ESITULUILO 22 - Embimbiliya - Bíblia Sagrada em Umbundu

¹ Kovaso yaco wa ndekisa olui luovava omuenyo, hao opululu ndovitulu. Olui luaco lua tunda kocalo ca Suku la Kameme kuenje lu pita

² vokati kokololo yimbo. Kuenje sinya lilo liolui la sinya olio kuli uti womuenyo una wimaima apako ekui la avali aiñi aiñi, kuenje wa ecaeca epako liawo osãi kosãi. Amela uti waco a sakola olofeka.

³ Ka mu kala vali esiñalo, puãi mu kala ocalo ca Suku la Kameme, kuenda akuenje vaye vo fendaela.

⁴ Ovo va vanja vanja kocipala caye, londuko yaye yi kala kovipolo viavo.

⁵ Ka ku kala vali uteke. Ocinyi condiyelo ka ci yonguiwa, ndaño utanya wekumbi, momo Ñala Suku eye o linga ocinyi cavo, kuenje va viala oloneke vi enda ño-o hũ, ka vi pui.

⁶ Oco wa popia lame hati, Olondaka evi viocili kuenda via kolelua. Kuenje Ñala, haeye Suku yaspiritu ovaprofeto, wa tuma ungelo waye oku lekisa kakuenje vaye evi vi laika oku iya ndopo.

⁷ Kuenje, tala, ndopo njiya. U o patekela olondaka viowanji welivulu eli wa sumũlũha.

⁸ Ame Yoano nda yeva ovina evi haime nda vi mola. Eci nda vi yeva loku vi mola oco nda wila posi oku fendela kolomãi viungelo wa vi ndekisa.

⁹ Eye puãi wa popia lame hati, Ku ka ci linge. Ame ndindingupange kumue love lava vasitue love, okuti ovaprofeto, lava va patekela olondaka vielivulu eli. Fendela Suku.

¹⁰ Oco wa popia lame hati, Ku ka sitike olondaka viowanji welivulu eli, momo otembo yi kasi ocipepi.

¹¹ Ondingaĩvi yende ño loku linga cĩvi. Ukuombondo a ende ño loku linga umbondo. Ukuesunga a ende ño loku linga esunga, lu o kola a ende ño loku kola.

¹² Tala, ndopo njiya. Nena onima yange yoku muisa omanu vosi ndeci ca sesamela ovilinga viavo.

¹³ Ame Tete, haime Kuasula. Ame nda lianga haime nda sulako. Ame ndifetikilo haime ndisulilo.

¹⁴ Ava va sukula olonanga viavo okuti va tẽla oku pitila kuti womuenyo loku pita vombundi ha va iñila vimbo, va sumũlũha.

¹⁵ Kofeka ku siala olombua lolonganga la vakuokahonga kuenda olomondi la vakuaviteka la vosi va sole uhembi loku kemba.

¹⁶ Ame Yesu nda tuma kokuene ungelo wange okuti wimbi uvangi wovina evi kakongelo. Ame ndisĩla lia Daviti, haime ndimbuto yaye, haime ndilumbungululu lua tua luomele.

¹⁷ Espiritu la Ndombua va linga vati, Enju. U o yeva a linge hati, Enju. U o kuete enyona eye, lu wa yongola ovava omuenyo a a tambule ocali.

¹⁸ Ndungula wosi o yeva olondaka viowanji welivulu eli siti, Nda umue o vokiya kolondaka evi, Suku u vokiya olohali via sonehiwa velivulu eli.

¹⁹ Kuenje nda umue o tepulula kolondaka viowanji welivulu eli, Suku u pumbisa ocikepa caye co kuti womuenyo una wa lomboluiwa velivulu eli, u pumbisavo ocikepa caye co kimbo li kola lina lia lomboluiwa velivulu eli.

²⁰ U wa imbila ovina evi uvangi okuti viocili eye wa linga hati, Ocili ndopo njiya. Amene. Enju, a Ñala Yesu.

²¹ Ocali ca Ñala Yesu ci kale lolosandu viosi. Amene.