ESITULUILO 9 - Embimbiliya - Bíblia Sagrada em Umbundu

¹ Ungelo watãlo wa sika olumbeta luaye, kuenje nda mola olumbungululu luokilu lua lokila posi. Osapi yekungu lionjembo ya eciwa kokuaye.

² Eye wa yikulula ekungu lionjembo, lo vekungu liaco mua tunda owisi, huti ño owisi wofolono yinene, kuenje owisi wovekungu wa vuvalisa ekumbi lofela.

³ Kowisi kua tunda olohuma vieya kilu lieve. Kokuavio kua eciwa omoko ndomoko yanyenya kilu lieve.

⁴ Kokuavio kua sapuiwa okuti ka vi ka nyõle owangu wokilu lieve, pamue cimue ci talala, pamue oviti, te omanu avandeti ka va kuete ondimbukiso ya Suku kovipõlo viavo.

⁵ Va vi usika okuti ka vi ka va ipaye, te okuti va yambuiwa ño olosãi vitãlo. Otokua yeyambulo liavo ya soka ndeyi yomunu wa lumaniwa lenyenya.

⁶ Oloneke viaco omanu va ka sanda oku fa kuenje ka va ku sangi, va livela okufa, okufa puãi ku va tila.

⁷ Kokumoleha, olohuma viaco via setahala otuvalu tua malehela ovita. Kovitue viavio kua kala cimue ca setahala akolowa ulu. Ovipala viavio via setahala ovipala viomanu.

⁸ Ocifuko ca setahala ocifuko cakãi, ovayo avio a setahala ovayo olohosi.

⁹ Via kala lakaka a setahala ovimaleho viutale. Okuõla kuavava avio kua lisoka londukuso yakalu alua lotuvalu tua lua tu kanduila kovita.

¹⁰ Via kala lovicĩla via setahala anyenya, kuenda olosongo. Kovicĩla oko ku kasi ongusu yoku yambula omanu olosãi vitãlo.

¹¹ Vi kasi losoma yavio, eye ungelo wonjembo. Onduko yaye, velimi lia va Heveru, Abadone, Velimi lia va Helasi onduko yaye Apoliyono.

¹² Ohali yatete ya pita, ota, kuiya vali olohali vivali.

¹³ Oco ungelo wepandu wa sika olumbeta luaye, kuenje nda yeva ondaka yimue ya tunda kolombinga vikuãla viutala wulu u kasi kovaso ya Suku.

¹⁴ Ya popia lungelo wepandu wa kala lolumbeta, yiti, Kutulula ovangelo vakuãla va kutiwa, haivo va kasi polui lunene Ferati.

¹⁵ Oco va kutulula ovangelo vakuãla, vana va kala loku talamela ola leteke losãi kuenda ulima ndokuti va kundula ombandu yatatu yomanu.

¹⁶ Owiñi wolohoka via endela kotuvalu wa soka olohuluwa vivali violohuluwa. Nda yeva okutendiwa kuaco.

¹⁷ Otuvalu nda mola vocinjonde tua kala ndomo: Ava va endelako va kala loviyepelo kolonete. Avala oviyepelo viaco a kala atatu, okuti limue li kusuka ndondalu, limue li tekava, kuenda limue lia soka ndocikole. Ovitue viotuvalu via setahala ovitue violohosi. Kolomela viatuo kua tunda tunda ondalu lowisi lelemba liofuofuo.

¹⁸ Kovinyõi viaco vitatu kua kunduka ombandu yatatu yomanu, ndokuti kondalu lo kowisi lo kelemba liofuofuo via tunda kolomẽla viatuo.

¹⁹ Momo ongusu yotuvalu yi kasi kolomẽla lo kovicĩla. Ovicĩla viatuo via setahala olonyoha, vi kuete ovitue, haivio otuvalu tu nyõla nyõla lavio.

²⁰ Kuenje omanu va supapo, okuti vava ka va file lovinyõi viaco, haimo ka va sumuilile ovilinga viovaka avo, ndokuti ka va liwekele oku fendela aspiritu ãvi, pamue oviteka viulu, levi viopalata, levi viutale wosipi, levi viovawe, levi vioviti, evi ka vi tẽla oku vanja, pamue oku yeva, pamue oku enda.

²¹ Ka va sumuililevo okuponda kuavo, pamue ovombanda avo, pamue ukahonga wavo, pamue okupunda kuavo.