ESITULUILO 21 - Embimbiliya - Bíblia Sagrada em Umbundu

¹ Oco nda mola ilu liokaliye longongo yokaliye, momo ilu lina liatete lia senguluka longongo yatete, lokalunga ka keko vali.

² Kuenje nda mola imbo li kola, hailio Yerusalãi yokaliye, li kasi loku tunda kilu ku Suku, lia posoka ndondombua ya liposuisila veyaye.

³ Kuenje nda yeva ondaka yinene ya tunda kocalo, ya linga yiti, Tala, onjo ya Suku yi kasi pokati komanu. Eye o tunga lavo, va linga omanu vaye, kuenje Suku eye muẽle o kala lavo, o linga Suku yavo.

⁴ Eye o puenya asuelela osi kovaso avo. Okufa ka ku kalako vali, ndaño oku lila loku liyula lupongo laviovo ka vi kalako vali. Momo ovina viatete via pita.

⁵ Oco u wa tumala kocalo wa popia hati, Tala, ovina viosi ndi vi lingisa viokaliye. Wa popiavo hati, Ci soneha cosi, momo olondaka evi via sunguluka, kuenda viocili.

⁶ Oco wa popia lame hati, Ca pua. Ame Tete, haime Kuasula. Ndifetikilo, haime ndisulilo. U o yeva enyona ndu nyuisa ocali kono yovava omuenyo.

⁷ U o yula o piñala ovina evi, lame ndinga Suku yaye leye o linga omõlange.

⁸ Puãi vakuosumba, la vakualomata, la vakuevĩho, kuenda vakuakuponda, la vakuokahonga, la vakuakutaha, kuenda vakuaviteka, lolohembi viosi, vosi yavo va kuete ocikepa cavo vociva ci taima londalu lofuofuo. Ociva condalu oco okufa kuavali.

⁹ Oco kovangelo vaco epanduvali va kuete atiyela epanduvali e yuka afengi aco epanduvali ana a sulako, kua tunda umue, yu wa popia lame hati, Enju, hu lekise Ndombua, eye ukãi wa Kameme.

¹⁰ Ame nda kala ve Espiritu kuenje ungelo waco wa nuala komunda ya lepa, yu wa ndekisa imbo li kola, Yerusalãi, hailio lia kala oku tunda kilu ku Suku.

¹¹ Li kuete ulamba wa Suku. Okunina kualio kua soka lokunina kuewe lia tĩla pamue lokunina kuewe li liakula, haikuo kuopululu ndovitulu.

¹² Lia kala locimbaka cinene haico cisovi, kuenda olombundi ekui la vivali. Kolombundi viaco kua kala ovangelo ekui la vavali, kuenda kua sonehiwa olonduko viapata ekui la avali a va Isareli.

¹³ Kutundilo kua kala olombundi vitatu, ko Norte olombundi vitatu, ko Sul olombundi vitatu, kutakelo olombundi vitatu.

¹⁴ Ocimbaka cimbo ca kala loviseveto ekui la vivali. Koviseveto viaco kua sonehiwa olonduko ekui la vivali viovapostolo ekui la vavali va Kameme.

¹⁵ U wa popia lame wa kala loluneva lulu luoku seteka laluo imbo lolombundi vialio locimbaka calio.

¹⁶ Imbo liaco lia kala lolonele vikuãla, lusovi walio wa lisoka lupati. Oco wa seteka imbo loluneva. Usovi walio lupati lokulepa kualio kilu via lisoka okuti olokilometru olohũlũkãi vivali lovita vikuãla.

¹⁷ Wa setekavo ocimbaka, kuenje ca soka locita covikeya lakui akuãla la vikuãla. Ndeci ci seteka ulume, haico ca seteka ungelo.

¹⁸ Ocimbaka caco ca tungiwa lovawe a liakula. Imbo lia tungiwa lulu u yela, wa lisoka lovitulu yi yela.

¹⁹ Oviseveto viocimbaka cimbo via yanguiwa lovawe osi a tĩla. Ociseveto catete ca kala ewe li liakula; cavali ewe li tekava ndilu; catatu ewe li ñañala; cakuãla ewe liocivalo cemela li talala;

²⁰ catãlo ewe liovinondolo; cepandu ewe lia kusukilua; cepanduvali ewe lievala liulu; cecelãla ewe lieyavailo; cecea ewe liengõle; cekui ewe lienãla; cekui lamosi ewe li vumbula; cekui la vali ewe liohusu.

²¹ Olombundi vialio ekui la vivali olomota viapanga ekui la vivali, ombundi omota, ombundi omota. Okololo yimbo ulu u yela ya ñañala ndovitulu.

²² Yimbo sia muililemo onembele, momo Yehova Suku Tõlo kuenda Kameme, ovo onembele yalio.

²³ Vimbo liaco ka mu yongola ekumbi pamue osãi ndokuti vi tuilamo, momo ulamba wa Suku owo ocinyi calio, kuenda Kameme eye ondiyelo yalio.

²⁴ Olofeka vi enda enda locinyi calio, lolosoma viokilu lieve vi nenamo ulamba wavio.

²⁵ Olombundi vialio utanya ka va vi yika yika, kuenda ka mu kala uteke.

²⁶ Va nenamo ulamba wolofeka lesumbilo liavio.

²⁷ Lacimue ca vĩha ci iñilamo, ndaño yu o lingainga lãvi pamue uhembi, te ava va sonehiwa velivulu liomuenyo lia Kameme.