ESITULUILO 20 - Embimbiliya - Bíblia Sagrada em Umbundu

¹ Kovaso yaco nda mola ungelo wa kala loku tunda kilu. Wambata peka osapi yonjembo lelienge linene.

² Yu wa kuata ocinyoha cinene, haico onyoha yina yokosiahũlu. Onyoha yaco oyo eliapu haiyo Satana, kuenje ungelo wo kuta okuti o kala kelienge ohũlũkãi yanyamo.

³ Yu wa wimba vonjembo, loku u yikilamo, kuenje wo sitikilamo okuti ka kembi vali olofeka toke ohũlũkãi yalima ya pita. Kovaso yaco o kutuluiwa kuenje o kala ño okatembo kamue.

⁴ Noke nda mola ovialo, kuenje kovialo viaco kua tumala ava va ihiwa omoko yoku tetulula. Nda molavo ovilelembia viava va topuiwa omo va imbila Yesu uvangi, kuenda va kolela ondaka ya Suku, haivo ka va fendelele ocinyama pamue ociñumañuma caco, kuenje ka va kapiwile ondimbukiso yaco kovipala viavo lo kovaka avo. Ovo va kuata vali omuenyo, kuenje va viala kumue la Kristu ohũlũkãi yanyamo.

⁵ Vakuavo va fa ka va kuatele omuenyo toke ohũlũkãi yaco yanyamo ya pita. Olio epinduko liatete.

⁶ U o pinduiwa vepinduko liatete wa sumũlũha haeye o kola. Ovo okufa kuavali ka ku tẽla oku va kuata, puãi va linga ovitunda via Suku la Kristu, kuenje va viala kumue laye ohũlũkãi yanyamo.

⁷ Eci ohũlũkãi yaco yanyamo yi pita oco Satana a kutuluiwa noke vokayike,

⁸ kuenje o tunda oku kemba olofeka vi kasi kavindi akuãla o kilu lieve, okuti Goge la Magoge, kuenje o va konga ovita. Koku tendiwa va soka ndeseke liokalunga.

⁹ Ovo va londa kuosi kilu lieve, kuenje va ñuala ocilombo colosandu limbo lia soliwa. Puãi ondalu ya tunda kilu, kuenje ya va lia elisi.

¹⁰ Eliapu lia va kembele lia imbiwa vociva condalu lofuofuo, haimo mu kasi ocinyama caco luprofeto wesanda, kuenje va yambuiwa utanya luteke oloneke vi enda ño-o hũ, ka vi pui.

¹¹ Oco nda mola ocalo cinene ci yela lu wa tumalako. Osi lilu via tila kovaso aye, lapa vi kala ka pa molehele.

¹² Nda molavo ava va fa, ava vanene lava vatito, va talama kovaso yocalo caco, kuenje alivulu a nyanyumuiwa. Lelivulu likuavo lia nyanyumuiwa, olio elivulu liomuenyo. Lava va fa va tetuluiwa lovina via sonehiwa valivulu, okuti lovilinga viavo.

¹³ Okalunga ka eca ava va fa va kalamo, Kufa la Njembo va eca ava va fa va kalamo. Kuenje vosi va tetuluiwa, omunu omunu ndovilinga viaye.

¹⁴ Kovaso yaco Kufa la Njembo va imbiwa vociva condalu. Ociva condalu oco okufa kuavali.

¹⁵ Kuenje umue nda onduko yaye ka ya sangiwile okuti ya sonehiwa velivulu liomuenyo, vo wimba vociva condalu.