ESTER 1 - Embimbiliya - Bíblia Sagrada em Umbundu

¹ Soma Ahasuero wa viala tunde ki India toke ke Etiopia. Wa viala olofeka ocita lukui avali lepanduvali.

² Eci Soma Ahasuero a tumãla kocalo caye cusoma vombala ya Siusana,

³ kunyamo watatu wuviali waye, oco wa lingila ofesta yinene olombuale, lapalanga usoma, lasongui vovita va Persia la Media, lomanu vanene lolonguluvulu violofeka viaye.

⁴ Ofesta yaco wa yi lingila oku lekisa ovokuasi lulamba wusoma waye leposo liuviali waye. Ofesta yaco ya tumala osimbu okuti ocita lakui ecelãla koloneke.

⁵ Eci oloneke viaco via pua, Soma wa lingilavo ofesta yinene vosi vakuambala ya Siusana, tunde kuava vanene toke kuava va sule. Ofesta yaco ya kala oloneke epanduvali vocumbo coloneleho ca kala vocitali celombe.

⁶ Vonjo yaco mua kala olonanga vi yela levi vi tekãvelua. Va vi nyoñamisa kovinunga viopalata lovikolo via fina levi viohusu, haico kolongunji viovawe a nina. Kua kalavo ovola ulu lopalata a kapiwa posi yovawe a tĩla lavala añi añi.

⁷ Wa va nyuisila volokopo viulu viñi viñi. Lovinyu vielombe via lua via kalako ndukuasi wosoma.

⁸ Okunyua kuaco kua kala locihandeleko, okuti lomue o pangisa ukuavo; momo Soma wa sapuila vakalei kaye vosi hati, Vosi va linge ndomo va panga.

⁹ Inakulu Wasiti layevo wa lingila akãi vakuelombe ofesta vonjo ya Soma Ahasuero.

¹⁰ Keteke liepanduvali eci Soma a kolua, Soma wa tuma Mehumana la Bisita la Harivona kuenda Bigita la Avageta la Setala la Karikasi, ovo anuku epanduvali va vumba Soma Ahasuero ndakuenje vaye,

¹¹ hati, Wasiti ka wupi, u neni kulo kokuange. A wale ekolowa liaye liusoma okuti ndekisa komanu lokolombuale eposo liaye; omo eye ondambi ca lua.

¹² Puãi Inakulu Wasiti ka tavele oku iya ndomo Soma a tuma lakuenje vaye. Oco Ca funguisa ca lua Soma, kuenje onyeño yaye ya wenguka.

¹³ Noke Soma wa pula olonganji viovihandeleko, haivo va kulĩha ndomo mu lingaiwa, momo oco Soma a lingainga la vosi va kũlĩha ovihandeleko loku tetulula.

¹⁴ Ava vo kuãi kunene vava: Karisina la Setare la Adimata la Tarsisi kuenda Merese la Mariasema la Memukana, ovo olombuale epanduvali via Persia la Media, haivo va mõla mõla ocipala ca Soma, haivo vakualomangu viatete vusoma.

¹⁵ Oco Soma wa pula hati, Oku kuama ovihandeleko tu linga nye la Inakulu Wasiti, omo ka tavele kocihandeleko ca Soma Ahasuero ndomo a ci tumila lanuku vaye?

¹⁶ Oco Memukana wa tambulula kovaso a Soma lo kovaso olombuale hati, Hakusomako lika Inakulu Wasiti a lueyela, puãi wa lueyelavo kolombuale viosi lo komanu vosi vo kolofeka viosi via Soma Ahasuero.

¹⁷ Omo ondaka eyi, eci yi ka pitila kakãi vosi, lavovo va ka pembula vaveyavo vati, Soma Ahasuero wa tumile ku Inakulu Wasiti hati, Eye kokuange, puãi eye ka tavele.

¹⁸ Etali muẽle akãi va Persia la va Media, ava va yeva ale ndomo Inakulu a linga, va ci vangula lolombuale, kuenje kuiya etombo lonyeño ya lua.

¹⁹ Nda Soma o panga, a tume ocihandeleko cusoma, kuenda ci sonẽhiwe pokati kovihandeleko via va Persia la va Media okuti ka ci tava oku ci pongolola. A handeleke, hati, Wasiti ka keye vali ku Soma Ahasuero. Soma a piñalisepo umue wo velapo.

²⁰ Leci ocihandeleko ca Soma ci yevala kuoha kusoma waye, haiwo usoma unene ca lua, oco akãi vosi va sumbila vaveyavo, tunde kuava vanene toke kuava va sule.

²¹ Onumbi eyi ya sanjuisa Soma lolombuale, kuenje Soma wa linga ndeci Memukana a popia.

²² Wa tuma ovikanda kolofeka viosi viusoma waye, kofeka lofeka locisonehua cavo, komanu lomanu ndelimi liavo. Wa tuma okuti ulume lulume a viale konjo yaye, kuenje o handeleka ndeci co sunguluka.