ESTER 2 - Embimbiliya - Bíblia Sagrada em Umbundu

¹ Ovina evi eci via pita, kuenda onyeño ya Soma Ahasuero ya tulumuha, oco Soma wa ivaluka Wasiti leci a lingile, leci wo silililepo.

² Kuenje akuenje velombe, vana va vumba Soma, va popia vati, Va vanjiliyile Soma afeko volondambi.

³ Soma a kape kolofeka viosi viusoma waye vakualonduko ha vongoluila vonjo yakãi velombe lia Siusana afeko volondambi. Va laviwe la Hegai, enuku lia Soma haeye utati wakãi. Va vaihe ulela woku wava.

⁴ Kuenda ufeko wosi wa yelela Soma kutima eye a tumãle komangu ya Wasiti. Eci ca sanjuisa Soma, kuenje wa ci linga.

⁵ Vombala ya Siusana mua kala ulume umue u Yudea, onduko yaye Mordekai. Eye omõla a Yairi, omõla a Simei, omõla a Kisi ukuepata lia Benjamini,

⁶ una wambatiwile ko Yerusalãi lolohute vina viambatiwile kumuamue la Yekonia, Soma ya Yuda, una Nevukandesa, Soma ya Bavulono, ambatele.

⁷ Undeti Mordekai wa tekula Hadasa, haeye Ester, omõla a inanu yaye, omo ka kaile la isiaye ndaño inaye. Ufeko waco wa posoka kuenda ondambi muẽle. Eci isiaye la inaye va fa, Mordekai wo tambula ndomõlaye muẽle.

⁸ Oco, eci ca yevala cina ca tumila ocihandeleko caco oku liongoluila afeko va lua vombala ya Siusana peka lia Hegai, va nenavo Ester konjo ya Soma ha tatiwa la Hegai utati wakãi.

⁹ Kuenje Hegai wa sanjukila ufeko waco yu wo lingila ocame, Wa kuata onjanga yoku eca ku Ester ulela woku waveka leteku lia velapo, haico oku wihavo afeko epanduvali va noliwa velombe. Wo tuma kumosi lafeko vaye apa pa velapo vonjo yakãi.

¹⁰ Ester ka sapuile omanu vaye pamue epata liaye, omo Mordekai wo handeleka hati, Ku ka sapule epata liove.

¹¹ Eteke keteke Mordekai wa pita kocitali cakãi vosoma oku nyula Ester loku kũlĩhisa ndomo a kala.

¹² Eci ceyapo cufeko lufeko oku pitila ku Soma Ahasuero, pana ndokuti pa pita ale olosãi ekui lavivali ndocihandeleko cafeko vaco, ha ci tẽlisua ocituwa caco coku liposuisa, okuti olosãi epandu oku liposuisa lulela wa tĩla, lolosãi epandu lolonguendu vi leha ciwa lovina vikuavo vioku liposuisa,—

¹³ eci ufeko a molusula okuliangiliya kuaco oco iñila ku Soma kuenje cosi a yongola vo ciha ha endi laco konjo ya Soma.

¹⁴ Koñolosi iñila, komele o tunda, enda konjo yavali yakãi, o kala peka lia Siasigase, enuku lia Soma, ukuakulava akama. Ka tiukila vali ku Soma te nda Soma wo yongola vali ho kovonga londuko yaye.

¹⁵ Eci ceya okuti Soma wa kovonga Ester, omõla a Abihaili, inanu ya Mordekai, una o tambuile ndomõlaye muẽle, oco Ester lacimue a pinga te eci ca tukula Hegai, enuku lia Soma, haeye ukuakutata akãi. Omanu vosi va mõla Ester vo sanjukila.

¹⁶ Kuenje eci Ester vo tuala ku Soma Ahasuero konjo ya Soma kosãi yekui, haiyo osãi ya Tevete, kulima wepanduvali wuviali waye,

¹⁷ oco Soma wo sola ca piãla, akãi vosi vakuavo ci sule, wo sanjukila ca velapo, afeko vakuavo ci sule, oco wo walisa kutue ekolowa liusoma ho lingi Inakulu komangu ya Wasiti.

¹⁸ Oco Soma wa lingila ofesta olombuale la vakualomangu viunene; oyo ofesta ya Ester. Olofeka wa vi ecela oku feta ovolambu kuenda wa eca olombanjaile vinene viukuasi waye wuviali.

¹⁹ Eci vongolola vali afeko, Mordekai wa tumayala pombundi ya Soma.

²⁰ Toke opo Ester ka situluile epata la vangandiaye, ndeci Mordekai o lungula. Momo Ester wa Pokola kondaka ya Mordekai nda cina o tekula.

²¹ Kuenje koloneke viaco vina Mordekai a tumayala pombundi ya Soma, Bigitana la Teresi, anuku vavali haivo vakuambundi ya Soma, va tema ca piãla yu va Yongola oku ipaya Soma Ahasuero.

²² Eci ca ka yevala ku Mordekai, Mordekai wa ci sapula Inakulu Ester, leye Ester wa ci sapuilavo Soma vonduko ya Mordekai.

²³ Kuenje va kulĩhisa ondaka yaco. Eci ya sangiwa okuti yocili, kavali kavo vakuambundi va va nyengeleka vuti. Kuenda ca sonehĩwa velivulu liasapulo kovaso a Soma.