁰ Kuenje Soma wa fuomola onẽla yaye komuine, yu wa yiha Hamana, u Agagi, omõla a Hamedata, haeye unyali wa va Yudea.

¹¹ Kuenda Soma wa popia la Hamana hati, Kala ño lolombongo viove, omanu vaco puãi, linga lavo ndeci o panga, va kasi povaka ove.

¹² Kuenje oco va kovonga asonẽhi va Soma keteke liekui latatu kosãi yatete, kuenje cosi ca tumiwa la Hamana va ci sonẽha. Va ci sonẽhela asongui vovita lolonguluvulu violofeka viosi lolombuale viofeka lofeka, ofeka lofeka locisonẽhua cavo, omanu lomanu ndelimi liavo. Ca sonẽhiwa vonduko ya Soma Ahasuero kuenda onẽla ya Soma ya kapiwako.

¹³ Oco ovikanda viaco via tumiwa povaka a vakuakutuala ovikanda kolofeka viosi via Soma. Vovikanda viaco mua sonehiwa hati, Nyõli va Yudea vosi. Va ipayi loku va kundula tunde komãla toke kakulu, lakãi loloñaña. Ci malusuli veteke liongongo okuti keteke liekui latatu liosãi yekui lavali yokuti osãi ya Adara. Noke pundi ovipako viavo.

¹⁴ Kofeka lofeka kua tumiwa ukanda waco ndokuti va kapa ocihandeleko komanu vosi ha va kapelako keteke liaco.

¹⁵ Oco vakuakuambata ovikanda va yayulako ndondaka ya Soma. Oluiya luaco lua imbiwavo vombala ya Siusana. Soma la Hamana va tumãla oku liola, puãi imbo linene lia Siusana lia tokotelua.