ESITULUILO 2 - Embimbiliya - Bíblia Sagrada em Umbundu

¹ Sonehela ungelo wekongelo lio ke Efeso, huti, Ca popia u o kuete olombungululu epanduvali kondio, haeye endela pokati kolovela epanduvali viulu, ceci,

² hati, Nda kũlĩha ovilinga viove, lupange wove, lepandi liove, lomo ku tẽla oku linala ciwa lolondingaĩvi, puãi wa nyika ava va litukola vati, Tuvapostolo, osimbu havapostoloko, kuenje wa sanga okuti olohembi.

³ Nda kũlĩhavo okuti o kasi lepandi, kuenje o kasi loku kolisako mekonda lionduko yange, loku kava kua kavele.

⁴ Puãi, ñuete love ondaka yokuti ocisola cove catete wa ci yanduluka.

⁵ Oco ivaluka ndomo wa konyoha. Likekembela akandu ove, lovilinga wa kaile lavio kefetikilo vi linga vali. Nda hacoko njiya kokuove. Njupa ovela yove nda ku likekembela akandu ove.

⁶ Haimo cimosi hu panduila ceci okuti, wa suvuka ovilinga via va Nikolau, haivio nda suvukavo.

⁷ U o kasi lovatui a yevelele eci Espiritu li popia lakongelo. U o yula ndu lisa kepako liuti womuenyo u kasi vocumbo ca Suku.

⁸ Sonehela ungelo wekongelo lio ko Smurna, huti, Ca popia u watete haeye wa sulako, okuti yu wa file haeye o kasi vali lomuenyo, ceci,

⁹ hati, Nda kũlĩha ohali yove luputu wove, haimo wuhuasi. Nda kũlĩhavo etonãi liava va litukola vati, Tu va Yudea, osimbu hava Yudeako, puãi vakuasunangonga ya Satana.

¹⁰ Ku ka yokokele ohali o laika oku tala. Hu sapuila okuti eliapu limba vamue pokati kene vokayike okuti vu nyikiwa. Kuenje wu tala ohali ekui lioloneke. Pandikisa ño toke kokufa, kuenje hu iha ekolowa liemuenyo.

¹¹ U o kasi lovatui a yevelele eci Espiritu li popia lakongelo. U o yula, okufa kuavali ka ku u nyõli.

¹² Sonehela ungelo wekongelo lio ko Pergamo, huti, Ca popia u o kasi losipata ya tua nelembali, ceci,

¹³ hati, Oku wa tunga nda kũlĩhako, okuti ko kuna ku kasi ocalo ca Satana. Ove o kasi londuko yange, letavo liange kua li nyemalele, ndaño poloneke viombangi yange Antipasi, haeye wa pandikisa lekolelo, una vo wipaila pokati kene kuna kua tunga Satana.

¹⁴ Puãi ñuete love olondaka vimue viokuti, o kasi lava va kolela ovilongua via Balama, una wa longisa Balaka oku kapela omãla va Isareli ocilondokua okuti, va lia kovina via lumbiwa koviteka, loku linga ukahonga.

¹⁵ Ove o kasivo lava va kolela ovilongua via va Nikolau.

¹⁶ Oco likekembela akandu ove. Nda hacoko, njiya ndopo kokuove kuenje ndi liyaka lavo losipata yomẽla wange.

¹⁷ U o kasi lovatui a yevelele eci Espiritu li popia lakongelo. U o yula ndu wiha yimue ko mana yina ya solekiwa. Ndu wihavo ewe li yela, kuenje kewe liaco kua sonehiwa onduko yokaliye, lomue o yi, te u o yi tambula.

¹⁸ Sonehela ungelo wekongelo lio ko Tuatera, huti, Ca popia Omõla a Suku, u o kasi lovaso a soka lulienge wondalu, lolomãi via setahãla osipi yi nina, ceci,

¹⁹ hati, Nda kũlĩha ovilinga viove, locisola cove, lekolelo liove, lokuvumba kuove, kuenda epandi liove. Nda kũlĩhavo okuti ovilinga viove via sulako ovio via lua, evi viatete vi sule.

²⁰ Puãi ñuete love ondaka yimue yokuti, o tava ño kukãi Isevele, u wa litukola hati, Nduprofeto, haeye o longaisa akuenje vange loku va tamba tamba okuti va linga ukahonga loku lia ovina via lumbiwa koviteka.

²¹ Ndo wiha evelo lioku likekembela akandu, puãi ka tava oku tinduka kupuepue waye.

²² Oco ndu kupuila pula, lava va linga laye ukahonga ndi va imba kohali ya lua nda ka va tinduka kovilinga viaye.

²³ Omãla vaye ndi va ponda. Kuenje akongelo osi a limbuka okuti ame ndukuakupendusula volonulo lo vovitima, haime ndu muisi omunu omunu eci ca sesamela ovilinga viene.

²⁴ Puãi ene wa supipo vo Tuatera, okuti ene ka wa taveli kovilongua viukãi waco, haene ka wa lilongisili eci ca tukuiwa la vamue ovina via longa via Satana, mopia lene, siti, Siu tuiki ocilemo cimue cikuavo.

²⁵ Cimosi lika ndu lunguli ceci okuti, eci wu kuete ci kakateli toke njiya.

²⁶ U o yula kuenje o lava ovopange ange toke kefulilo, ndu wiha unene woku viala olofeka.

²⁷ O vi viala lepangati liutale. Ci pita lavio ndeci ci pita lalonga otuma eci va a sasola. Ndu wiha unene waco ndeci ame muẽle ndo tambula ku Tate.

²⁸ Ndu wihavo olumbungululu luomele.

²⁹ U o kasi lovatui a yevelele eci Espiritu li popia lakongelo.