ESITULUILO 3 - Embimbiliya - Bíblia Sagrada em Umbundu

¹ Sonehela ungelo wekongelo lio ko Sardesi, huti, Ca popia u o kuete aspiritu epanduvali a Suku, lolombungululu epanduvali, ceci, hati, Nda kũlĩha ovilinga viove. O kuete onduko okuti o kasi lomuenyo, haimo lumue wa fa.

² Pasuka. Kolisa eci ca siala haico ci yongolavo oku fa. Momo sia sangele ovilinga viove okuti via sunguluka kovaso a Suku yange.

³ Oco, ivaluka eci wa tambula leci wa yeva. Ci lava, kuenje ove muẽle likekembela akandu ove. Nda ku tava oku pasuka, ame njiya ndocimunu, lowola yaco njiya kokuove ku yi.

⁴ Haimo lumue, lopo o kuete olonduko vimue vo Sardesi, omanu vaco ka va liñisile olonanga viavo. Ovo va wala olonanga vi yela, kuenje va endaenda lame momo va ci sesamela.

⁵ U o yula o walisua ndomo olonanga vi yela kuenje si nyõli onduko yaye velivulu liomuenyo. Nukula onduko yaye kovaso a Tate lo kovaso ovangelo vaye.

⁶ U o kasi lovatui a yevelele eci Espiritu li popia lakongelo.

⁷ Sonehela ungelo wekongelo lio ko Filadélfia, huti, U o kola haeye ukuacili, haeye o kuete osapi ya Daviti, o yikulula kuenje lomue o yika, o yika kuenje lomue o yikulula, evi a popia vievi,

⁸ hati, Nda kũlĩha ovilinga viove. Limbuka ndomo nda kapa kovaso ove epito li kasi upulule, hailio lomue o tẽla oku li yila. Nda kũlĩha okuti okangusu o kasi lako katito, haimo lumue, wa pokola kondaka yange, kuenje kua likalele onduko yange.

⁹ Tala ndomo ndinga lava vakuasunangonga ya Satana, haivo va litukola vati, Tu va Yudea, ndaño hava Yudeako, cosi oku kemba lika. Eci ndinga lavo ceci, ndi va nena, ndi va kekamisila kolomãi viove, loku va limbukisa okuti ame nda ku sola.

¹⁰ Ove, omo wa pokola eci nda ku kisika epandi, oco hu lava eci kuiya okunyikiwa kuna ku kasi loku iya kuosi kilu lieve, oku nyika ava va tunga kilu lieve.

¹¹ Njiya ndopo. Kuata eci o kuete, okuti lomue o ku nyeha ekolowa liove.

¹² U o yula ndu lingisa ongunji vonembele ya Suku yange. Lalimue eteke a tundamo. Soneha kokuaye onduko ya Suku yange, londuko yimbo lia Suku yange, hailio Yerusalãi yokaliye yi tunda kilu ku Suku yange. Sonehavo onduko yange muẽle yokaliye.

¹³ U o kasi lovatui a yevelele eci Espiritu li popia lakongelo.

¹⁴ Sonehela ungelo wekongelo lio ko Laodikea, huti, Ca popia u o tukuiwa Amene, eye ombangi yina yocili lesunga, haeye efetikilo liovina Suku a lulika, ceci,

¹⁵ hati, Nda kũlĩha ovilinga viove, okuti ndaño oku talala kua talalele, ndaño oku tokota kua tokotele. Nda wa talalele, pamue wa tokotele nda hise.

¹⁶ Oco, omo wukuakalendewuya, ndokuti oku tokota kua tokotele, ndaño oku talala kua talalele, oco hu siya vomẽla yange.

¹⁷ Momo o linga huti, Ndihuasi, haime nda salala, kuenje lacimue nda suka, osimbu kua kũlĩhile okuti wa sekuka, haive wumumbe, wusuke, wumeke, haive wenda epõlõla.

¹⁸ Oco hu lungula okuti o landa kokuange ulu wa yenguluiwa londalu hu lingi ohuasi, loku landavo olonanga vi yela hu wala ndokuti osõi yepõlõla liove ka yi moleha, loku landa onguendu hu sieketa layo vovaso hu vanji.

¹⁹ Ame, vosi sole ndi va lungula loku va pokuisa. Oco kuata ombili, likekembela akandu ove.

²⁰ Tala, nãi kuvelo loku totola. Nda muli u o yeva ondaka yange kuenje o njuluila epito, nyiñila kokuaye, ndia laye, leye o lia lame.

²¹ U o yula ndu wiha oku tumala lame kocalo cange, ndomo ame nda yula, kuenje nda tumala la Tate kocalo caye.

²² U o kasi lovatui a yevelele eci Espiritu li popia lakongelo.