ESITULUILO 6 - Embimbiliya - Bíblia Sagrada em Umbundu

¹ Oco nda ci mola eci Kameme a teya limue kasitikilo epanduvali. Nda yevavo ocendalomuenyo cimue pokati koviendalomuenyo viaco vikuãla, ca popia ndondaka yocilemĩlo, citi, Enju.

² Oco nda vanja kuenje nda mola okavalu kamue ka yela, lu wa endelako wambata ohonji. Vo wiha ekolowa liusoma, yu wa tundila oku yula loku amamako oku yula.

³ Eci a teya esitikilo liavali nda yeva ocendalomuenyo cavali ca linga citi, Enju.

⁴ Kuenje kueya okavalu kaiñi ka kusuka nge. Lu wa endelako vo wiha oku imula ombembua kilu lieve, okuti omanu va liponda. Vo wihavo osipata yinene.

⁵ Eci a teya esitikilo liatatu nda yeva ocendalomuenyo catatu ca linga citi, Enju. Oco nda vanja kuenje nda mola okavalu ka tekava, lu wa endelako wa kala lombalãsa peka.

⁶ Nda yeva pokati koviendalomuenyo viaco vikuãla cimue ca soka ndondaka ya linga yiti, Onjongo yotiliku yi landa osingu, lolonjongo, vitatu viosevata vi landa osingu, ulela loviniyu puãi ku ka vi nyõle.

⁷ Eci a teya esitikilo liakuãla nda yeva ondaka yocendalomuenyo cakuãla ca linga citi, Enju.

⁸ Oco nda vanja kuenje nda mola okavalu kocimembia, u wa endelako onduko yaye Kufa. Njembo wa kala loku enda laye pamuamuo. Va va iha omoko yombandu yakuãla yokilu lieve, okuti va kundula losipata lonjala lokufa kuenda lovinyama viovusenge viokilu lieve.

⁹ Eci a teya esitikilo liatãlo nda mola vemehi litutala ovilelembia viava va pondiwila ondaka ya Suku luvangi va imba.

¹⁰ Ovo va vilikiya lolukandi, vati, A Cime cetu, ove o kola, haive wukuacili. Eteke lipi o tetulula loku fetuluinyila osonde yetu kuava va tunga kilu lieve?

¹¹ Kovaso yaco va ihiwa olonanga vi yela, kuenje va va sapuila vati, Amisipo naito oku puyuka toke vakuavo lava vasitue lavo va suapo, okuti vava va laika oku pondiwa ndene muẽle.

¹² Eci a teya esitikilo liepandu nda vanja, kuenje kua pita ocilemawe ca lua. Ekumbi lia pongoloka oku tekava ndocikelei, losãi ya moleha ndosonde.

¹³ Olombungululu viokilu via lolukila posi, ndeci ci lolula ukuyu ambungue awo nda wa tuñunyiwa lofela ya lua.

¹⁴ Ilu lia wungiwa ndociña. Olomunda viosi lovifuka viosi via sondoluiwa polomangu viavio.

¹⁵ Kovaso yaco olosoma viokilu lieve, lakulu vanene, la vakesongo, kuenda olohuasi, lolombuale, lapika vosi, lomãla vamãle, vosi va salama valeva kuenda pokati kovawe o kolomunda.

¹⁶ Kuenje va popia lolomunda lovawe vati, Tu leñuhili. Tu vindikiyi kocipala cu wa tumala kocalo, kuenda konyeño ya Kameme.

¹⁷ Momo eteke linene lionyeño yavo lieya. U o tẽla oku tamalala lalio helie?