ESITULUILO 4 - Embimbiliya - Bíblia Sagrada em Umbundu

¹ Kovaso yovina evi nda vanja vali kuenje tala, kilu ku kasi epito liupulule. Londaka yina yatete, yina nda yeva loku popia lame, huti ño ondaka yolumbeta, oyo ya popia lame, yiti, Londela kulo, kuenje hu lekisa eci ci lingiwa kovaso yovina evi.

² Haico Espiritu lia mbuila, kuenje ota, kilu kua tumbikiwa ocalo, kocalo caco kua tumala umue.

³ U wa tumalako wa setahala ovawe a jaspe la sardio. Kocalo kua ñuala olukongolo lua setahala emeralda.

⁴ Kocalo kua ñuala akui avali kovialo kovialo vikuãla. Kovialo viaco kua tumala akui avali kakulu kakulu vakuãla. Va wala olonanga vi yela, lo kovitue viavo kua kala akolowa ulu.

⁵ Kocalo kua tunda oviliakulo lonjuvungo lovilemĩlo. Ovimihi epanduvali viondalu via taimila kovaso yocalo ovio aspiritu epanduvali a Suku.

⁶ Kovaso yocalo kua moleha huti ño ociva covitulu yi nina. Oku ñuala kocalo, kolonele viaco viosi, kua kala oviendalomuenyo vikuãla vie yuka ovaso konyima lo kovaso.

⁷ Ocendalomuenyo catete ca setahala ohosi, ocendalomuenyo cavali ca setahala onui, ocendalomuenyo catatu ca kala locipala ndomunu, ocendalomuenyo cakuãla ca setahala ongonga yulombo yi kasi loku palala.

⁸ Oviendalomuenyo viaco vikuãla vi kuete avava epandu, ocendalomuenyo avava epandu, ocendalomuenyo avava epandu. Kilu lo vemehi mue yuka ovaso. Utanya luteke ka va puyuka koku imba, vati, O kola, o kola, o kola, Yehova Suku Tõlo. Wa kala, o kasi, kuenda iya.

⁹ Osimbu oviendalomuenyo viaco vimba ulamba lesumbilo lolopandu kundeti wa tumala kocalo, yu o kasi ño-o hũ lomuenyo oloneke ka vi pui,

¹⁰ oco akulu vaco akui avali la vakuãla va wila posi kovaso u wa tumala kocalo, kuenje va fendela u o kasi ño-o hũ lomuenyo oloneke ka vi pui. Akolowa avo va a imba kovaso yocalo, loku imba vati,

¹¹ A Ñala yetu, a Suku yetu, wa posokela oku muisua ulamba lesumbilo lunene. Momo ove wa sovola ovina viosi. Vi kasilili ocipango cove, haico via lulikiwa laco.